শ্রীমদ্বাল্মীকীয় রামাযণে অয়োধ্য়াকাংডম্ ।
অথ অষ্টসপ্ততিতমস্সর্গঃ ।
অথ যাত্রাং সমীহংতং শত্রুঘ্নো লক্ষ্মণানুজঃ ।
ভরতং শোকসংতপ্তমিদং বচনমব্রবীত্ ॥ 1 ॥
গতির্য় স্সর্বভূতানাং দুঃখে কিং পুনরাত্মনঃ ।
স রাম স্সত্ত্বসংপন্নঃ স্ত্রিয়া প্রব্রাজিতো বনম্ ॥ 2 ॥
বলবান্বীর্যসংপন্নো লক্ষ্মণো নাম যোঽপ্যসৌ ।
কিং ন মোচযতে রামং কৃত্বা স্ম পিতৃনিগ্রহম্ ॥ 3 ॥
পূর্বমেব তু নিগ্রাহ্য় স্সমবেক্ষ্য় নয়ানয়ৌ ।
উত্পথং যস্সমারূঢো রাজা নার্য়া বশং গতঃ ॥ 4 ॥
ইতি সংভাষমাণে তু শত্রুঘ্নে লক্ষ্মণানুজে ।
প্রাগ্দ্বারেঽভূত্তদা কুব্জা সর্বাভরণভূষিতা ॥ 5 ॥
লিপ্তা চংদনসারেণ রাজবস্ত্রাণি বিভ্রতী ।
বিবিধং বিবিধৈ স্তৈস্তৈর্ভূষণৈশ্চ বিভূষিতা ॥ 6 ॥
মেখলাদামভিশ্চিত্রৈরন্য়ৈশ্চ শুভভূষণৈঃ ।
বভাসে বহুভির্বদ্ধা রজ্জুবদ্ধেব বানরী ॥ 7 ॥
তাং সমীক্ষ্য় তদা দ্বাস্স্থাস্সুভৃশং পাপকারিণীম্ ।
গৃহীত্বাঽকরুণাং কুব্জাং শত্রুঘ্নায় ন্যবেদযন্ ॥ 8 ॥
যস্য়াঃ কৃতে বনে রামো ন্যস্তদেহশ্চ বঃ পিতা ।
সেয়ং পাপা নৃশংসা চ তস্য়াঃ কুরু যথামতি ॥ 9 ॥
শত্রুঘ্নশ্চ তদাজ্ঞায় বচনং ভৃশদুঃখিতঃ ।
অংতঃপুরচরান্সর্বানিত্য়ুবাচ ধৃত ব্রতঃ ॥ 10 ॥
তীব্রমুত্পাদিতং দুঃখং ভ্রাত্রূণাং মে তথা পিতুঃ ।
যয়া সেয়ং নৃশংসস্য় কর্মণঃ ফলমশ্নুতাম্ ॥ 11 ॥
এবমুক্ত্বা তু তেনাশু সখীজনসমাবৃতা ।
গৃহীতা বলবত্কুব্জা সা তদ্গৃহমনাদযত্ ॥ 12 ॥
তত স্সুভৃশসংতপ্তস্তস্য়া স্সর্ব স্সখীজনঃ ।
ক্রুদ্ধমাজ্ঞায় শত্রুঘ্নং বিপলাযত সর্বশঃ ॥ 13 ॥
আমংত্রযত কৃত্স্ন শ্চ তস্য়া স্সর্ব স্সখীজনঃ ।
যথাঽয়ং সমুপক্রাংতো নিশ্শেষাং নঃ করিষ্যতি ॥ 14 ॥
সানুক্রোশাং বদান্য়াং চ ধর্মজ্ঞাং চ যশস্বিনীম্ ।
কৌসল্য়াং শরণং যাম সা হি নোঽস্তু ধ্রুবা গতিঃ ॥ 15 ॥
স চ রোষেণ তাম্রাক্ষ শ্শত্রুঘ্ন শ্শত্রুতাপনঃ ।
বিচকর্ষ তদা কুব্জাং ক্রোশংতীং ধরণীতলে ॥ 16 ॥
তস্য়া হ্য়াকৃষ্যমাণায়া মংথরায়া স্ততস্ততঃ ।
চিত্রং বহুবিধং ভাংডং পৃথিব্য়াং তদ্ব্যশীর্যত ॥ 17 ॥
তেন ভাংডেন সংস্তীর্ণং শ্রীমদ্রাজনিবেশনম্ ।
অশোভত তদা ভূয়ঃ শারদং গগনং যথা ॥ 18 ॥
স বলী বলবত্ক্রোধাদ্গৃহীত্বা পুরুষর্ষভঃ ।
কৈকেয়ীমভিনির্ভর্ত্স্য় বভাষে পরুষং বচঃ ॥ 19 ॥
তৈর্বাক্য়ৈঃ পরুষৈর্দুঃখৈঃ কৈকেয়ী ভৃশদুঃখিতা ।
শত্রুঘ্নভযসংত্রস্তা পুত্রং শরণমাগতা ॥ 20 ॥
তং প্রেক্ষ্য় ভরতঃ ক্রুদ্ধং শত্রুঘ্নমিদমব্রবীত্ ।
অবধ্য়া স্সর্বভূতানাং প্রমদাঃ ক্ষম্যতামিতি ॥ 21 ॥
হন্য়ামহমিমাং পাপাং কৈকেয়ীং দুষ্টচারিণীম্ ।
যদি মাং ধার্মিকো রামো নাসূয়েন্মাতৃঘাতকম্ ॥ 22 ॥
ইমামপি হতাং কুব্জাং যদি জানাতি রাঘবঃ ।
ত্বাং চ মাং চ হি ধর্মাত্মা নাভিভাষিষ্যতে ধ্রুবম্ ॥ 23 ॥
ভরতস্য় বচশ্শ্রুত্বা শত্রুঘ্নো লক্ষ্মণানুজঃ ।
ন্যবর্তত ততো রোষাত্তাং মুমোচ চ মংথরাম্ ॥ 24 ॥
সা পাদমূলে কৈকেয়্য়া মংথরা নিপপাত হ ।
নিশ্শ্বসংতী সুদুঃখার্তা কৃপণং বিললাপ চ ॥ 25 ॥
শত্রুঘ্নবিক্ষেপবিমূঢসংজ্ঞাং সমীক্ষ্য় কুব্জাং ভরতস্য় মাতা ।
শনৈস্সমাশ্বাসযদার্তরূপাং ক্রৌংচীং বিলগ্নামিব বীক্ষমাণাম্ ॥ 26 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে অষ্টসপ্ততিতমস্সর্গঃ ॥
