ଶ୍ରୀମଦ୍ଵାଲ୍ମୀକୀୟ ରାମାୟଣେ ଅୟୋଧ୍ୟାକାଂଡମ୍ ।
ଅଥ ସପ୍ତାଶୀତିତମସ୍ସର୍ଗଃ ।
ଗୁହସ୍ୟ ଵଚନଂ ଶ୍ରୁତ୍ଵା ଭରତୋ ଭୃଶମପ୍ରିୟମ୍ ।
ଧ୍ୟାନଂ ଜଗାମ ତତ୍ରୈଵ ୟତ୍ର ତଚ୍ଛ୍ରୁତମପ୍ରିୟମ୍ ॥ 1 ॥
ସୁକୁମାରୋ ମହାସତ୍ତ୍ଵସ୍ସିଂହସ୍କଂଧୋ ମହାଭୁଜଃ ।
ପୁଂଡରୀକଵିଶାଲାକ୍ଷ ସ୍ତରୁଣଃ ପ୍ରିୟଦର୍ଶନଃ ॥ 2 ॥
ପ୍ରତ୍ୟାଶ୍ଵସ୍ୟ ମୁହୂର୍ତଂ ତୁ କାଲଂ ପରମଦୁର୍ମନାଃ ।
ପପାତ ସହସା ତୋତ୍ରୈର୍ହ୍ୟତିଵିଦ୍ଧ ଇଵ ଦ୍ଵିପଃ ॥ 3 ॥
ତଦଵସ୍ଥଂ ତୁ ଭରତଂ ଶତ୍ରୁଘ୍ନୋଽନଂତରସ୍ଥିତଃ ।
ପରିଷ୍ଵଜ୍ୟ ରୁରୋଦୋଚ୍ଚୈର୍ଵିସଂଜ୍ଞଶ୍ଶୋକକର୍ଶିତଃ ॥ 4 ॥
ତତସ୍ସର୍ଵାସ୍ସମାପେତୁର୍ମାତରୋ ଭରତସ୍ୟ ତାଃ ।
ଉପଵାସକୃଶା ଦୀନା ଭର୍ତୃଵ୍ୟସନକର୍ଶିତାଃ ॥ 5 ॥
ତାଶ୍ଚ ତଂ ପତିତଂ ଭୂମୌ ରୁଦଂତ୍ୟଃ ପର୍ୟଵାରୟନ୍ ।
କୌସଲ୍ୟା ତ୍ଵନୁସୃତ୍ୟୈନଂ ଦୁର୍ମନାଃ ପରିଷସ୍ଵଜେ ॥ 6 ॥
ଵତ୍ସଲା ସ୍ଵଂ ୟଥା ଵତ୍ସମୁପଗୂହ୍ୟ ତପସ୍ଵିନୀ ।
ପରିପପ୍ରଚ୍ଛ ଭରତଂ ରୁଦଂତୀ ଶୋକଲାଲସା ॥ 7 ॥
ପୁତ୍ର ଵ୍ୟାଧିର୍ନ ତେ କଚ୍ଚିଚ୍ଛରୀରଂ ପରିବାଧତେ ।
ଅଦ୍ୟ ରାଜକୁଲସ୍ୟାସ୍ୟ ତ୍ଵଦଧୀନଂ ହି ଜୀଵିତମ୍ ॥ 8 ॥
ତ୍ଵାଂ ଦୃଷ୍ଟ୍ଵା ପୁତ୍ର ଜୀଵାମି ରାମେ ସଭ୍ରାତୃକେଗତେ ।
ଵୃତ୍ତେ ଦଶରଥେ ରାଜ୍ଞି ନାଥ ଏକସ୍ତ୍ଵମଦ୍ୟ ନଃ ॥ 9 ॥
କଚ୍ଚିନ୍ନ ଲକ୍ଷ୍ମଣେ ପୁତ୍ର ଶ୍ରୁତଂ ତେ କିଂଚଦପ୍ରିୟମ୍ ।
ପୁତ୍ରେ ଵାଽପ୍ୟେକପୁତ୍ରାୟା ସ୍ସହଭାର୍ୟେ ଵନଂ ଗତେ ॥ 10 ॥
ସ ମୁହୂର୍ତଂ ସମାଶ୍ଵସ୍ୟ ରୁଦନ୍ନେଵ ମହାୟଶାଃ ।
କୌସଲ୍ୟାଂ ପରିସାଂତ୍ଵେଦ୍ୟଂ ଗୁହଂ ଵଚନମବ୍ରଵୀତ୍ ॥ 11 ॥
ଭ୍ରାତା ମେ କ୍ଵାଵସଦ୍ରାତ୍ରୌ କ୍ଵ ସୀତା କ୍ଵ ଚ ଲକ୍ଷ୍ମଣଃ ।
ଅସ୍ଵପଚ୍ଛୟନେ କସ୍ମିନ୍ କିଂ ଭୁକ୍ତ୍ଵା ଗୁହ ଶଂସ ମେ ॥ 12 ॥
ସୋଽବ୍ରଵୀଦ୍ଭରତଂ ହୃଷ୍ଟୋ ନିଷାଦାଧିପତିର୍ଗୁହଃ ।
ୟଦ୍ଵିଧଂ ପ୍ରତିପେଦେ ଚ ରାମେ ପ୍ରିୟହିତେଽତିଥୌ ॥ 13 ॥
ଅନ୍ନମୁଚ୍ଚାଵଚଂ ଭକ୍ଷାଃ ଫଲାନି ଵିଵିଧାନି ଚ ।
ରାମାୟାଭ୍ୟଵହାରାର୍ଥଂ ବହୁଚୋପହୃତଂ ମୟା ॥ 14 ॥
ତତ୍ସର୍ଵଂ ପ୍ରତ୍ୟନୁଜ୍ଞାସୀଦ୍ରାମ ସ୍ସତ୍ୟପରାକ୍ରମଃ ।
ନ ତୁ ତତ୍ପ୍ରତ୍ୟଗୃହ୍ଣାତ୍ସ କ୍ଷତ୍ରଧର୍ମମନୁସ୍ମରନ୍ ॥ 15 ॥
ନ ହ୍ୟସ୍ମାଭିଃ ପ୍ରତିଗ୍ରାହ୍ୟଂ ସଖେ ଦେୟଂ ତୁ ସର୍ଵଦା ।
ଇତି ତେନ ଵୟଂ ରାଜନ୍ନନୁନୀତା ମହାତ୍ମନା ॥ 16 ॥
ଲକ୍ଷ୍ମଣେନ ସମାନୀତଂ ପୀତ୍ଵା ଵାରି ମହାୟଶାଃ ।
ଔପଵାସ୍ୟଂ ତଦାଽକାର୍ଷୀଦ୍ରାଘଵସ୍ସହ ସୀତୟା ॥ 17 ॥
ତତସ୍ତୁ ଜଲଶେଷେଣ ଲକ୍ଷ୍ମଣୋଽପ୍ୟକରୋତ୍ତଦା ।
ଵାଗ୍ୟତାସ୍ତେ ତ୍ରୟ ସ୍ସଂଧ୍ୟାଂ ସମୁପାସତ ସଂହିତାଃ ॥ 18 ॥
ସୌମିତ୍ରିସ୍ତୁ ତତଃ ପଶ୍ଚାଦକରୋତ୍ସ୍ଵାସ୍ତରଂ ଶୁଭମ୍ ।
ସ୍ଵୟମାନୀୟ ବର୍ହୀଂଷି କ୍ଷିପ୍ରଂ ରାଘଵକାରଣାତ୍ ॥ 19 ॥
ତସ୍ମିନ୍ସମାଵିଶଦ୍ରାମ ସ୍ସ୍ଵାସ୍ତରେ ସହ ସୀତୟା ।
ପ୍ରକ୍ଷାଲ୍ୟ ଚ ତୟୋଃ ପାଦାଵପଚକ୍ରାମ ଲକ୍ଷ୍ମଣଃ ॥ 20 ॥
ଏତତ୍ତଦିଂଗୁଦୀମୂଲମିଦମେଵ ଚ ତତ୍ତୃଣମ୍ ।
ୟସ୍ମିନ୍ରାମଶ୍ଚ ସୀତା ଚ ରାତ୍ରିଂ ତାଂ ଶୟିତାଵୁଭୌ ॥ 21 ॥
ନିୟମ୍ୟ ପୃଷ୍ଠେ ତୁ ତଲାଂଗୁଲିତ୍ରଵାନ୍ ଶରୈସ୍ସୁପୂର୍ଣାଵିଷୁଧୀ ପରଂତପଃ ।
ମହାଦ୍ଧନୁ ସ୍ସଜ୍ୟମୁପୋହ୍ୟ ଲକ୍ଷ୍ମଣୋ ନିଶାମତିଷ୍ଠତ୍ପରିତୋଽସ୍ୟ କେଵଲମ୍ ॥ 22 ॥
ତତ ସ୍ତ୍ଵହଂଚୋତ୍ତମବାଣଚାପଧୃତ୍ ସ୍ଥିତୋଽଭଵଂ ତତ୍ର ସ ୟତ୍ର ଲକ୍ଷ୍ମଣଃ ।
ଅତଂଦ୍ରିତୈର୍ଜ୍ଞାତିଭିରାତ୍ତକାର୍ମୁକୈର୍ମହେଂଦ୍ରକଲ୍ପଂ ପରିପାଲୟଂସ୍ତଦା ॥ 23 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅୟୋଧ୍ୟାକାଂଡେ ସପ୍ତାଶୀତିତମସ୍ସର୍ଗଃ ॥
