ଶ୍ରୀମଦ୍ଵାଲ୍ମୀକୀୟ ରାମାୟଣେ ଅୟୋଧ୍ୟାକାଂଡମ୍ ।
ଅଥ ଏକାଦଶସ୍ସର୍ଗଃ ।
ତଂ ମନ୍ମଥଶରୈର୍ଵିଦ୍ଧମଂ କାମଵେଗଵଶାନୁଗମ୍ ।
ଉଵାଚ ପୃଥିଵୀପାଲଂ କୈକେୟୀ ଦାରୁଣଂ ଵଚଃ ॥ 1 ॥
ନାସ୍ମି ଵିପ୍ରକୃତାଦେଵ କେନଚିନ୍ନାଵମାନିତା ।
ଅଭିପ୍ରାୟସ୍ତୁ ମେ କଶ୍ଚିତ୍ତମିଚ୍ଛାମି ତ୍ଵୟା କୃତମ୍ ॥ 2 ॥
ପ୍ରତିଜ୍ଞାଂ ପ୍ରତିଜାନୀଷ୍ଵ ୟଦି ତ୍ଵଂ କର୍ତୁମିଚ୍ଛସି ।
ଅଥ ତଦ୍ଵ୍ୟାହରିଷ୍ୟାମି ୟଦଭିପ୍ରାର୍ଥିତଂ ମୟା ॥ 3 ॥
ତାମୁଵାଚ ମହାତେଜାଃ କୈକେୟୀମୀଷଦୁତ୍ସ୍ମିତଃ ।
କାମୀ ହସ୍ତେନ ସଂଗୃହ୍ୟ ମୂର୍ଧଜେଷୁ ଶୁଚିସ୍ମିତାମ୍ ॥ 4 ॥
ଆଵଲିପ୍ତେ ନ ଜାନାସି ତ୍ଵତ୍ତଃ ପ୍ରିୟତରୋ ମମ ।
ମନୁଜୋ ମନୁଜଵ୍ୟାଘ୍ରାଦ୍ରାମାଦନ୍ୟୋ ନ ଵିଦ୍ୟତେ ॥ 5 ॥
ତେନାଜୟ୍ୟେନ ମୁଖ୍ୟେନ ରାଘଵେଣ ମହାତ୍ମନା ।
ଶପେ ତେ ଜୀଵନାର୍ହେଣ ବ୍ରୂହି ୟନ୍ମନସେଚ୍ଛାସି ॥ 6 ॥
ୟଂ ମୁହୂର୍ତମପଶ୍ୟଂସ୍ତୁ ନ ଜୀଵେୟମହଂ ଧ୍ରୁଵମ୍ ।
ତେନ ରାମେଣ କୈକେୟି ଶପେ ତେ ଵଚନକ୍ରିୟାମ୍ ॥ 7 ॥
ଆତ୍ମନା ଵାତ୍ମଜୈଶ୍ଚାନ୍ୟୈର୍ଵୃଣେୟଂ ମନୁଜର୍ଷଭମ୍ ।
ତେନ ରାମେଣ କୈକେୟି ଶପେ ତେ ଵଚନକ୍ରିୟାମ୍ ॥ 8 ॥
ଭଦ୍ରେ ହୃଦୟମପ୍ୟେତଦନୁମୃଶୋଦ୍ଧରସ୍ଵ ମେ ।
ଏତତ୍ସମୀକ୍ଷ୍ୟ କୈକେୟି ବ୍ରୂହି ୟତ୍ସାଧୁ ମନ୍ୟସେ ॥ 9 ॥
ବଲମାତ୍ମନି ଜାନଂତୀ ନ ମାଂ ଶଂକିତୁମର୍ହସି ।
କରିଷ୍ୟାମି ତଵ ପ୍ରୀତିଂ ସୁକୃତେନାପି ତେ ଶପେ ॥ 10 ॥
ସା ତଦର୍ଥମନା ଦେଵୀ ତମଭିପ୍ରାୟମାଗତମ୍ ।
ନିର୍ମାଧ୍ୟସ୍ଥ୍ୟାଚ୍ଚ ହର୍ଷାଚ୍ଚ ବଭାଷେ ଦୁର୍ଵଚଂ ଵଚଃ ॥ 11 ॥
ତେନ ଵାକ୍ୟେନ ସଂହୃଷ୍ଟା ତମଭିପ୍ରାୟମାଗତମ୍ ।
ଵ୍ୟାଜହାର ମହାଘୋରମଭ୍ୟାଗତମିଵାଂତକମ୍ ॥ 12 ॥
ୟଥା କ୍ରମେ ଶପସି ଵରଂ ମମ ଦଦାସି ଚ ।
ତଚ୍ଛୃଣ୍ଵଂତୁ ତ୍ରୟସ୍ତ୍ରିଂଶଦ୍ଦେଵାସ୍ସାଗ୍ନିପୁରୋଗମାଃ ॥ 13 ॥
ଚଂଦ୍ରାଦିତ୍ୟୌ ନଭଶ୍ଚୈଵ ଗ୍ରହା ରାତ୍ର୍ୟହନୀ ଦିଶଃ ।
ଜଗଚ୍ଚ ପୃଥିଵୀ ଚେୟଂ ସଗଂଧର୍ଵା ସରାକ୍ଷସା ॥ 14 ॥
ନିଶାଚରାଣି ଭୂତାନି ଗୃହେଷୁ ଗୃହଦେଵତା ।
ୟାନି ଚାନ୍ୟାନି ଭୂତାନି ଜାନୀୟୁର୍ଭାଷିତଂ ତଵ ॥ 15 ॥
ସତ୍ୟସଂଧୋ ମହାତେଜାଃ ଧର୍ମଜ୍ଞଃ ସୁସମାହିତଃ ।
ଵରଂ ମମ ଦଦାତ୍ୟେଷ ତନ୍ମେ ଶ୍ରୃଣ୍ଵଂତୁ ଦୈଵତାଃ ॥ 16 ॥
ଇତି ଦେଵୀ ମହେଷ୍ଵାସଂ ପରିଗୃହ୍ୟାଭିଶସ୍ୟ ଚ ।
ତତଃ ପରମୁଵାଚେଦଂ ଵରଦଂ କାମମୋହିତମ୍ ॥ 17 ॥
ସ୍ମର ରାଜନ୍ ପୁରାଵୃତ୍ତଂ ତସ୍ମିନ୍ ଦୈଵାସୁରେ ରଣେ ।
ତତ୍ର ଚାଚ୍ୟାଵୟଚ୍ଛତ୍ରୁସ୍ତଵ ଜୀଵିତମଂତରା ॥ 18 ॥
ତତ୍ର ଚାପି ମୟା ଦେଵ ୟତ୍ତ୍ଵଂ ସମଭିରକ୍ଷିତଃ ।
ଜାଗ୍ରତ୍ୟା ୟତମାନାୟାସ୍ତତୋ ମେ ପ୍ରାଦଦା ଵରୌ ॥ 19 ॥
ତୌ ତୁ ଦତ୍ତୌ ଵରୌ ଦେଵ ନିକ୍ଷେପୌ ମୃଗୟାମ୍ୟହମ୍ ।
ତଥୈଵ ପୃଥିଵୀପାଲ ସକାଶେ ସତ୍ୟସଂଗର ॥ 20 ॥
ତତ୍ ପ୍ରତିଶ୍ରୁତ୍ୟ ଧର୍ମେଣ ନ ଚେଦ୍ଦାସ୍ୟସି ମେ ଵରମ୍ ।
ଅଦ୍ୟୈଵ ହି ପ୍ରହାସ୍ୟାମି ଜୀଵିତଂ ତ୍ଵଦ୍ଵିମାନିତା ॥ 21 ॥
ଵାଙ୍ମାତ୍ରେଣ ତଦା ରାଜା କୈକେୟ୍ୟା ସ୍ଵଵଶେ କୃତଃ ।
ପ୍ରଚସ୍କଂଦ ଵିନାଶାୟ ପାଶଂ ମୃଗ ଇଵାତ୍ମନଃ ॥ 22 ॥
ତତଃ ପରମୁଵାଚେଦଂ ଵରଦଂ କାମମୋହିତମ୍ ।
ଵରୌ ୟୌ ମେ ତ୍ଵୟା ଦେଵ ତଦା ଦତ୍ତୌ ମହୀପତେ ॥ 23 ॥
ତୌ ତାଵଦହମଦ୍ୟୈଵ ଵକ୍ଷ୍ୟାମି ଶୃଣୁ ମେ ଵଚଃ ।
ଅଭିଷେକସମାରଂଭୋ ରାଘଵସ୍ୟୋପକଲ୍ପିତଃ ॥ 24 ॥
ଅନେନୈଵାଭିଷେକେଣ ଭରତୋ ମେଽଭିଷିଚ୍ୟତାମ୍ ।
ୟୋ ଦ୍ଵିତୀୟୋ ଵରୋ ଦେଵ ଦତ୍ତଃ ପ୍ରୀତେନ ମେ ତ୍ଵୟା ॥ 25 ॥
ତଦା ଦୈଵାସୁରେ ୟୁଦ୍ଧେ ତସ୍ୟ କାଲୋଽୟମାଗତ ।
ନଵ ପଂଚ ଚ ଵର୍ଷାଣି ଦଂଡକାରଣ୍ୟମାଶ୍ରିତଃ ॥ 26 ॥
ଚୀରାଜିନଜଟାଧାରୀ ରାମୋ ଭଵତୁ ତାପସଃ ।
ଭରତୋ ଭଜତାମଦ୍ୟ ୟୌଵରାଜ୍ୟମକଂଟକମ୍ ॥ 27 ॥
ଏଷ ମେ ପରମଃ କାମୋ ଦତ୍ତମେଵ ଵରଂ ଵୃଣେ ।
ଅଦ୍ୟ ଚୈଵ ହି ପଶ୍ୟେୟଂ ପ୍ରୟାଂତଂ ରାଘଵଂ ଵନମ୍ ॥ 28 ॥
ସ ରାଜରାଜଃ ଭଵ ସତ୍ୟସଂଗରଃ କୁଲଂ ଚ ଶୀଲଂ ଚ ହି ରକ୍ଷ ଜନ୍ମ ଚ ।
ପରତ୍ରଵାସେ ହି ଵଦଂତ୍ୟନୁତ୍ତମଂ ତପୋଧନାସ୍ସତ୍ୟଵଚୋ ହିତଂ ନୃଣାମ୍ ॥ 29 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅୟୋଧ୍ୟାକାଂଡେ ଏକାଦଶସ୍ସର୍ଗଃ ॥
