శ్రీమద్వాల్మీకీయ రామాయణే బాలకాండమ్ ।
అథ సప్తతితమస్సర్గః ।
తతః ప్రభాతే జనకః కృతకర్మా మహర్షిభిః ।
ఉవాచ వాక్యం వాక్యజ్ఞ శ్శతానందం పురోహితమ్ ॥ 1 ॥
భ్రాతా మమ మహాతేజా యవీయానతిధార్మికః ।
కుశధ్వజ ఇతి ఖ్యాతః పురీమధ్యవసచ్ఛుభామ్ ॥ 2 ॥
వార్యాఫలకపర్యంతాం పిబన్నిక్షుమతీం నదీమ్ ।
సాంకాశ్యాం పుణ్యసంకాశాం విమానమివ పుష్పకమ్ ॥ 3 ॥
తమహం ద్రష్టుమిచ్ఛామి యజ్ఞగోప్తా స మే మతః ।
ప్రీతిం సోఽపి మహాతేజా ఇమాం భోక్తా మయా సహ ॥ 4 ॥
ఏవముక్తే తు వచనే శతానందస్య సన్నిధౌ ।
ఆగతాః కేచిదవ్యగ్రా జనకస్తాన్ సమాదిశత్ ॥ 5 ॥
శాసనాత్తు నరేంద్రస్య ప్రయయుశ్శీఘ్రవాజిభిః ।
సమానేతుం నరవ్యాఘ్రం విష్ణుమింద్రాజ్ఞయా యథా ॥ 6 ॥
సాంకాశ్యాం తే సమాగత్య దదృశుశ్చ కుశధ్వజమ్ ।
న్యవేదయన్యథావృత్తం జనకస్య చ చింతితమ్ ॥ 7 ॥
తద్వృత్తం నృపతి శ్శృత్వా దూతశ్రేష్ఠైర్మహాబలైః ।
అజ్ఞాయాఽథ నరేంద్రస్య ఆజగామ కుశధ్వజః ॥ 8 ॥
స దదర్శ మహాత్మానం జనకం ధర్మవత్సలమ్ ।
సోఽభివాద్య శతానందం రాజానం చాపి ధార్మికమ్ ॥ 9 ॥
రాజార్హం పరమం దివ్యమాసనం చాఽధ్యరోహత ।
ఉపవిష్టావుభౌ తౌ తు భ్రాతరావతితేజసౌ ॥ 10 ॥
ప్రేషయామాసతుర్వీరౌ మంత్రిశ్రేష్ఠం సుదామనమ్ ।
గచ్ఛ మంత్రిపతే శీఘ్రమైక్ష్వాకుమమితప్రభమ్ ॥ 11 ॥
ఆత్మజైస్సహ దుర్ధర్షమానయస్వ సమంత్రిణమ్ ।
ఔపకార్యాం స గత్వా తు రఘూణాం కులవర్ధనమ్ ॥ 12 ॥
దదర్శ శిరసా చైనమభివాద్యేదమబ్రవీత్ ।
అయోధ్యాధిపతే వీర వైదేహో మిథిలాధిపః ॥ 13 ॥
స త్వాం ద్రష్టుం వ్యవసితస్సోపాధ్యాయపురోహితమ్ ।
మంత్రిశ్రేష్ఠవచ శ్శృత్వా రాజా సర్షిగణస్తదా ॥ 14 ॥
సబంధురగమత్తత్ర జనకో యత్ర వర్తతే ।
స రాజా మంత్రిసహిత స్సోపాధ్యాయః సబాంధవః ॥ 15 ॥
వాక్యం వాక్యవిదాం శ్రేష్ఠో వైదేహమిదమబ్రవీత్ ।
విదితం తే మహారాజ ఇక్ష్వాకుకులదైవతమ్ ॥ 16 ॥
వక్తా సర్వేషు కృత్యేషు వసిష్ఠో భగవానృషిః ।
విశ్వామిత్రాభ్యనుజ్ఞాతస్సహ సర్వైర్మహర్షిభిః ॥ 17 ॥
ఏష వక్ష్యతి ధర్మాత్మా వసిష్ఠో మే యథాక్రమమ్ ।
ఏవముక్త్వా నరశ్రేష్ఠే రాజ్ఞాం మధ్యే మహాత్మనామ్ ॥ 18 ॥
తూష్ణీంభూతే దశరథే వసిష్ఠో భగవానృషిః ।
ఉవాచ వాక్యం వాక్యజ్ఞో వైదేహం సపురోధసమ్ ॥ 19 ॥
అవ్యక్తప్రభవో బ్రహ్మా శాశ్వతో నిత్య అవ్యయః ।
తస్మాన్మరీచి స్సంజజ్ఞే మరీచేః కాశ్యపః సుతః ॥ 20 ॥
వివస్వాన్ కాశ్యపాజ్జజ్ఞే మనుర్వైవస్వత స్స్మృతః ।
మనుః ప్రజాపతిః పూర్వమిక్ష్వాకుస్తు మనోస్సుతః ॥ 21 ॥
తమిక్ష్వాకుమయోధ్యాయాం రాజానం విద్ధి పూర్వకమ్ ।
ఇక్ష్వాకోస్తు సుతశ్శ్రీమాన్ కుక్షిరిత్యేవ విశ్రుతః ॥ 22 ॥
కుక్షేరథాత్మజః శ్రీమాన్ వికుక్షిరుదపద్యత ।
వికుక్షేస్తు మహాతేజా బాణః పుత్రః ప్రతాపవాన్ ॥ 23 ॥
బాణస్య తు మహాతేజా అనరణ్యః ప్రతాపవాన్ ।
అనరణ్యాత్పృథుర్జజ్ఞే త్రిశంకుస్తు పృథోస్సుతః ॥ 24 ॥
త్రిశంకోరభవత్పుత్రో దుందుమారో మహాయశాః ।
యువనాశ్వసుతస్త్వాసీన్మాంధాతా పృథివీపతిః ॥ 25 ॥
మాంధాతుస్తు సుత శ్శ్రీమాన్ సుసంధిరుదపద్యత ।
సుసంధేరపి పుత్రౌ ద్వౌ ధ్రువసంధిః ప్రసేనజిత్ ॥ 26 ॥
యశస్వీ ధ్రువసంధేస్తు భరతో నామ నామతః ।
భరతాత్తు మహాతేజా అసితో నామ జాతవాన్ ॥ 27 ॥
యస్యైతే ప్రతిరాజాన ఉదపద్యంత శత్రవః ।
హైహయాస్తాలజంఘాశ్చ శూరాశ్చ శశిబిందవః ॥ 28 ॥
తాంస్తు స ప్రతియుధ్యన్ వై యుద్ధే రాజా ప్రవాసితః ।
హిమవంతముపాగమ్య భృగుప్రస్రవణేఽవసత్ ॥ 29 ॥
అసితోఽల్పబలో రాజా మంత్రిభిస్సహితస్తదా ।
ద్వే చాస్య భార్యే గర్భిణ్యౌ బభూవతురితి శ్రుతమ్ ॥ 30 ॥
ఏకా గర్భవినాశాయ సపత్న్యై సగరం దదౌ ।
తత శ్శైలవరం రమ్యం బభూవాభిరతో మునిః ॥ 31 ॥
భార్గవశ్చ్యవనో నామ హిమవంతముపాశ్రితః ।
తత్రైకా తు మహాభాగా భార్గవం దేవవర్చసమ్ ॥ 32 ॥
వవందే పద్మపత్రాక్షీ కాంక్షంతీ సుతమాత్మనః ।
తమృషిం సాఽభ్యుపాగమ్య కాలిందీ చాభ్యవాదయత్ ॥ 33 ॥
స తామభ్యవదద్విప్రః పుత్రేప్సుం పుత్రజన్మని ।
తవ కుక్షౌ మహాభాగే సుపుత్రస్సుమహాబలః ॥ 34 ॥
మహావీర్యో మహాతేజా అచిరాత్సంజనిష్యతి ।
గరేణ సహిత శ్శ్రీమాన్ మా శుచః కమలేక్షణే ॥ 35 ॥
చ్యవనం తు నమస్కృత్య రాజపుత్రీ పతివ్రతా ।
పతిశోకాతురా తస్మాత్పుత్రం దేవీ వ్యజాయత ॥ 36 ॥
సపత్న్యా తు గరస్తస్యై దత్తో గర్భజిఘాంసయా ।
సహ తేన గరేణైవ జాతః స సగరోఽభవత్ ॥ 37 ॥
సగరస్యాసమంజస్తు అసమంజాత్తథాంఽశుమాన్ ।
దిలీపోంఽశుమతః పుత్రో దిలీపస్య భగీరథః ॥ 38 ॥
భగీరథాత్కకుత్స్థశ్చ కకుత్స్థస్య రఘుస్సుతః ।
రఘోస్తు పుత్రస్తేజస్వీ ప్రవృద్ధః పురుషాదకః ॥ 39 ॥
కల్మాషపాదో హ్యభవత్తస్మాజ్జాతస్తు శంఖణః ।
సుదర్శనః శంఘణస్య అగ్నివర్ణ స్సుదర్శనాత్ ॥ 40 ॥
శీఘ్రగస్త్వగ్నివర్ణస్య శీఘ్రగస్య మరు స్సుతః ।
మరోః ప్రశుశ్రుకస్త్వాసీదంబరీషః ప్రశుశ్రృకాత్ ॥ 41 ॥
అంబరీషస్య పుత్రోఽభూన్నహుషః పృథివీపతిః ।
నహుషస్య యయాతిస్తు నాభాగస్తు యయాతిజః ॥ 42 ॥
నాభాగస్య బభూవాజః అజాద్దశరథోఽభవత్ ।
అస్మాద్దశరథాజ్జాతౌ భ్రాతరౌ రామలక్ష్మణౌ ॥ 43 ॥
ఆదివంశవిశుద్ధానాం రాజ్ఞాం పరమధర్మిణామ్ ।
ఇక్ష్వాకుకులజాతానాం వీరాణాం సత్యవాదినామ్ ॥ 44 ॥
రామలక్ష్మణయోరర్థే త్వత్సుతే వరయే నృప ।
సదృశాభ్యాం నృపశ్రేష్ఠ సదృశే దాతుమర్హసి ॥ 45 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే సప్తతితమస్సర్గః ॥
