ශ්රීමද්වාල්මීකීය රාමායණේ අයෝධ්යාකාංඩම් ।
අථ ඒකාදශස්සර්ගඃ ।
තං මන්මථශරෛර්විද්ධමං කාමවේගවශානුගම් ।
උවාච පෘථිවීපාලං කෛකේයී දාරුණං වචඃ ॥ 1 ॥
නාස්මි විප්රකෘතාදේව කේනචින්නාවමානිතා ।
අභිප්රායස්තු මේ කශ්චිත්තමිච්ඡාමි ත්වයා කෘතම් ॥ 2 ॥
ප්රතිජ්ඤාං ප්රතිජානීෂ්ව යදි ත්වං කර්තුමිච්ඡසි ।
අථ තද්ව්යාහරිෂ්යාමි යදභිප්රාර්ථිතං මයා ॥ 3 ॥
තාමුවාච මහාතේජාඃ කෛකේයීමීෂදුත්ස්මිතඃ ।
කාමී හස්තේන සංගෘහ්ය මූර්ධජේෂු ශුචිස්මිතාම් ॥ 4 ॥
ආවලිප්තේ න ජානාසි ත්වත්තඃ ප්රියතරෝ මම ।
මනුජෝ මනුජව්යාඝ්රාද්රාමාදන්යෝ න විද්යතේ ॥ 5 ॥
තේනාජය්යේන මුඛ්යේන රාඝවේණ මහාත්මනා ।
ශපේ තේ ජීවනාර්හේණ බ්රූහි යන්මනසේච්ඡාසි ॥ 6 ॥
යං මුහූර්තමපශ්යංස්තු න ජීවේයමහං ධ්රුවම් ।
තේන රාමේණ කෛකේයි ශපේ තේ වචනක්රියාම් ॥ 7 ॥
ආත්මනා වාත්මජෛශ්චාන්යෛර්වෘණේයං මනුජර්ෂභම් ।
තේන රාමේණ කෛකේයි ශපේ තේ වචනක්රියාම් ॥ 8 ॥
භද්රේ හෘදයමප්යේතදනුමෘශෝද්ධරස්ව මේ ।
ඒතත්සමීක්ෂ්ය කෛකේයි බ්රූහි යත්සාධු මන්යසේ ॥ 9 ॥
බලමාත්මනි ජානංතී න මාං ශංකිතුමර්හසි ।
කරිෂ්යාමි තව ප්රීතිං සුකෘතේනාපි තේ ශපේ ॥ 10 ॥
සා තදර්ථමනා දේවී තමභිප්රායමාගතම් ।
නිර්මාධ්යස්ථ්යාච්ච හර්ෂාච්ච බභාෂේ දුර්වචං වචඃ ॥ 11 ॥
තේන වාක්යේන සංහෘෂ්ටා තමභිප්රායමාගතම් ।
ව්යාජහාර මහාඝෝරමභ්යාගතමිවාංතකම් ॥ 12 ॥
යථා ක්රමේ ශපසි වරං මම දදාසි ච ।
තච්ඡෘණ්වංතු ත්රයස්ත්රිංශද්දේවාස්සාග්නිපුරෝගමාඃ ॥ 13 ॥
චංද්රාදිත්යෞ නභශ්චෛව ග්රහා රාත්ර්යහනී දිශඃ ।
ජගච්ච පෘථිවී චේයං සගංධර්වා සරාක්ෂසා ॥ 14 ॥
නිශාචරාණි භූතානි ගෘහේෂු ගෘහදේවතා ।
යානි චාන්යානි භූතානි ජානීයුර්භාෂිතං තව ॥ 15 ॥
සත්යසංධෝ මහාතේජාඃ ධර්මජ්ඤඃ සුසමාහිතඃ ।
වරං මම දදාත්යේෂ තන්මේ ශ්රෘණ්වංතු දෛවතාඃ ॥ 16 ॥
ඉති දේවී මහේෂ්වාසං පරිගෘහ්යාභිශස්ය ච ।
තතඃ පරමුවාචේදං වරදං කාමමෝහිතම් ॥ 17 ॥
ස්මර රාජන් පුරාවෘත්තං තස්මින් දෛවාසුරේ රණේ ।
තත්ර චාච්යාවයච්ඡත්රුස්තව ජීවිතමංතරා ॥ 18 ॥
තත්ර චාපි මයා දේව යත්ත්වං සමභිරක්ෂිතඃ ।
ජාග්රත්යා යතමානායාස්තතෝ මේ ප්රාදදා වරෞ ॥ 19 ॥
තෞ තු දත්තෞ වරෞ දේව නික්ෂේපෞ මෘගයාම්යහම් ।
තථෛව පෘථිවීපාල සකාශේ සත්යසංගර ॥ 20 ॥
තත් ප්රතිශ්රුත්ය ධර්මේණ න චේද්දාස්යසි මේ වරම් ।
අද්යෛව හි ප්රහාස්යාමි ජීවිතං ත්වද්විමානිතා ॥ 21 ॥
වාඞ්මාත්රේණ තදා රාජා කෛකේය්යා ස්වවශේ කෘතඃ ।
ප්රචස්කංද විනාශාය පාශං මෘග ඉවාත්මනඃ ॥ 22 ॥
තතඃ පරමුවාචේදං වරදං කාමමෝහිතම් ।
වරෞ යෞ මේ ත්වයා දේව තදා දත්තෞ මහීපතේ ॥ 23 ॥
තෞ තාවදහමද්යෛව වක්ෂ්යාමි ශෘණු මේ වචඃ ।
අභිෂේකසමාරංභෝ රාඝවස්යෝපකල්පිතඃ ॥ 24 ॥
අනේනෛවාභිෂේකේණ භරතෝ මේऽභිෂිච්යතාම් ।
යෝ ද්විතීයෝ වරෝ දේව දත්තඃ ප්රීතේන මේ ත්වයා ॥ 25 ॥
තදා දෛවාසුරේ යුද්ධේ තස්ය කාලෝऽයමාගත ।
නව පංච ච වර්ෂාණි දංඩකාරණ්යමාශ්රිතඃ ॥ 26 ॥
චීරාජිනජටාධාරී රාමෝ භවතු තාපසඃ ।
භරතෝ භජතාමද්ය යෞවරාජ්යමකංටකම් ॥ 27 ॥
ඒෂ මේ පරමඃ කාමෝ දත්තමේව වරං වෘණේ ।
අද්ය චෛව හි පශ්යේයං ප්රයාංතං රාඝවං වනම් ॥ 28 ॥
ස රාජරාජඃ භව සත්යසංගරඃ කුලං ච ශීලං ච හි රක්ෂ ජන්ම ච ।
පරත්රවාසේ හි වදංත්යනුත්තමං තපෝධනාස්සත්යවචෝ හිතං නෘණාම් ॥ 29 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ඒකාදශස්සර්ගඃ ॥
