ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ ഏകാദശസ്സര്ഗഃ ।
തം മന്മഥശരൈർവിദ്ധമം കാമവേഗവശാനുഗമ് ।
ഉവാച പൃഥിവീപാലം കൈകേയീ ദാരുണം വചഃ ॥ 1 ॥
നാസ്മി വിപ്രകൃതാദേവ കേനചിന്നാവമാനിതാ ।
അഭിപ്രായസ്തു മേ കശ്ചിത്തമിച്ഛാമി ത്വയാ കൃതമ് ॥ 2 ॥
പ്രതിജ്ഞാം പ്രതിജാനീഷ്വ യദി ത്വം കര്തുമിച്ഛസി ।
അഥ തദ്വ്യാഹരിഷ്യാമി യദഭിപ്രാര്ഥിതം മയാ ॥ 3 ॥
താമുവാച മഹാതേജാഃ കൈകേയീമീഷദുത്സ്മിതഃ ।
കാമീ ഹസ്തേന സംഗൃഹ്യ മൂര്ധജേഷു ശുചിസ്മിതാമ് ॥ 4 ॥
ആവലിപ്തേ ന ജാനാസി ത്വത്തഃ പ്രിയതരോ മമ ।
മനുജോ മനുജവ്യാഘ്രാദ്രാമാദന്യോ ന വിദ്യതേ ॥ 5 ॥
തേനാജയ്യേന മുഖ്യേന രാഘവേണ മഹാത്മനാ ।
ശപേ തേ ജീവനാര്ഹേണ ബ്രൂഹി യന്മനസേച്ഛാസി ॥ 6 ॥
യം മുഹൂര്തമപശ്യംസ്തു ന ജീവേയമഹം ധ്രുവമ് ।
തേന രാമേണ കൈകേയി ശപേ തേ വചനക്രിയാമ് ॥ 7 ॥
ആത്മനാ വാത്മജൈശ്ചാന്യൈർവൃണേയം മനുജര്ഷഭമ് ।
തേന രാമേണ കൈകേയി ശപേ തേ വചനക്രിയാമ് ॥ 8 ॥
ഭദ്രേ ഹൃദയമപ്യേതദനുമൃശോദ്ധരസ്വ മേ ।
ഏതത്സമീക്ഷ്യ കൈകേയി ബ്രൂഹി യത്സാധു മന്യസേ ॥ 9 ॥
ബലമാത്മനി ജാനംതീ ന മാം ശംകിതുമര്ഹസി ।
കരിഷ്യാമി തവ പ്രീതിം സുകൃതേനാപി തേ ശപേ ॥ 10 ॥
സാ തദര്ഥമനാ ദേവീ തമഭിപ്രായമാഗതമ് ।
നിര്മാധ്യസ്ഥ്യാച്ച ഹര്ഷാച്ച ബഭാഷേ ദുർവചം വചഃ ॥ 11 ॥
തേന വാക്യേന സംഹൃഷ്ടാ തമഭിപ്രായമാഗതമ് ।
വ്യാജഹാര മഹാഘോരമഭ്യാഗതമിവാംതകമ് ॥ 12 ॥
യഥാ ക്രമേ ശപസി വരം മമ ദദാസി ച ।
തച്ഛൃണ്വംതു ത്രയസ്ത്രിംശദ്ദേവാസ്സാഗ്നിപുരോഗമാഃ ॥ 13 ॥
ചംദ്രാദിത്യൌ നഭശ്ചൈവ ഗ്രഹാ രാത്ര്യഹനീ ദിശഃ ।
ജഗച്ച പൃഥിവീ ചേയം സഗംധർവാ സരാക്ഷസാ ॥ 14 ॥
നിശാചരാണി ഭൂതാനി ഗൃഹേഷു ഗൃഹദേവതാ ।
യാനി ചാന്യാനി ഭൂതാനി ജാനീയുര്ഭാഷിതം തവ ॥ 15 ॥
സത്യസംധോ മഹാതേജാഃ ധര്മജ്ഞഃ സുസമാഹിതഃ ।
വരം മമ ദദാത്യേഷ തന്മേ ശ്രൃണ്വംതു ദൈവതാഃ ॥ 16 ॥
ഇതി ദേവീ മഹേഷ്വാസം പരിഗൃഹ്യാഭിശസ്യ ച ।
തതഃ പരമുവാചേദം വരദം കാമമോഹിതമ് ॥ 17 ॥
സ്മര രാജന് പുരാവൃത്തം തസ്മിന് ദൈവാസുരേ രണേ ।
തത്ര ചാച്യാവയച്ഛത്രുസ്തവ ജീവിതമംതരാ ॥ 18 ॥
തത്ര ചാപി മയാ ദേവ യത്ത്വം സമഭിരക്ഷിതഃ ।
ജാഗ്രത്യാ യതമാനായാസ്തതോ മേ പ്രാദദാ വരൌ ॥ 19 ॥
തൌ തു ദത്തൌ വരൌ ദേവ നിക്ഷേപൌ മൃഗയാമ്യഹമ് ।
തഥൈവ പൃഥിവീപാല സകാശേ സത്യസംഗര ॥ 20 ॥
തത് പ്രതിശ്രുത്യ ധര്മേണ ന ചേദ്ദാസ്യസി മേ വരമ് ।
അദ്യൈവ ഹി പ്രഹാസ്യാമി ജീവിതം ത്വദ്വിമാനിതാ ॥ 21 ॥
വാങ്മാത്രേണ തദാ രാജാ കൈകേയ്യാ സ്വവശേ കൃതഃ ।
പ്രചസ്കംദ വിനാശായ പാശം മൃഗ ഇവാത്മനഃ ॥ 22 ॥
തതഃ പരമുവാചേദം വരദം കാമമോഹിതമ് ।
വരൌ യൌ മേ ത്വയാ ദേവ തദാ ദത്തൌ മഹീപതേ ॥ 23 ॥
തൌ താവദഹമദ്യൈവ വക്ഷ്യാമി ശൃണു മേ വചഃ ।
അഭിഷേകസമാരംഭോ രാഘവസ്യോപകല്പിതഃ ॥ 24 ॥
അനേനൈവാഭിഷേകേണ ഭരതോ മേഽഭിഷിച്യതാമ് ।
യോ ദ്വിതീയോ വരോ ദേവ ദത്തഃ പ്രീതേന മേ ത്വയാ ॥ 25 ॥
തദാ ദൈവാസുരേ യുദ്ധേ തസ്യ കാലോഽയമാഗത ।
നവ പംച ച വര്ഷാണി ദംഡകാരണ്യമാശ്രിതഃ ॥ 26 ॥
ചീരാജിനജടാധാരീ രാമോ ഭവതു താപസഃ ।
ഭരതോ ഭജതാമദ്യ യൌവരാജ്യമകംടകമ് ॥ 27 ॥
ഏഷ മേ പരമഃ കാമോ ദത്തമേവ വരം വൃണേ ।
അദ്യ ചൈവ ഹി പശ്യേയം പ്രയാംതം രാഘവം വനമ് ॥ 28 ॥
സ രാജരാജഃ ഭവ സത്യസംഗരഃ കുലം ച ശീലം ച ഹി രക്ഷ ജന്മ ച ।
പരത്രവാസേ ഹി വദംത്യനുത്തമം തപോധനാസ്സത്യവചോ ഹിതം നൃണാമ് ॥ 29 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ ഏകാദശസ്സര്ഗഃ ॥
