શ્રીમદ્વાલ્મીકીય રામાયણે અયોધ્યાકાંડમ્ ।
અથ એકાદશસ્સર્ગઃ ।
તં મન્મથશરૈર્વિદ્ધમં કામવેગવશાનુગમ્ ।
ઉવાચ પૃથિવીપાલં કૈકેયી દારુણં વચઃ ॥ 1 ॥
નાસ્મિ વિપ્રકૃતાદેવ કેનચિન્નાવમાનિતા ।
અભિપ્રાયસ્તુ મે કશ્ચિત્તમિચ્છામિ ત્વયા કૃતમ્ ॥ 2 ॥
પ્રતિજ્ઞાં પ્રતિજાનીષ્વ યદિ ત્વં કર્તુમિચ્છસિ ।
અથ તદ્વ્યાહરિષ્યામિ યદભિપ્રાર્થિતં મયા ॥ 3 ॥
તામુવાચ મહાતેજાઃ કૈકેયીમીષદુત્સ્મિતઃ ।
કામી હસ્તેન સંગૃહ્ય મૂર્ધજેષુ શુચિસ્મિતામ્ ॥ 4 ॥
આવલિપ્તે ન જાનાસિ ત્વત્તઃ પ્રિયતરો મમ ।
મનુજો મનુજવ્યાઘ્રાદ્રામાદન્યો ન વિદ્યતે ॥ 5 ॥
તેનાજય્યેન મુખ્યેન રાઘવેણ મહાત્મના ।
શપે તે જીવનાર્હેણ બ્રૂહિ યન્મનસેચ્છાસિ ॥ 6 ॥
યં મુહૂર્તમપશ્યંસ્તુ ન જીવેયમહં ધ્રુવમ્ ।
તેન રામેણ કૈકેયિ શપે તે વચનક્રિયામ્ ॥ 7 ॥
આત્મના વાત્મજૈશ્ચાન્યૈર્વૃણેયં મનુજર્ષભમ્ ।
તેન રામેણ કૈકેયિ શપે તે વચનક્રિયામ્ ॥ 8 ॥
ભદ્રે હૃદયમપ્યેતદનુમૃશોદ્ધરસ્વ મે ।
એતત્સમીક્ષ્ય કૈકેયિ બ્રૂહિ યત્સાધુ મન્યસે ॥ 9 ॥
બલમાત્મનિ જાનંતી ન માં શંકિતુમર્હસિ ।
કરિષ્યામિ તવ પ્રીતિં સુકૃતેનાપિ તે શપે ॥ 10 ॥
સા તદર્થમના દેવી તમભિપ્રાયમાગતમ્ ।
નિર્માધ્યસ્થ્યાચ્ચ હર્ષાચ્ચ બભાષે દુર્વચં વચઃ ॥ 11 ॥
તેન વાક્યેન સંહૃષ્ટા તમભિપ્રાયમાગતમ્ ।
વ્યાજહાર મહાઘોરમભ્યાગતમિવાંતકમ્ ॥ 12 ॥
યથા ક્રમે શપસિ વરં મમ દદાસિ ચ ।
તચ્છૃણ્વંતુ ત્રયસ્ત્રિંશદ્દેવાસ્સાગ્નિપુરોગમાઃ ॥ 13 ॥
ચંદ્રાદિત્યૌ નભશ્ચૈવ ગ્રહા રાત્ર્યહની દિશઃ ।
જગચ્ચ પૃથિવી ચેયં સગંધર્વા સરાક્ષસા ॥ 14 ॥
નિશાચરાણિ ભૂતાનિ ગૃહેષુ ગૃહદેવતા ।
યાનિ ચાન્યાનિ ભૂતાનિ જાનીયુર્ભાષિતં તવ ॥ 15 ॥
સત્યસંધો મહાતેજાઃ ધર્મજ્ઞઃ સુસમાહિતઃ ।
વરં મમ દદાત્યેષ તન્મે શ્રૃણ્વંતુ દૈવતાઃ ॥ 16 ॥
ઇતિ દેવી મહેષ્વાસં પરિગૃહ્યાભિશસ્ય ચ ।
તતઃ પરમુવાચેદં વરદં કામમોહિતમ્ ॥ 17 ॥
સ્મર રાજન્ પુરાવૃત્તં તસ્મિન્ દૈવાસુરે રણે ।
તત્ર ચાચ્યાવયચ્છત્રુસ્તવ જીવિતમંતરા ॥ 18 ॥
તત્ર ચાપિ મયા દેવ યત્ત્વં સમભિરક્ષિતઃ ।
જાગ્રત્યા યતમાનાયાસ્તતો મે પ્રાદદા વરૌ ॥ 19 ॥
તૌ તુ દત્તૌ વરૌ દેવ નિક્ષેપૌ મૃગયામ્યહમ્ ।
તથૈવ પૃથિવીપાલ સકાશે સત્યસંગર ॥ 20 ॥
તત્ પ્રતિશ્રુત્ય ધર્મેણ ન ચેદ્દાસ્યસિ મે વરમ્ ।
અદ્યૈવ હિ પ્રહાસ્યામિ જીવિતં ત્વદ્વિમાનિતા ॥ 21 ॥
વાઙ્માત્રેણ તદા રાજા કૈકેય્યા સ્વવશે કૃતઃ ।
પ્રચસ્કંદ વિનાશાય પાશં મૃગ ઇવાત્મનઃ ॥ 22 ॥
તતઃ પરમુવાચેદં વરદં કામમોહિતમ્ ।
વરૌ યૌ મે ત્વયા દેવ તદા દત્તૌ મહીપતે ॥ 23 ॥
તૌ તાવદહમદ્યૈવ વક્ષ્યામિ શૃણુ મે વચઃ ।
અભિષેકસમારંભો રાઘવસ્યોપકલ્પિતઃ ॥ 24 ॥
અનેનૈવાભિષેકેણ ભરતો મેઽભિષિચ્યતામ્ ।
યો દ્વિતીયો વરો દેવ દત્તઃ પ્રીતેન મે ત્વયા ॥ 25 ॥
તદા દૈવાસુરે યુદ્ધે તસ્ય કાલોઽયમાગત ।
નવ પંચ ચ વર્ષાણિ દંડકારણ્યમાશ્રિતઃ ॥ 26 ॥
ચીરાજિનજટાધારી રામો ભવતુ તાપસઃ ।
ભરતો ભજતામદ્ય યૌવરાજ્યમકંટકમ્ ॥ 27 ॥
એષ મે પરમઃ કામો દત્તમેવ વરં વૃણે ।
અદ્ય ચૈવ હિ પશ્યેયં પ્રયાંતં રાઘવં વનમ્ ॥ 28 ॥
સ રાજરાજઃ ભવ સત્યસંગરઃ કુલં ચ શીલં ચ હિ રક્ષ જન્મ ચ ।
પરત્રવાસે હિ વદંત્યનુત્તમં તપોધનાસ્સત્યવચો હિતં નૃણામ્ ॥ 29 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અયોધ્યાકાંડે એકાદશસ્સર્ગઃ ॥
