ශ්රීමද්වාල්මීකීය රාමායණේ අයෝධ්යාකාංඩම් ।
අථ ත්රිචත්වාරිංශස්සර්ගඃ ।
තතඃ සමීක්ෂ්ය ශයනේ සන්නං ශෝකේන පාර්ථිවම් ।
කෞශල්යා පුත්රශෝකාර්තා තමුවාච මහීපතිම් ॥ 1 ॥
රාඝවේ නරශාර්දූලේ විෂමුප්ත්වාහිජිහ්මගා ।
විචරිෂ්යති කෛකේයී නිර්මුක්තේව හි පන්නගී ॥ 2 ॥
විවාස්ය රාමං සුභගා ලබ්ධකාමා සමාහිතා ।
ත්රාසයිෂ්යති මාං භූයෝ දුෂ්ටාහිරිව වේශ්මනි ॥ 3 ॥
අථ ස්ම නගරේ රාමශ්චරන් භෛක්ෂං ගෘහේ වසේත් ।
කාමකාරෝ වරං දාතුමපි දාසං මමාත්මජම් ॥ 4 ॥
පාතයිත්වා තු කෛකේය්යා රාමං ස්ථානාද්යථේෂ්ටතඃ ।
ප්රදිෂ්ටෝ රක්ෂසාං භාගඃ පර්වණීවාහිතාග්නිනා ॥ 5 ॥
ගජරාජගතිර්වීරෝ මහාබාහුර්ධනුර්ධරඃ ।
වනමාවිශතේ නූනං සභාර්ය ස්සහ ලක්ෂ්මණඃ ॥ 6 ॥
වනේ ත්වදෘෂ්ටදුඃඛානාං කේකය්යානුමතේ ත්වයා ।
ත්යක්තානාං වනවාසාය කාන්වවස්ථා භවිෂ්යති ॥ 7 ॥
තේ රත්නහීනාස්තරුණාඃ ඵලකාලේ විවාසිතාඃ ।
කථං වත්ස්යංති කෘපණාඃ ඵලමූලෛඃ කෘතාශනාඃ ॥ 8 ॥
අපීදානීං ස කාලස්ස්යාන්මම ශෝකක්ෂය ශ්ශිවඃ ।
සභාර්යං යත්සහ භ්රාත්රා පශ්යේයමිහ රාඝවම් ॥ 9 ॥
ශ්රෘත්වෛවෝපස්ථිතෞ වීරෞ කදායෝධ්යා භවිෂ්යති ।
යශස්විනී හෘෂ්ටජනා සූච්ඡ්රිතධ්වජමාලිනී ॥ 10 ॥
කදා ප්රේක්ෂ්ය නරව්යාඝ්රාවරණ්යාත්පුනරාගතෞ ।
නංදිෂ්යති පුරී හෘෂ්ටා සමුද්ර ඉව පර්වණි ॥ 11 ॥
කදාऽයෝධ්යාං මහාබාහුඃ පුරීං වීරඃ ප්රවේක්ෂ්යති ।
පුරස්කෘත්ය රථේ සීතාං වෘෂභෝ ගෝවධූමිව ॥ 12 ॥
කදා ප්රාණිසහස්රාණි රාජමාර්ගේ මමාත්මජෞ ।
ලාජෛරවකිරිෂ්යංති ප්රවිශංතාවරිංදමෞ ॥ 13 ॥
ප්රවිශංතෞ කදාऽයෝධ්යාං ද්රක්ෂ්යාමි ශුභකුංඩලෞ ।
උදග්රායුධනිස්ත්රිංශෞ සශ්රෘංගාවිව පර්වතෞ ॥ 14 ॥
කදාසුමනසඃ කන්යාද්විජාතීනාං ඵලානි ච ।
ප්රදිශංතඃ පුරීං හෘෂ්ටාඃ කරිෂ්යංති ප්රදක්ෂිණම් ॥ 15 ॥
කදා පරිණතෝ බුද්ධ්යා වයසා චාමරප්රභඃ ।
අභ්යුපෛෂ්යති ධර්මජ්ඤස්ත්රිවර්ෂ ඉව මාං ලලන් ॥ 16 ॥
නිස්සංශයං මයා මන්යේ පුරා වීර කදර්යයා ।
පාතුකාමේෂු වත්සේෂු මාතෘණාං ශාතිතාස්ස්තනාඃ ॥ 17 ॥
සාහං ගෞරිව සිංහේන විවත්සා වත්සලා කෘතා ।
කෛකේය්යා පුරුෂව්යාඝ්ර බාලවත්සේව ගෞර්බලාත් ॥ 18 ॥
න හි තාවද්ගුණෛර්ජුෂ්ටං සර්වශාස්ත්රවිශාරදම් ।
ඒකපුත්රා විනා පුත්රමහං ජීවිතුමුත්සහේ ॥ 19 ॥
න හි මේ ජීවිතේ කිංචිත්සාමර්ථ්යමිහ කල්ප්යතේ ।
අපශ්යංත්යාඃ ප්රියං පුත්රං මහාබාහුං මහාබලම් ॥ 20 ॥
අයං හි මාං දීපයතේ සමුත්ථිතඃ තනූජශෝකප්රභවෝ හුතාශනඃ ।
මහීමිමාං රශ්මිභිරුද්ධතප්රභඃ යථා නිදාඝේ භගවාන් දිවාකරඃ ॥ 21 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ත්රිචත්වාරිංශස්සර්ගඃ ॥
