śrīmadvālmīkīya rāmāyaṇē ayōdhyākāṇḍam ।
atha ēkādaśassargaḥ ।
taṃ manmathaśarairviddhamaṃ kāmavēgavaśānugam ।
uvācha pṛthivīpālaṃ kaikēyī dāruṇaṃ vachaḥ ॥ 1 ॥
nāsmi viprakṛtādēva kēnachinnāvamānitā ।
abhiprāyastu mē kaśchittamichChāmi tvayā kṛtam ॥ 2 ॥
pratijñāṃ pratijānīṣva yadi tvaṃ kartumichChasi ।
atha tadvyāhariṣyāmi yadabhiprārthitaṃ mayā ॥ 3 ॥
tāmuvācha mahātējāḥ kaikēyīmīṣadutsmitaḥ ।
kāmī hastēna saṅgṛhya mūrdhajēṣu śuchismitām ॥ 4 ॥
āvaliptē na jānāsi tvattaḥ priyatarō mama ।
manujō manujavyāghrādrāmādanyō na vidyatē ॥ 5 ॥
tēnājayyēna mukhyēna rāghavēṇa mahātmanā ।
śapē tē jīvanārhēṇa brūhi yanmanasēchChāsi ॥ 6 ॥
yaṃ muhūrtamapaśyaṃstu na jīvēyamahaṃ dhruvam ।
tēna rāmēṇa kaikēyi śapē tē vachanakriyām ॥ 7 ॥
ātmanā vātmajaiśchānyairvṛṇēyaṃ manujarṣabham ।
tēna rāmēṇa kaikēyi śapē tē vachanakriyām ॥ 8 ॥
bhadrē hṛdayamapyētadanumṛśōddharasva mē ।
ētatsamīkṣya kaikēyi brūhi yatsādhu manyasē ॥ 9 ॥
balamātmani jānantī na māṃ śaṅkitumarhasi ।
kariṣyāmi tava prītiṃ sukṛtēnāpi tē śapē ॥ 10 ॥
sā tadarthamanā dēvī tamabhiprāyamāgatam ।
nirmādhyasthyāchcha harṣāchcha babhāṣē durvachaṃ vachaḥ ॥ 11 ॥
tēna vākyēna saṃhṛṣṭā tamabhiprāyamāgatam ।
vyājahāra mahāghōramabhyāgatamivāntakam ॥ 12 ॥
yathā kramē śapasi varaṃ mama dadāsi cha ।
tachChṛṇvantu trayastriṃśaddēvāssāgnipurōgamāḥ ॥ 13 ॥
chandrādityau nabhaśchaiva grahā rātryahanī diśaḥ ।
jagachcha pṛthivī chēyaṃ sagandharvā sarākṣasā ॥ 14 ॥
niśācharāṇi bhūtāni gṛhēṣu gṛhadēvatā ।
yāni chānyāni bhūtāni jānīyurbhāṣitaṃ tava ॥ 15 ॥
satyasandhō mahātējāḥ dharmajñaḥ susamāhitaḥ ।
varaṃ mama dadātyēṣa tanmē śrṛṇvantu daivatāḥ ॥ 16 ॥
iti dēvī mahēṣvāsaṃ parigṛhyābhiśasya cha ।
tataḥ paramuvāchēdaṃ varadaṃ kāmamōhitam ॥ 17 ॥
smara rājan purāvṛttaṃ tasmin daivāsurē raṇē ।
tatra chāchyāvayachChatrustava jīvitamantarā ॥ 18 ॥
tatra chāpi mayā dēva yattvaṃ samabhirakṣitaḥ ।
jāgratyā yatamānāyāstatō mē prādadā varau ॥ 19 ॥
tau tu dattau varau dēva nikṣēpau mṛgayāmyaham ।
tathaiva pṛthivīpāla sakāśē satyasaṅgara ॥ 20 ॥
tat pratiśrutya dharmēṇa na chēddāsyasi mē varam ।
adyaiva hi prahāsyāmi jīvitaṃ tvadvimānitā ॥ 21 ॥
vāṅmātrēṇa tadā rājā kaikēyyā svavaśē kṛtaḥ ।
prachaskanda vināśāya pāśaṃ mṛga ivātmanaḥ ॥ 22 ॥
tataḥ paramuvāchēdaṃ varadaṃ kāmamōhitam ।
varau yau mē tvayā dēva tadā dattau mahīpatē ॥ 23 ॥
tau tāvadahamadyaiva vakṣyāmi śṛṇu mē vachaḥ ।
abhiṣēkasamārambhō rāghavasyōpakalpitaḥ ॥ 24 ॥
anēnaivābhiṣēkēṇa bharatō mē'bhiṣichyatām ।
yō dvitīyō varō dēva dattaḥ prītēna mē tvayā ॥ 25 ॥
tadā daivāsurē yuddhē tasya kālō'yamāgata ।
nava pañcha cha varṣāṇi daṇḍakāraṇyamāśritaḥ ॥ 26 ॥
chīrājinajaṭādhārī rāmō bhavatu tāpasaḥ ।
bharatō bhajatāmadya yauvarājyamakaṇṭakam ॥ 27 ॥
ēṣa mē paramaḥ kāmō dattamēva varaṃ vṛṇē ।
adya chaiva hi paśyēyaṃ prayāntaṃ rāghavaṃ vanam ॥ 28 ॥
sa rājarājaḥ bhava satyasaṅgaraḥ kulaṃ cha śīlaṃ cha hi rakṣa janma cha ।
paratravāsē hi vadantyanuttamaṃ tapōdhanāssatyavachō hitaṃ nṛṇām ॥ 29 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē ēkādaśassargaḥ ॥
