ශ්රීමද්වාල්මීකීය රාමායණේ අයෝධ්යාකාංඩම් ।
අථ ෂෝඩශාධිකශතතමස්සර්ගඃ ।
ප්රතිප්රයාතේ භරතේ වසන්රාමස්තපෝවනේ ।
ලක්ෂයාමාස සෝද්වේගමථෞත්සුක්යං තපස්විනාම් ॥ 1 ॥
යේ තත්ර චිත්රකූටස්ය පුරස්තාත්තාපසාශ්රමේ ।
රාමමාශ්රිත්ය නිරතාස්තානලක්ෂයදුත්සුකාන් ॥ 2 ॥
නයනෛර්බ්රුකුටීභිශ්ච රාමං නිර්දිශ්ය ශංකිතාඃ ।
අන්යෝන්යමුපජල්පංත ශ්ශනෛශ්චක්රුර්මිථඃ කථාඃ ॥ 3 ॥
තේෂාමෞත්සුක්යමාලක්ෂ්ය රාමස්ත්වාත්මනි ශංකිතඃ ।
කෘතාංජලිරුවාචේදමෘෂිං කුලපතිං තතඃ ॥ 4 ॥
න කච්චිද්භගවන්කිංචිත්පූර්වවෘත්තමිදං මයි ।
දෘශ්යතේ විකෘතං යේන වික්රියංතේ තපස්විනඃ ॥ 5 ॥
ප්රමාදාච්චරිතං කච්චිත්කිංචින්නාවරජස්ය මේ ।
ලක්ෂ්මණස්යර්ෂිභිදෘෂ්ටං නානුරූපමිවාත්මනඃ ॥ 6 ॥
කච්චිච්ඡුශ්රූෂමාණා ව ශ්ශුශ්රූෂණපරා මයි ।
ප්රමදාऽභ්යුචිතාං වෘත්තිං සීතා යුක්තං න වර්තතේ ॥ 7 ॥
අථර්ෂිර්ජරයා වෘද්ධස්තපසා ච ජරාං ගතඃ ।
වේපමාන ඉවෝවාච රාමං භූතදයාපරම් ॥ 8 ॥
කුතඃ කල්යාණසත්ත්වායාඃ කල්යාණාභිරතේස්තථා ।
චලනං තාත වෛදේහ්යාස්තපස්විෂු විශේෂතඃ ॥ 9 ॥
ත්වන්නිමිත්තමිදං තාවත්තාපසාන්ප්රතිවර්තතේ ।
රක්ෂෝභ්යස්තේන සංවිග්නාඃ කථයංති මිථඃ කථාඃ ॥ 10 ॥
රාවණාවරජඃ කශ්චිත් ඛරෝ නාමේහ රාක්ෂසඃ ।
උත්පාට්ය තාපසාන්සර්වාංජනස්ථානනිකේතනාන් ॥ 11 ॥
ධෘෂ්ටශ්ච ජිතකාශී ච නෘශංසඃ පුරුෂාදකඃ ।
අවලිප්තශ්ච පාපශ්ච ත්වාං ච තාත න මෘෂ්යතේ ॥ 12 ॥
ත්වං යදාප්රභෘති හ්යස්මින්නාශ්රමේ තාත වර්තසේ ।
තදාප්රභෘති රක්ෂාංසි විප්රකුර්වංති තාපසාන් ॥ 13 ॥
දර්ශයංති හි බීභත්සෛඃ ක්රූරෛර්භීෂණකෛරපි ।
නානාරූපෛර්විරූපෛශ්ච රූපෛර්විකෘතදර්ශනෛඃ ॥ 14 ॥
අප්රශස්තෛශුචිභිස්සංප්රයෝජ්ය ච තාපසාන් ।
ප්රතිධ්නංත්යපරාන්ක්ෂිප්රමනාර්යාඃ පුරතඃ ස්ථිතාඃ ॥ 15 ॥
තේෂු තේෂ්වාශ්රමස්ථානේෂ්වබුද්ධමවලීය ච ।
රමංතේ තාපසාං ස්තත්ර නාශයංතෝऽල්පචේතසඃ ॥ 16 ॥
අපක්ෂිපංති ස්රුග්භාංඩානග්නීස්නිංචංති වාරිණා ।
කලශාංශ්ච ප්රමධ්නංති හවනේ සමුපස්ථිතේ ॥ 17 ॥
තෛර්දුරාත්මභිරාමෘෂ්ටානාශ්රමාන්ප්රජිහාසවඃ ।
ගමනායාන්යදේශස්ය චෝදයංත්යෘෂයෝऽද්ය මාම් ॥ 18 ॥
තත්පුරා රාම ශාරීරාමුපහිංසාං තපස්විෂු ।
දර්ශයංති හි දුෂ්ටාස්තේ ත්යක්ෂ්යාම ඉමමාශ්රමම් ॥ 19 ॥
බහුමූලඵලං චිත්රමවිදූරාදිතෝ වනම් ।
පුරාණාශ්රමමේවාහං ශ්රයිෂ්යේ සගණඃ පුනඃ ॥ 20 ॥
ඛරස්ත්වය්යපි චායුක්තං පුරා තාත ප්රවර්තතේ ।
සහාස්මාභිරිතෝ ගච්ඡ යදි බුද්ධිඃ ප්රවර්තතේ ॥ 21 ॥
සකලත්රස්ය සංදේහෝ නිත්යං යත්තස්ය රාඝව ।
සමර්ථස්යාපි හි සතෝ වාසෝ දුඃඛමිහාද්ය තේ ॥ 22 ॥
ඉත්යුක්තවංතං ස්තංරාම රාජපුත්රස්තපස්විනම් ।
න ශශාකෝත්තරෛර්වාක්යෛරවරෝද්ධුං සමුත්සුකම් ॥ 23 ॥
අභිනංද්ය සමාපෘච්ඡ්ය සමාධාය ච රාඝවම් ।
ස ජගාමාශ්රමං ත්යක්ත්වා කුලෛඃ කුලපතිස්සහ ॥ 24 ॥
රාමඃ සංසාද්ය ඍෂිගණමනුගමනාද්දේශාත්තස්මාත්කුලපතිමභිවාද්ය ඍෂිම් ।
සම්යක්ප්රීතෛස්තෛරනුමත උපදිෂ්ටාර්ථඃ පුණ්යං වාසාය ස්වනිලයමුපසංපේදේ ॥ 25 ॥
ආශ්රමමෘෂිවිරහිතං ප්රභුඃ ක්ෂණමපින ජහෞ ස රාඝවඃ ।
රාඝවං හි සතතමනුගතා ස්තාපසාශ්චාර්ෂචරිත ධෘතගුණාඃ ॥ 26 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ෂෝඩශාධිකශතතමස්සර්ගඃ ॥
