শ্রীমদ্বাল্মীকীয় রামাযণে অয়োধ্য়াকাংডম্ ।
অথ অষ্টাদশস্সর্গঃ ।
স দদর্শাসনে রামো নিষণ্ণং পিতরং শুভে ।
কৈকেয়ীসহিতং দীনং মুখেন পরিশুষ্যতা ॥ 1 ॥
স পিতুশ্চরণৌ পূর্বমভিবাদ্য় বিনীতবত্ ।
ততো ববংদে চরণৌ কৈকেয়্য়া স্সুসমাহিতঃ ॥ 2 ॥
রামেত্য়ুক্ত্বা তু বচনং বাষ্পপর্য়াকুলেক্ষণঃ ।
শশাক নৃপতির্দীনো নেক্ষিতুং নাভিভাষিতুম্ ॥ 3 ॥
তদপূর্বং নরপতের্দৃষ্ট্বা রূপং ভয়াবহম্ ।
রামোঽপি ভযমাপন্নঃ পদা স্পৃষ্ট্বেব পন্নগম্ ॥ 4 ॥
ইংদ্রিয়ৈরপ্রহৃষ্টৈস্তং শোকসংতাপকর্শিতম্ ।
নিশ্শ্বসংতং মহারাজং ব্যথিতাকুলচেতসম্ ॥ 5 ॥
ঊর্মিমালিনমক্ষোভ্য়ং ক্ষুভ্য়ংতমিব সাগরম্ ।
উপপ্লুতমিবাদিত্যমুক্তানৃতমৃষিং যথা ॥ 6 ॥
অচিংত্যকল্পং হি পিতুস্তং শোকমুপধারযন্ ।
বভূব সংরব্ধতর স্সমুদ্র ইব পর্বণি ॥ 7 ॥
চিংতয়ামাস চ তদা রামঃ পিতৃহিতে রতঃ ।
কিং স্বিদদ্য়ৈব নৃপতির্ন মাং প্রত্যভিনংদতি ॥ 8 ॥
অন্যদা মাং পিতা দৃষ্ট্বা কুপিতোঽপি প্রসীদতি ।
তস্য় মামদ্য় সংপ্রেক্ষ্য় কিমায়াসঃ প্রবর্ততে ॥ 9 ॥
স দীন ইব শোকার্তো বিষণ্ণবদনদ্য়ুতিঃ ।
কৈকেয়ীমভিবাদ্য়ৈব রামো বচনমব্রবীত্ ॥ 10 ॥
কচ্চিন্ময়া নাপরাদ্ধমজ্ঞানাদ্য়েন মে পিতা ।
কুপিতস্তন্মমাচক্ষ্ব ত্বং চৈবৈনং প্রসাদয় ॥ 11 ॥
অপ্রসন্নমনাঃ কিন্নু সদা মাং প্রতি বত্সলঃ ।
বিবর্ণবদনো দীনো ন হি মামভিভাষতে ॥ 12 ॥
শরীরো মানসো বাপি কচ্চিদেনং ন বাধতে ।
সংতাপোবাঽভিতাপো বা দুর্লভং হি সদা সুখম্ ॥ 13 ॥
কচ্চিন্ন কিংচিদ্ভরতে কুমারে প্রিযদর্শনে ।
শত্রুঘ্নে বা মহাসত্ত্বে মাত্রূণাং বা মমাশুভম্ ॥ 14 ॥
অতোষযন্মহারাজমকুর্বন্বা পিতুর্বচঃ ।
মুহূর্তমপি নেচ্ছেয়ং জীবিতুং কুপিতে নৃপে ॥ 15 ॥
যতোমূলং নরঃ পশ্য়েত্প্রাদুর্ভাবমিহাত্মনঃ ।
কথং তস্মিন্নবর্তেত প্রত্যক্ষে সতি দৈবতে ॥ 16 ॥
কচ্চিত্তে পরুষং কিংচিদভিমানাত্পতিতা মম ।
উক্তো ভবত্য়া কোপেন যত্রাস্য় লুলিতং মনঃ ॥ 17 ॥
এতদাচক্ষ্ব মে দেবি তত্ত্বেন পরিপৃচ্ছতঃ ।
কিং নিমিত্তমপূর্বোয়ং বিকারো মনুজাধিপে ॥ 18 ॥
এবমুক্তা তু কৈকেয়ী রাঘবেণ মহাত্মনা ।
উবাচেদং সুনির্লজ্জা ধৃষ্টমাত্মহিতং বচঃ ॥ 19 ॥
ন রাজা কুপিতো রাম ব্যসনং নাস্য় কিংচন ।
কিংচিন্মনোগতংত্বস্য় ত্বদ্ভয়ান্নাভিভাষতে ॥ 20 ॥
প্রিয়ং ত্বামপ্রিয়ং বক্তুং বাণী নাস্য়োপবর্ততে ।
তদবশ্য়ং ত্বয়া কার্য়ং যদনেনাশ্রুতং মম ॥ 21 ॥
এষ মহ্য়ং বরং দত্ত্বা পুরা মামভিপূজ্য় চ ।
স পশ্চাত্তপ্যতে রাজা যথাঽন্য়ঃ প্রাকৃতস্তথা ॥ 22 ॥
অতিসৃজ্য় দদানীতি বরং মম বিশাংপতিঃ ।
স নিরর্থং গতজলে সেতুং বংধিতুমিচ্ছতি ॥ 23 ॥
ধর্মমূলমিদং রাম বিদিতং চ সতামপি ।
তত্সত্য়ং ন ত্যজেদ্রাজা কুপিতস্ত্বত্কৃতে যথা ॥ 24 ॥
যদি তদ্বক্ষ্যতে রাজা শুভং বা যদি বাঽশুভম্ ।
করিষ্যসি ততস্সর্বমাখ্য়াস্য়ামি পুনস্ত্বহম্ ॥ 25 ॥
যদি ত্বভিহিতং রাজ্ঞা ত্বয়ি তন্ন বিপত্স্যতে ।
ততোঽহমভিধাস্য়ামি ন হ্য়েষ ত্বয়ি বক্ষ্যতি ॥ 26 ॥
এতত্তু বচনং শ্রুত্বা কৈকেয়্য়া সমুদাহৃতম্ ।
উবাচ ব্যথিতো রামস্তাং দেবীং নৃপসন্নিধৌ ॥ 27 ॥
অহো ধিঙ্নার্হসে দেবি বক্তুং মামীদৃশং বচঃ ।
অহং হি বচনাদ্রাজ্ঞঃ পতেযমপি পাবকে ॥ 28 ॥
ভক্ষয়েয়ং বিষং তীক্ষ্ণং মজ্জেযমপি চার্ণবে ।
নিয়ুক্তো গুরুণা পিত্রা নৃপেণ চ হিতেন চ ॥ 29 ॥
তদ্ব্রূহি বচনং দেবি রাজ্ঞো যদভিকাংক্ষিতম্ ।
করিষ্য়ে প্রতিজানে চ রামো দ্বির্নাভিভাষতে ॥ 30 ॥
তমার্জবসমায়ুক্তমনার্য়া সত্যবাদিনম্ ।
উবাচ রামং কৈকেয়ী বচনং ভৃশদারুণম্ ॥ 31 ॥
পুরা দৈবাসুরে যুদ্ধে পিত্রা তে মম রাঘব ।
রক্ষিতেন বরৌ দত্তৌ সশল্য়েন মহারণে ॥ 32 ॥
তত্র মে যাচিতো রাজা ভরতস্য়াভিষেচনম্ ।
গমনং দংডকারণ্য়ে তব চাদ্য়ৈব রাঘব ॥ 33 ॥
যদি সত্যপ্রতিজ্ঞং ত্বং পিতরং কর্তুমিচ্ছসি ।
আত্মানং চ নরশ্রেষ্ঠ মম বাক্যমিদং শৃণু ॥ 34 ॥
সন্নিদেশে পিতুস্তিষ্ঠ যথা তেন প্রতিশ্রুতম্ ।
ত্বয়াঽরণ্য়ং প্রবেষ্টব্য়ং নব বর্ষাণি পংচ চ ॥ 35 ॥
ভরতস্ত্বভিষিচ্য়েত যদেতদভিষেচনম্ ।
ত্বদর্থে বিহিতং রাজ্ঞা তেন সর্বেণ রাঘব ॥ 36 ॥
সপ্ত সপ্ত চ বর্ষাণি দংডকারণ্যমাশ্রিতঃ ।
অভিষেকমিমং ত্যক্ত্বা জটাজিনধরো বস ॥ 37 ॥
ভরতঃ কোসলপুরে প্রশাস্তু বসুধামিমাম্ ।
নানারত্ন সমাকীর্ণাং সবাজিরথকুংজরাম্ ॥ 38 ॥
এতেন ত্বাং নরেংদ্রোঽয়ং কারুণ্য়েন সমাপ্লুতঃ ।
শোকসংক্লিষ্ট বদনো ন শক্নোতি নিরীক্ষিতুম্ ॥ 39 ॥
এতত্কুরু নরেংদ্রস্য় বচনং রঘুনংদন ।
সত্য়েন মহতা রাম তারযস্ব নরেশ্বরম্ ॥ 40 ॥
ইতীব তস্য়াং পরুষং বদংত্য়াং ন চৈব রামঃ প্রবিবেশ শোকম্ ।
প্রবিব্যথে চাপি মহানুভাবো রাজা তু পুত্রব্যসনাভিতপ্তঃ ॥ 41 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে অষ্টাদশস্সর্গঃ ॥
