śrīmadvālmīkīya rāmāyaṇē bālakāṇḍam ।
atha saptatitamassargaḥ ।
tataḥ prabhātē janakaḥ kṛtakarmā maharṣibhiḥ ।
uvācha vākyaṃ vākyajña śśatānandaṃ purōhitam ॥ 1 ॥
bhrātā mama mahātējā yavīyānatidhārmikaḥ ।
kuśadhvaja iti khyātaḥ purīmadhyavasachChubhām ॥ 2 ॥
vāryāphalakaparyantāṃ pibannikṣumatīṃ nadīm ।
sāṅkāśyāṃ puṇyasaṅkāśāṃ vimānamiva puṣpakam ॥ 3 ॥
tamahaṃ draṣṭumichChāmi yajñagōptā sa mē mataḥ ।
prītiṃ sō'pi mahātējā imāṃ bhōktā mayā saha ॥ 4 ॥
ēvamuktē tu vachanē śatānandasya sannidhau ।
āgatāḥ kēchidavyagrā janakastān samādiśat ॥ 5 ॥
śāsanāttu narēndrasya prayayuśśīghravājibhiḥ ।
samānētuṃ naravyāghraṃ viṣṇumindrājñayā yathā ॥ 6 ॥
sāṅkāśyāṃ tē samāgatya dadṛśuścha kuśadhvajam ।
nyavēdayanyathāvṛttaṃ janakasya cha chintitam ॥ 7 ॥
tadvṛttaṃ nṛpati śśṛtvā dūtaśrēṣṭhairmahābalaiḥ ।
ajñāyā'tha narēndrasya ājagāma kuśadhvajaḥ ॥ 8 ॥
sa dadarśa mahātmānaṃ janakaṃ dharmavatsalam ।
sō'bhivādya śatānandaṃ rājānaṃ chāpi dhārmikam ॥ 9 ॥
rājārhaṃ paramaṃ divyamāsanaṃ chā'dhyarōhata ।
upaviṣṭāvubhau tau tu bhrātarāvatitējasau ॥ 10 ॥
prēṣayāmāsaturvīrau mantriśrēṣṭhaṃ sudāmanam ।
gachCha mantripatē śīghramaikṣvākumamitaprabham ॥ 11 ॥
ātmajaissaha durdharṣamānayasva samantriṇam ।
aupakāryāṃ sa gatvā tu raghūṇāṃ kulavardhanam ॥ 12 ॥
dadarśa śirasā chainamabhivādyēdamabravīt ।
ayōdhyādhipatē vīra vaidēhō mithilādhipaḥ ॥ 13 ॥
sa tvāṃ draṣṭuṃ vyavasitassōpādhyāyapurōhitam ।
mantriśrēṣṭhavacha śśṛtvā rājā sarṣigaṇastadā ॥ 14 ॥
sabandhuragamattatra janakō yatra vartatē ।
sa rājā mantrisahita ssōpādhyāyaḥ sabāndhavaḥ ॥ 15 ॥
vākyaṃ vākyavidāṃ śrēṣṭhō vaidēhamidamabravīt ।
viditaṃ tē mahārāja ikṣvākukuladaivatam ॥ 16 ॥
vaktā sarvēṣu kṛtyēṣu vasiṣṭhō bhagavānṛṣiḥ ।
viśvāmitrābhyanujñātassaha sarvairmaharṣibhiḥ ॥ 17 ॥
ēṣa vakṣyati dharmātmā vasiṣṭhō mē yathākramam ।
ēvamuktvā naraśrēṣṭhē rājñāṃ madhyē mahātmanām ॥ 18 ॥
tūṣṇīmbhūtē daśarathē vasiṣṭhō bhagavānṛṣiḥ ।
uvācha vākyaṃ vākyajñō vaidēhaṃ sapurōdhasam ॥ 19 ॥
avyaktaprabhavō brahmā śāśvatō nitya avyayaḥ ।
tasmānmarīchi ssañjajñē marīchēḥ kāśyapaḥ sutaḥ ॥ 20 ॥
vivasvān kāśyapājjajñē manurvaivasvata ssmṛtaḥ ।
manuḥ prajāpatiḥ pūrvamikṣvākustu manōssutaḥ ॥ 21 ॥
tamikṣvākumayōdhyāyāṃ rājānaṃ viddhi pūrvakam ।
ikṣvākōstu sutaśśrīmān kukṣirityēva viśrutaḥ ॥ 22 ॥
kukṣērathātmajaḥ śrīmān vikukṣirudapadyata ।
vikukṣēstu mahātējā bāṇaḥ putraḥ pratāpavān ॥ 23 ॥
bāṇasya tu mahātējā anaraṇyaḥ pratāpavān ।
anaraṇyātpṛthurjajñē triśaṅkustu pṛthōssutaḥ ॥ 24 ॥
triśaṅkōrabhavatputrō dundumārō mahāyaśāḥ ।
yuvanāśvasutastvāsīnmāndhātā pṛthivīpatiḥ ॥ 25 ॥
māndhātustu suta śśrīmān susandhirudapadyata ।
susandhērapi putrau dvau dhruvasandhiḥ prasēnajit ॥ 26 ॥
yaśasvī dhruvasandhēstu bharatō nāma nāmataḥ ।
bharatāttu mahātējā asitō nāma jātavān ॥ 27 ॥
yasyaitē pratirājāna udapadyanta śatravaḥ ।
haihayāstālajaṅghāścha śūrāścha śaśibindavaḥ ॥ 28 ॥
tāṃstu sa pratiyudhyan vai yuddhē rājā pravāsitaḥ ।
himavantamupāgamya bhṛguprasravaṇē'vasat ॥ 29 ॥
asitō'lpabalō rājā mantribhissahitastadā ।
dvē chāsya bhāryē garbhiṇyau babhūvaturiti śrutam ॥ 30 ॥
ēkā garbhavināśāya sapatnyai sagaraṃ dadau ।
tata śśailavaraṃ ramyaṃ babhūvābhiratō muniḥ ॥ 31 ॥
bhārgavaśchyavanō nāma himavantamupāśritaḥ ।
tatraikā tu mahābhāgā bhārgavaṃ dēvavarchasam ॥ 32 ॥
vavandē padmapatrākṣī kāṅkṣantī sutamātmanaḥ ।
tamṛṣiṃ sā'bhyupāgamya kālindī chābhyavādayat ॥ 33 ॥
sa tāmabhyavadadvipraḥ putrēpsuṃ putrajanmani ।
tava kukṣau mahābhāgē suputrassumahābalaḥ ॥ 34 ॥
mahāvīryō mahātējā achirātsañjaniṣyati ।
garēṇa sahita śśrīmān mā śuchaḥ kamalēkṣaṇē ॥ 35 ॥
chyavanaṃ tu namaskṛtya rājaputrī pativratā ।
patiśōkāturā tasmātputraṃ dēvī vyajāyata ॥ 36 ॥
sapatnyā tu garastasyai dattō garbhajighāṃsayā ।
saha tēna garēṇaiva jātaḥ sa sagarō'bhavat ॥ 37 ॥
sagarasyāsamañjastu asamañjāttathāṃ'śumān ।
dilīpōṃ'śumataḥ putrō dilīpasya bhagīrathaḥ ॥ 38 ॥
bhagīrathātkakutsthaścha kakutsthasya raghussutaḥ ।
raghōstu putrastējasvī pravṛddhaḥ puruṣādakaḥ ॥ 39 ॥
kalmāṣapādō hyabhavattasmājjātastu śaṅkhaṇaḥ ।
sudarśanaḥ śaṅghaṇasya agnivarṇa ssudarśanāt ॥ 40 ॥
śīghragastvagnivarṇasya śīghragasya maru ssutaḥ ।
marōḥ praśuśrukastvāsīdambarīṣaḥ praśuśrṛkāt ॥ 41 ॥
ambarīṣasya putrō'bhūnnahuṣaḥ pṛthivīpatiḥ ।
nahuṣasya yayātistu nābhāgastu yayātijaḥ ॥ 42 ॥
nābhāgasya babhūvājaḥ ajāddaśarathō'bhavat ।
asmāddaśarathājjātau bhrātarau rāmalakṣmaṇau ॥ 43 ॥
ādivaṃśaviśuddhānāṃ rājñāṃ paramadharmiṇām ।
ikṣvākukulajātānāṃ vīrāṇāṃ satyavādinām ॥ 44 ॥
rāmalakṣmaṇayōrarthē tvatsutē varayē nṛpa ।
sadṛśābhyāṃ nṛpaśrēṣṭha sadṛśē dātumarhasi ॥ 45 ॥
ityārṣē śrīmadrāmāyaṇē vālmīkīya ādikāvyē bālakāṇḍē saptatitamassargaḥ ॥
