ශ්රීමද්වාල්මීකීය රාමායණේ අයෝධ්යාකාංඩම් ।
අථ ඒකචත්වාරිංශස්සර්ගඃ ।
තස්මින්ස්තු පුරුෂව්යාඝ්රේ විනිර්යාති කෘතාංජලෞ ।
ආර්තශබ්දෝऽහි සංජජ්ඤේ ස්ත්රීණාමංතඃපුරේ මහාන් ॥ 1 ॥
අනාථස්ය ජනස්යාස්ය දුර්බලස්ය තපස්විනඃ ।
යෝ ගතිශ්ශරණං චාසීත්ස නාථඃ ක්ව නු ගච්ඡති ॥ 2 ॥
න ක්රුධ්යත්යභිශප්තෝऽපි ක්රෝධනීයානි වර්ජයන් ।
ක්රුද්ධාන්ප්රසාදයන්සර්වාන් සමදුඃඛඃ ක්ව ගජ්ඡති ॥ 3 ॥
කෞශල්යායාං මහාතේජා යථා මාතරි වර්තතේ ।
තථා යෝ වර්තතේऽස්මාසු මහාත්මා ක්ව නු ගච්ඡති ॥ 4 ॥
කෛකේය්යා ක්ලිශ්යමානේන රාජ්ඤා සංචෝදිතෝ වනම් ।
පරිත්රාතා ජනස්යාස්ය ජගතඃ ක්ව නු ගච්ඡති ॥ 5 ॥
අහෝ නිශ්චේතනෝ රාජා ජීවලෝකස්ය සංප්රියම් ।
ධර්ම්යං සත්යව්රතං රාමං වනවාසේ ප්රවත්ස්යති ॥ 6 ॥
ඉති සර්වා මහිෂ්යස්තා විවත්සා ඉව ධේනවඃ ।
රුරුදුශ්චෛව දුඃඛාර්තාඃ සස්වරං ච විචුක්රුශුඃ ॥ 7 ॥
ස තමංතඃ පුරේ ඝෝරමාර්තශබ්දං මහීපතිඃ ।
පුත්රශෝකාභිසංතප්තඃ ශ්රුත්වා චාසීත්සුදුඃඛිතඃ ॥ 8 ॥
නාග්නිහෝත්රාණ්යහූයංත නාපචන් ගෘහමේධිනඃ අකුර්වන්න ප්රජාඃ කාර්යං සූර්යශ්චාංතරධීයත ॥ 9 ॥
ව්යසෘජන් කබලාන්නාගා ගාවෝ වත්සාන්න පායයන් ।
පුත්රං ප්රථමජං ලබ්ධ්වා ජනනී නාභ්යනංදත ॥ 10 ॥
ත්රිශංකුර්ලෝහිතාංගශ්ච බෘහස්පතිබුධාවපි ।
දාරුණා ස්සෝමමභ්යේත්ය ග්රහාස්සර්වේ ව්යවස්ථිතාඃ ॥ 11 ॥
නක්ෂත්රාණි ගතාර්චීංෂි ග්රහාශ්ච ගතතේජසඃ ।
විශාඛාස්තු සධූමාශ්ච නභසි ප්රචකාශිරේ ॥ 12 ॥
කාලිකානිලවේගේන මහෝදධිරිවෝත්ථිතඃ ।
රාමේ වනං ප්රව්රජිතේ නගරං ප්රචචාල තත් ॥ 13 ॥
දිශඃ පර්යාකුලාස්සර්වා ස්තිමිරේණේව සංවෘතාඃ ।
න ග්රහෝ නාපි නක්ෂත්රං ප්රචකාශේ නකිංචන ॥ 14 ॥
අකස්මාන්නාගරස්සර්වෝ ජනෝ දෛන්යමුපාගමත් ।
ආහාරේ වා විහාරේ වා න කශ්චිදකරෝන්මනඃ ॥ 15 ॥
ශෝකපර්යායසංතප්ත ස්සතතං දීර්ඝමුච්ඡවසන් ।
අයෝධ්යායාං ජනස්සර්ව ශ්ශුශෝච ජගතීපතිම් ॥ 16 ॥
බාෂ්පපර්යාකුලමුඛෝ රාජමාර්ගගතෝ ජනඃ ।
න හෘෂ්ටෝ ලක්ෂ්යතේ කශ්චිත්සර්ව ශ්ශෝකපරායණඃ ॥ 17 ॥
න වාති පවන ශ්ශීතෝ න ශශී සෞම්යදර්ශනඃ ।
න සූර්යස්තපතේ ලෝකං සර්වං පර්යාකුලං ජගත් ॥ 18 ॥
අනර්ථිනස්සුතාඃ ස්ත්රීණාං භර්තාරෝ භ්රාතරස්තථා ।
සර්වේ සර්වං පරිත්යජ්ය රාමමේවාන්වචිංතයන් ॥ 19 ॥
යේ තු රාමස්ය සුහෘද ස්සර්වේ තේ මූඪචේතසඃ ।
ශෝකභාරේණ චාක්රාංතා ශ්ශයනං න ජහුස්තදා ॥ 20 ॥
තතස්ත්වයෝධ්යා රහිතා මහාත්මනා පුරංදරේණේව මහී සපර්වතා ।
චචාල ඝෝරං භයශෝකපීඩිතා සනාගයෝධාශ්වගණා නනාද ච ॥ 21 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ඒකචත්වාරිංශස්සර්ගඃ ॥
