శ్రీమద్వాల్మీకీయ రామాయణే అయోధ్యాకాండమ్ ।
అథ ఏకాదశస్సర్గః ।
తం మన్మథశరైర్విద్ధమం కామవేగవశానుగమ్ ।
ఉవాచ పృథివీపాలం కైకేయీ దారుణం వచః ॥ 1 ॥
నాస్మి విప్రకృతాదేవ కేనచిన్నావమానితా ।
అభిప్రాయస్తు మే కశ్చిత్తమిచ్ఛామి త్వయా కృతమ్ ॥ 2 ॥
ప్రతిజ్ఞాం ప్రతిజానీష్వ యది త్వం కర్తుమిచ్ఛసి ।
అథ తద్వ్యాహరిష్యామి యదభిప్రార్థితం మయా ॥ 3 ॥
తామువాచ మహాతేజాః కైకేయీమీషదుత్స్మితః ।
కామీ హస్తేన సంగృహ్య మూర్ధజేషు శుచిస్మితామ్ ॥ 4 ॥
ఆవలిప్తే న జానాసి త్వత్తః ప్రియతరో మమ ।
మనుజో మనుజవ్యాఘ్రాద్రామాదన్యో న విద్యతే ॥ 5 ॥
తేనాజయ్యేన ముఖ్యేన రాఘవేణ మహాత్మనా ।
శపే తే జీవనార్హేణ బ్రూహి యన్మనసేచ్ఛాసి ॥ 6 ॥
యం ముహూర్తమపశ్యంస్తు న జీవేయమహం ధ్రువమ్ ।
తేన రామేణ కైకేయి శపే తే వచనక్రియామ్ ॥ 7 ॥
ఆత్మనా వాత్మజైశ్చాన్యైర్వృణేయం మనుజర్షభమ్ ।
తేన రామేణ కైకేయి శపే తే వచనక్రియామ్ ॥ 8 ॥
భద్రే హృదయమప్యేతదనుమృశోద్ధరస్వ మే ।
ఏతత్సమీక్ష్య కైకేయి బ్రూహి యత్సాధు మన్యసే ॥ 9 ॥
బలమాత్మని జానంతీ న మాం శంకితుమర్హసి ।
కరిష్యామి తవ ప్రీతిం సుకృతేనాపి తే శపే ॥ 10 ॥
సా తదర్థమనా దేవీ తమభిప్రాయమాగతమ్ ।
నిర్మాధ్యస్థ్యాచ్చ హర్షాచ్చ బభాషే దుర్వచం వచః ॥ 11 ॥
తేన వాక్యేన సంహృష్టా తమభిప్రాయమాగతమ్ ।
వ్యాజహార మహాఘోరమభ్యాగతమివాంతకమ్ ॥ 12 ॥
యథా క్రమే శపసి వరం మమ దదాసి చ ।
తచ్ఛృణ్వంతు త్రయస్త్రింశద్దేవాస్సాగ్నిపురోగమాః ॥ 13 ॥
చంద్రాదిత్యౌ నభశ్చైవ గ్రహా రాత్ర్యహనీ దిశః ।
జగచ్చ పృథివీ చేయం సగంధర్వా సరాక్షసా ॥ 14 ॥
నిశాచరాణి భూతాని గృహేషు గృహదేవతా ।
యాని చాన్యాని భూతాని జానీయుర్భాషితం తవ ॥ 15 ॥
సత్యసంధో మహాతేజాః ధర్మజ్ఞః సుసమాహితః ।
వరం మమ దదాత్యేష తన్మే శ్రృణ్వంతు దైవతాః ॥ 16 ॥
ఇతి దేవీ మహేష్వాసం పరిగృహ్యాభిశస్య చ ।
తతః పరమువాచేదం వరదం కామమోహితమ్ ॥ 17 ॥
స్మర రాజన్ పురావృత్తం తస్మిన్ దైవాసురే రణే ।
తత్ర చాచ్యావయచ్ఛత్రుస్తవ జీవితమంతరా ॥ 18 ॥
తత్ర చాపి మయా దేవ యత్త్వం సమభిరక్షితః ।
జాగ్రత్యా యతమానాయాస్తతో మే ప్రాదదా వరౌ ॥ 19 ॥
తౌ తు దత్తౌ వరౌ దేవ నిక్షేపౌ మృగయామ్యహమ్ ।
తథైవ పృథివీపాల సకాశే సత్యసంగర ॥ 20 ॥
తత్ ప్రతిశ్రుత్య ధర్మేణ న చేద్దాస్యసి మే వరమ్ ।
అద్యైవ హి ప్రహాస్యామి జీవితం త్వద్విమానితా ॥ 21 ॥
వాఙ్మాత్రేణ తదా రాజా కైకేయ్యా స్వవశే కృతః ।
ప్రచస్కంద వినాశాయ పాశం మృగ ఇవాత్మనః ॥ 22 ॥
తతః పరమువాచేదం వరదం కామమోహితమ్ ।
వరౌ యౌ మే త్వయా దేవ తదా దత్తౌ మహీపతే ॥ 23 ॥
తౌ తావదహమద్యైవ వక్ష్యామి శృణు మే వచః ।
అభిషేకసమారంభో రాఘవస్యోపకల్పితః ॥ 24 ॥
అనేనైవాభిషేకేణ భరతో మేఽభిషిచ్యతామ్ ।
యో ద్వితీయో వరో దేవ దత్తః ప్రీతేన మే త్వయా ॥ 25 ॥
తదా దైవాసురే యుద్ధే తస్య కాలోఽయమాగత ।
నవ పంచ చ వర్షాణి దండకారణ్యమాశ్రితః ॥ 26 ॥
చీరాజినజటాధారీ రామో భవతు తాపసః ।
భరతో భజతామద్య యౌవరాజ్యమకంటకమ్ ॥ 27 ॥
ఏష మే పరమః కామో దత్తమేవ వరం వృణే ।
అద్య చైవ హి పశ్యేయం ప్రయాంతం రాఘవం వనమ్ ॥ 28 ॥
స రాజరాజః భవ సత్యసంగరః కులం చ శీలం చ హి రక్ష జన్మ చ ।
పరత్రవాసే హి వదంత్యనుత్తమం తపోధనాస్సత్యవచో హితం నృణామ్ ॥ 29 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అయోధ్యాకాండే ఏకాదశస్సర్గః ॥
