ශ්රීමද්වාල්මීකීය රාමායණේ අයෝධ්යාකාංඩම් ।
අථ අෂ්ටසප්තතිතමස්සර්ගඃ ।
අථ යාත්රාං සමීහංතං ශත්රුඝ්නෝ ලක්ෂ්මණානුජඃ ।
භරතං ශෝකසංතප්තමිදං වචනමබ්රවීත් ॥ 1 ॥
ගතිර්ය ස්සර්වභූතානාං දුඃඛේ කිං පුනරාත්මනඃ ।
ස රාම ස්සත්ත්වසංපන්නඃ ස්ත්රියා ප්රව්රාජිතෝ වනම් ॥ 2 ॥
බලවාන්වීර්යසංපන්නෝ ලක්ෂ්මණෝ නාම යෝऽප්යසෞ ।
කිං න මෝචයතේ රාමං කෘත්වා ස්ම පිතෘනිග්රහම් ॥ 3 ॥
පූර්වමේව තු නිග්රාහ්ය ස්සමවේක්ෂ්ය නයානයෞ ।
උත්පථං යස්සමාරූඪෝ රාජා නාර්යා වශං ගතඃ ॥ 4 ॥
ඉති සංභාෂමාණේ තු ශත්රුඝ්නේ ලක්ෂ්මණානුජේ ।
ප්රාග්ද්වාරේऽභූත්තදා කුබ්ජා සර්වාභරණභූෂිතා ॥ 5 ॥
ලිප්තා චංදනසාරේණ රාජවස්ත්රාණි බිභ්රතී ।
විවිධං විවිධෛ ස්තෛස්තෛර්භූෂණෛශ්ච විභූෂිතා ॥ 6 ॥
මේඛලාදාමභිශ්චිත්රෛරන්යෛශ්ච ශුභභූෂණෛඃ ।
බභාසේ බහුභිර්බද්ධා රජ්ජුබද්ධේව වානරී ॥ 7 ॥
තාං සමීක්ෂ්ය තදා ද්වාස්ස්ථාස්සුභෘශං පාපකාරිණීම් ।
ගෘහීත්වාऽකරුණාං කුබ්ජාං ශත්රුඝ්නාය න්යවේදයන් ॥ 8 ॥
යස්යාඃ කෘතේ වනේ රාමෝ න්යස්තදේහශ්ච වඃ පිතා ।
සේයං පාපා නෘශංසා ච තස්යාඃ කුරු යථාමති ॥ 9 ॥
ශත්රුඝ්නශ්ච තදාජ්ඤාය වචනං භෘශදුඃඛිතඃ ।
අංතඃපුරචරාන්සර්වානිත්යුවාච ධෘත ව්රතඃ ॥ 10 ॥
තීව්රමුත්පාදිතං දුඃඛං භ්රාත්රූණාං මේ තථා පිතුඃ ।
යයා සේයං නෘශංසස්ය කර්මණඃ ඵලමශ්නුතාම් ॥ 11 ॥
ඒවමුක්ත්වා තු තේනාශු සඛීජනසමාවෘතා ।
ගෘහීතා බලවත්කුබ්ජා සා තද්ගෘහමනාදයත් ॥ 12 ॥
තත ස්සුභෘශසංතප්තස්තස්යා ස්සර්ව ස්සඛීජනඃ ।
ක්රුද්ධමාජ්ඤාය ශත්රුඝ්නං විපලායත සර්වශඃ ॥ 13 ॥
ආමංත්රයත කෘත්ස්න ශ්ච තස්යා ස්සර්ව ස්සඛීජනඃ ।
යථාऽයං සමුපක්රාංතෝ නිශ්ශේෂාං නඃ කරිෂ්යති ॥ 14 ॥
සානුක්රෝශාං වදාන්යාං ච ධර්මජ්ඤාං ච යශස්විනීම් ।
කෞසල්යාං ශරණං යාම සා හි නෝऽස්තු ධ්රුවා ගතිඃ ॥ 15 ॥
ස ච රෝෂේණ තාම්රාක්ෂ ශ්ශත්රුඝ්න ශ්ශත්රුතාපනඃ ।
විචකර්ෂ තදා කුබ්ජාං ක්රෝශංතීං ධරණීතලේ ॥ 16 ॥
තස්යා හ්යාකෘෂ්යමාණායා මංථරායා ස්තතස්තතඃ ।
චිත්රං බහුවිධං භාංඩං පෘථිව්යාං තද්ව්යශීර්යත ॥ 17 ॥
තේන භාංඩේන සංස්තීර්ණං ශ්රීමද්රාජනිවේශනම් ।
අශෝභත තදා භූයඃ ශාරදං ගගනං යථා ॥ 18 ॥
ස බලී බලවත්ක්රෝධාද්ගෘහීත්වා පුරුෂර්ෂභඃ ।
කෛකේයීමභිනිර්භර්ත්ස්ය බභාෂේ පරුෂං වචඃ ॥ 19 ॥
තෛර්වාක්යෛඃ පරුෂෛර්දුඃඛෛඃ කෛකේයී භෘශදුඃඛිතා ।
ශත්රුඝ්නභයසංත්රස්තා පුත්රං ශරණමාගතා ॥ 20 ॥
තං ප්රේක්ෂ්ය භරතඃ ක්රුද්ධං ශත්රුඝ්නමිදමබ්රවීත් ।
අවධ්යා ස්සර්වභූතානාං ප්රමදාඃ ක්ෂම්යතාමිති ॥ 21 ॥
හන්යාමහමිමාං පාපාං කෛකේයීං දුෂ්ටචාරිණීම් ।
යදි මාං ධාර්මිකෝ රාමෝ නාසූයේන්මාතෘඝාතකම් ॥ 22 ॥
ඉමාමපි හතාං කුබ්ජාං යදි ජානාති රාඝවඃ ।
ත්වාං ච මාං ච හි ධර්මාත්මා නාභිභාෂිෂ්යතේ ධ්රුවම් ॥ 23 ॥
භරතස්ය වචශ්ශ්රුත්වා ශත්රුඝ්නෝ ලක්ෂ්මණානුජඃ ।
න්යවර්තත තතෝ රෝෂාත්තාං මුමෝච ච මංථරාම් ॥ 24 ॥
සා පාදමූලේ කෛකේය්යා මංථරා නිපපාත හ ।
නිශ්ශ්වසංතී සුදුඃඛාර්තා කෘපණං විලලාප ච ॥ 25 ॥
ශත්රුඝ්නවික්ෂේපවිමූඪසංජ්ඤාං සමීක්ෂ්ය කුබ්ජාං භරතස්ය මාතා ।
ශනෛස්සමාශ්වාසයදාර්තරූපාං ක්රෞංචීං විලග්නාමිව වීක්ෂමාණාම් ॥ 26 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ අෂ්ටසප්තතිතමස්සර්ගඃ ॥
