ශ්රීමද්වාල්මීකීය රාමායණේ බාලකාංඩම් ।
අථ සප්තතිතමස්සර්ගඃ ।
තතඃ ප්රභාතේ ජනකඃ කෘතකර්මා මහර්ෂිභිඃ ।
උවාච වාක්යං වාක්යජ්ඤ ශ්ශතානංදං පුරෝහිතම් ॥ 1 ॥
භ්රාතා මම මහාතේජා යවීයානතිධාර්මිකඃ ।
කුශධ්වජ ඉති ඛ්යාතඃ පුරීමධ්යවසච්ඡුභාම් ॥ 2 ॥
වාර්යාඵලකපර්යංතාං පිබන්නික්ෂුමතීං නදීම් ।
සාංකාශ්යාං පුණ්යසංකාශාං විමානමිව පුෂ්පකම් ॥ 3 ॥
තමහං ද්රෂ්ටුමිච්ඡාමි යජ්ඤගෝප්තා ස මේ මතඃ ।
ප්රීතිං සෝऽපි මහාතේජා ඉමාං භෝක්තා මයා සහ ॥ 4 ॥
ඒවමුක්තේ තු වචනේ ශතානංදස්ය සන්නිධෞ ।
ආගතාඃ කේචිදව්යග්රා ජනකස්තාන් සමාදිශත් ॥ 5 ॥
ශාසනාත්තු නරේංද්රස්ය ප්රයයුශ්ශීඝ්රවාජිභිඃ ।
සමානේතුං නරව්යාඝ්රං විෂ්ණුමිංද්රාජ්ඤයා යථා ॥ 6 ॥
සාංකාශ්යාං තේ සමාගත්ය දදෘශුශ්ච කුශධ්වජම් ।
න්යවේදයන්යථාවෘත්තං ජනකස්ය ච චිංතිතම් ॥ 7 ॥
තද්වෘත්තං නෘපති ශ්ශෘත්වා දූතශ්රේෂ්ඨෛර්මහාබලෛඃ ।
අජ්ඤායාऽථ නරේංද්රස්ය ආජගාම කුශධ්වජඃ ॥ 8 ॥
ස දදර්ශ මහාත්මානං ජනකං ධර්මවත්සලම් ।
සෝऽභිවාද්ය ශතානංදං රාජානං චාපි ධාර්මිකම් ॥ 9 ॥
රාජාර්හං පරමං දිව්යමාසනං චාऽධ්යරෝහත ।
උපවිෂ්ටාවුභෞ තෞ තු භ්රාතරාවතිතේජසෞ ॥ 10 ॥
ප්රේෂයාමාසතුර්වීරෞ මංත්රිශ්රේෂ්ඨං සුදාමනම් ।
ගච්ඡ මංත්රිපතේ ශීඝ්රමෛක්ෂ්වාකුමමිතප්රභම් ॥ 11 ॥
ආත්මජෛස්සහ දුර්ධර්ෂමානයස්ව සමංත්රිණම් ।
ඖපකාර්යාං ස ගත්වා තු රඝූණාං කුලවර්ධනම් ॥ 12 ॥
දදර්ශ ශිරසා චෛනමභිවාද්යේදමබ්රවීත් ।
අයෝධ්යාධිපතේ වීර වෛදේහෝ මිථිලාධිපඃ ॥ 13 ॥
ස ත්වාං ද්රෂ්ටුං ව්යවසිතස්සෝපාධ්යායපුරෝහිතම් ।
මංත්රිශ්රේෂ්ඨවච ශ්ශෘත්වා රාජා සර්ෂිගණස්තදා ॥ 14 ॥
සබංධුරගමත්තත්ර ජනකෝ යත්ර වර්තතේ ।
ස රාජා මංත්රිසහිත ස්සෝපාධ්යායඃ සබාංධවඃ ॥ 15 ॥
වාක්යං වාක්යවිදාං ශ්රේෂ්ඨෝ වෛදේහමිදමබ්රවීත් ।
විදිතං තේ මහාරාජ ඉක්ෂ්වාකුකුලදෛවතම් ॥ 16 ॥
වක්තා සර්වේෂු කෘත්යේෂු වසිෂ්ඨෝ භගවානෘෂිඃ ।
විශ්වාමිත්රාභ්යනුජ්ඤාතස්සහ සර්වෛර්මහර්ෂිභිඃ ॥ 17 ॥
ඒෂ වක්ෂ්යති ධර්මාත්මා වසිෂ්ඨෝ මේ යථාක්රමම් ।
ඒවමුක්ත්වා නරශ්රේෂ්ඨේ රාජ්ඤාං මධ්යේ මහාත්මනාම් ॥ 18 ॥
තූෂ්ණීංභූතේ දශරථේ වසිෂ්ඨෝ භගවානෘෂිඃ ।
උවාච වාක්යං වාක්යජ්ඤෝ වෛදේහං සපුරෝධසම් ॥ 19 ॥
අව්යක්තප්රභවෝ බ්රහ්මා ශාශ්වතෝ නිත්ය අව්යයඃ ।
තස්මාන්මරීචි ස්සංජජ්ඤේ මරීචේඃ කාශ්යපඃ සුතඃ ॥ 20 ॥
විවස්වාන් කාශ්යපාජ්ජජ්ඤේ මනුර්වෛවස්වත ස්ස්මෘතඃ ।
මනුඃ ප්රජාපතිඃ පූර්වමික්ෂ්වාකුස්තු මනෝස්සුතඃ ॥ 21 ॥
තමික්ෂ්වාකුමයෝධ්යායාං රාජානං විද්ධි පූර්වකම් ।
ඉක්ෂ්වාකෝස්තු සුතශ්ශ්රීමාන් කුක්ෂිරිත්යේව විශ්රුතඃ ॥ 22 ॥
කුක්ෂේරථාත්මජඃ ශ්රීමාන් විකුක්ෂිරුදපද්යත ।
විකුක්ෂේස්තු මහාතේජා බාණඃ පුත්රඃ ප්රතාපවාන් ॥ 23 ॥
බාණස්ය තු මහාතේජා අනරණ්යඃ ප්රතාපවාන් ।
අනරණ්යාත්පෘථුර්ජජ්ඤේ ත්රිශංකුස්තු පෘථෝස්සුතඃ ॥ 24 ॥
ත්රිශංකෝරභවත්පුත්රෝ දුංදුමාරෝ මහායශාඃ ।
යුවනාශ්වසුතස්ත්වාසීන්මාංධාතා පෘථිවීපතිඃ ॥ 25 ॥
මාංධාතුස්තු සුත ශ්ශ්රීමාන් සුසංධිරුදපද්යත ।
සුසංධේරපි පුත්රෞ ද්වෞ ධ්රුවසංධිඃ ප්රසේනජිත් ॥ 26 ॥
යශස්වී ධ්රුවසංධේස්තු භරතෝ නාම නාමතඃ ।
භරතාත්තු මහාතේජා අසිතෝ නාම ජාතවාන් ॥ 27 ॥
යස්යෛතේ ප්රතිරාජාන උදපද්යංත ශත්රවඃ ।
හෛහයාස්තාලජංඝාශ්ච ශූරාශ්ච ශශිබිංදවඃ ॥ 28 ॥
තාංස්තු ස ප්රතියුධ්යන් වෛ යුද්ධේ රාජා ප්රවාසිතඃ ।
හිමවංතමුපාගම්ය භෘගුප්රස්රවණේऽවසත් ॥ 29 ॥
අසිතෝऽල්පබලෝ රාජා මංත්රිභිස්සහිතස්තදා ।
ද්වේ චාස්ය භාර්යේ ගර්භිණ්යෞ බභූවතුරිති ශ්රුතම් ॥ 30 ॥
ඒකා ගර්භවිනාශාය සපත්න්යෛ සගරං දදෞ ।
තත ශ්ශෛලවරං රම්යං බභූවාභිරතෝ මුනිඃ ॥ 31 ॥
භාර්ගවශ්ච්යවනෝ නාම හිමවංතමුපාශ්රිතඃ ।
තත්රෛකා තු මහාභාගා භාර්ගවං දේවවර්චසම් ॥ 32 ॥
වවංදේ පද්මපත්රාක්ෂී කාංක්ෂංතී සුතමාත්මනඃ ।
තමෘෂිං සාऽභ්යුපාගම්ය කාලිංදී චාභ්යවාදයත් ॥ 33 ॥
ස තාමභ්යවදද්විප්රඃ පුත්රේප්සුං පුත්රජන්මනි ।
තව කුක්ෂෞ මහාභාගේ සුපුත්රස්සුමහාබලඃ ॥ 34 ॥
මහාවීර්යෝ මහාතේජා අචිරාත්සංජනිෂ්යති ।
ගරේණ සහිත ශ්ශ්රීමාන් මා ශුචඃ කමලේක්ෂණේ ॥ 35 ॥
ච්යවනං තු නමස්කෘත්ය රාජපුත්රී පතිව්රතා ।
පතිශෝකාතුරා තස්මාත්පුත්රං දේවී ව්යජායත ॥ 36 ॥
සපත්න්යා තු ගරස්තස්යෛ දත්තෝ ගර්භජිඝාංසයා ।
සහ තේන ගරේණෛව ජාතඃ ස සගරෝऽභවත් ॥ 37 ॥
සගරස්යාසමංජස්තු අසමංජාත්තථාංऽශුමාන් ।
දිලීපෝංऽශුමතඃ පුත්රෝ දිලීපස්ය භගීරථඃ ॥ 38 ॥
භගීරථාත්කකුත්ස්ථශ්ච කකුත්ස්ථස්ය රඝුස්සුතඃ ।
රඝෝස්තු පුත්රස්තේජස්වී ප්රවෘද්ධඃ පුරුෂාදකඃ ॥ 39 ॥
කල්මාෂපාදෝ හ්යභවත්තස්මාජ්ජාතස්තු ශංඛණඃ ।
සුදර්ශනඃ ශංඝණස්ය අග්නිවර්ණ ස්සුදර්ශනාත් ॥ 40 ॥
ශීඝ්රගස්ත්වග්නිවර්ණස්ය ශීඝ්රගස්ය මරු ස්සුතඃ ।
මරෝඃ ප්රශුශ්රුකස්ත්වාසීදංබරීෂඃ ප්රශුශ්රෘකාත් ॥ 41 ॥
අංබරීෂස්ය පුත්රෝऽභූන්නහුෂඃ පෘථිවීපතිඃ ।
නහුෂස්ය යයාතිස්තු නාභාගස්තු යයාතිජඃ ॥ 42 ॥
නාභාගස්ය බභූවාජඃ අජාද්දශරථෝऽභවත් ।
අස්මාද්දශරථාජ්ජාතෞ භ්රාතරෞ රාමලක්ෂ්මණෞ ॥ 43 ॥
ආදිවංශවිශුද්ධානාං රාජ්ඤාං පරමධර්මිණාම් ।
ඉක්ෂ්වාකුකුලජාතානාං වීරාණාං සත්යවාදිනාම් ॥ 44 ॥
රාමලක්ෂ්මණයෝරර්ථේ ත්වත්සුතේ වරයේ නෘප ।
සදෘශාභ්යාං නෘපශ්රේෂ්ඨ සදෘශේ දාතුමර්හසි ॥ 45 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ සප්තතිතමස්සර්ගඃ ॥
