śrīmadvālmīkīya rāmāyaṇē ayōdhyākāṇḍam ।
atha ēkōnatriṃśassargaḥ ।
ētattu vachanaṃ śrutvā sītā rāmasya duḥkhitā ।
prasaktāśrumukhī mandamidaṃ vachanamabravīt ॥ 1 ॥
yē tvayā kīrtitā dōṣā vanē vastavyatāṃ prati ।
guṇānityēva tānviddhi tava snēhapuraskṛtān ॥ 2 ॥
mṛgā ssiṃhā gajāśchaiva śārdūlā śśarabhāstathā ।
pakṣiṇa ssṛmarāśchaiva yē chānyē vanachāriṇaḥ ॥ 3 ॥
adṛṣṭapūrvarūpatvātsarvē tē tava rāghava ।
rūpaṃ dṛṣṭvā'pasarpēyurbhayē sarvē hi bibhyati ॥ 4 ॥
tvayā cha saha gantavyaṃ mayā gurujanājñayā ।
tvadviyōgēna mē rāma tyaktavyamiha jīvitam ॥ 5 ॥
na hi māṃ tvatsamīpasthāmapi śaknōtirāghava ।
surāṇāmīśvara śśakraḥ pradharṣayitumōjasā ॥ 6 ॥
patihīnā tu yā nārī na sā śakṣyati jīvitum ।
kāmamēvaṃ vidhaṃ rāma tvayā mama nidarśitam ॥ 7 ॥
atha chāpi mahāprājña brāhmaṇānāṃ mayā śrutam ।
purā pitṛgṛhē satyaṃ vastavyaṃ kila mē vanē ॥ 8 ॥
lakṣaṇibhyō dvijātibhya śśṛtvā'haṃ vachanaṃ purā ।
vanavāsakṛtōtsāhā nityamēva mahābala ॥ 9 ॥
ādēśō vanavāsasya prāptavya ssa mayā kila ।
sā tvayā saha tatrāhaṃ yāsyāmi priya nānyathā ॥ 10 ॥
kṛtādēśā bhaviṣyāmi gamiṣyāmi saha tvayā ।
kālaśchāyaṃ samutpanna ssatyavāgbhavatu dvijaḥ ॥ 11 ॥
vanavāsē'bhijānāmi duḥkhāni bahuthā kila ।
prāpyantē niyataṃ vīra puruṣairakṛtātmabhiḥ ॥ 12 ॥
kanyayā cha piturgēhē vanavāsa śśṛtō mayā ।
bhikṣiṇyā ssādhuvṛttāyā mama māturihāgrataḥ ॥ 13 ॥
prasāditaścha vai pūrvaṃ tvaṃ mē bahutithaṃ prabhō ।
gamanaṃ vanavāsasya kāṅkṣitaṃ hi saha tvayā ॥ 14 ॥
kṛtakṣaṇā'haṃ bhadraṃ tē gamanaṃ prati rāghava ।
vanavāsasya śūrasya charyā hi mama rōchatē ॥ 15 ॥
śuddhātmanprēmabhāvādhdi bhaviṣyāmi vikalmaṣā ।
bhartāramanugachChantī bhartā hi mama daivatam ॥ 16 ॥
prētyabhāvē hi kalyāṇa ssaṅgamō mē saha tvayā ।
śrutirhi śrūyatē puṇyā brāhmaṇānāṃ yaśasvinām ॥ 17 ॥
ihalōkē cha pitṛbhiryā strī yasya mahāmatē ।
adbhirdattā svadharmēṇa prētyabhāvē'pi tasya sā ॥ 18 ॥
ēvamasmātsvakāṃ nārīṃ suvṛttāṃ hi pativratām ।
nābhirōchayasē nētuṃ tvaṃ māṃ kēnēha hētunā ॥ 19 ॥
bhaktāṃ pativratāṃ dīnāṃ māṃ samāṃ sukhaduḥkhayōḥ ।
nētumarhasi kākutstha samāna sukhaduḥkhinīm ॥ 20 ॥
yayadi māṃ duḥkhitāmēvaṃ vanaṃ nētuṃ na chēchChasi ।
viṣamagniṃ jalaṃ vā'hamāsthāsyē mṛtyukāraṇāt ॥ 21 ॥
ēvaṃ bahuvidhaṃ taṃ sā yāchatē gamanaṃ prati ।
nānumēnē mahābāhustāṃ nētuṃ vijanaṃ vanam ॥ 22 ॥
ēvamuktā tu sā chintāṃ maithilī samupāgatā ।
snāpayantīva gāmuṣṇairaśrubhirnayanachyutaiḥ ॥ 23 ॥
chintayantīṃ tathā tāṃ tu nivartayitumātmavān ।
tāmrōṣṭhīṃ sa tadā sītāṃ kākutsthō bahvasāntvayat ॥ 24 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē ēkōnatriṃśassargaḥ ॥
