ශ්රීමද්වාල්මීකීය රාමායණේ අයෝධ්යාකාංඩම් ।
අථ සප්තාශීතිතමස්සර්ගඃ ।
ගුහස්ය වචනං ශ්රුත්වා භරතෝ භෘශමප්රියම් ।
ධ්යානං ජගාම තත්රෛව යත්ර තච්ඡ්රුතමප්රියම් ॥ 1 ॥
සුකුමාරෝ මහාසත්ත්වස්සිංහස්කංධෝ මහාභුජඃ ।
පුංඩරීකවිශාලාක්ෂ ස්තරුණඃ ප්රියදර්ශනඃ ॥ 2 ॥
ප්රත්යාශ්වස්ය මුහූර්තං තු කාලං පරමදුර්මනාඃ ।
පපාත සහසා තෝත්රෛර්හ්යතිවිද්ධ ඉව ද්විපඃ ॥ 3 ॥
තදවස්ථං තු භරතං ශත්රුඝ්නෝऽනංතරස්ථිතඃ ।
පරිෂ්වජ්ය රුරෝදෝච්චෛර්විසංජ්ඤශ්ශෝකකර්ශිතඃ ॥ 4 ॥
තතස්සර්වාස්සමාපේතුර්මාතරෝ භරතස්ය තාඃ ।
උපවාසකෘශා දීනා භර්තෘව්යසනකර්ශිතාඃ ॥ 5 ॥
තාශ්ච තං පතිතං භූමෞ රුදංත්යඃ පර්යවාරයන් ।
කෞසල්යා ත්වනුසෘත්යෛනං දුර්මනාඃ පරිෂස්වජේ ॥ 6 ॥
වත්සලා ස්වං යථා වත්සමුපගූහ්ය තපස්විනී ।
පරිපප්රච්ඡ භරතං රුදංතී ශෝකලාලසා ॥ 7 ॥
පුත්ර ව්යාධිර්න තේ කච්චිච්ඡරීරං පරිබාධතේ ।
අද්ය රාජකුලස්යාස්ය ත්වදධීනං හි ජීවිතම් ॥ 8 ॥
ත්වාං දෘෂ්ට්වා පුත්ර ජීවාමි රාමේ සභ්රාතෘකේගතේ ।
වෘත්තේ දශරථේ රාජ්ඤි නාථ ඒකස්ත්වමද්ය නඃ ॥ 9 ॥
කච්චින්න ලක්ෂ්මණේ පුත්ර ශ්රුතං තේ කිංචදප්රියම් ।
පුත්රේ වාऽප්යේකපුත්රායා ස්සහභාර්යේ වනං ගතේ ॥ 10 ॥
ස මුහූර්තං සමාශ්වස්ය රුදන්නේව මහායශාඃ ।
කෞසල්යාං පරිසාංත්වේද්යං ගුහං වචනමබ්රවීත් ॥ 11 ॥
භ්රාතා මේ ක්වාවසද්රාත්රෞ ක්ව සීතා ක්ව ච ලක්ෂ්මණඃ ।
අස්වපච්ඡයනේ කස්මින් කිං භුක්ත්වා ගුහ ශංස මේ ॥ 12 ॥
සෝऽබ්රවීද්භරතං හෘෂ්ටෝ නිෂාදාධිපතිර්ගුහඃ ।
යද්විධං ප්රතිපේදේ ච රාමේ ප්රියහිතේऽතිථෞ ॥ 13 ॥
අන්නමුච්චාවචං භක්ෂාඃ ඵලානි විවිධානි ච ।
රාමායාභ්යවහාරාර්ථං බහුචෝපහෘතං මයා ॥ 14 ॥
තත්සර්වං ප්රත්යනුජ්ඤාසීද්රාම ස්සත්යපරාක්රමඃ ।
න තු තත්ප්රත්යගෘහ්ණාත්ස ක්ෂත්රධර්මමනුස්මරන් ॥ 15 ॥
න හ්යස්මාභිඃ ප්රතිග්රාහ්යං සඛේ දේයං තු සර්වදා ।
ඉති තේන වයං රාජන්නනුනීතා මහාත්මනා ॥ 16 ॥
ලක්ෂ්මණේන සමානීතං පීත්වා වාරි මහායශාඃ ।
ඖපවාස්යං තදාऽකාර්ෂීද්රාඝවස්සහ සීතයා ॥ 17 ॥
තතස්තු ජලශේෂේණ ලක්ෂ්මණෝऽප්යකරෝත්තදා ।
වාග්යතාස්තේ ත්රය ස්සංධ්යාං සමුපාසත සංහිතාඃ ॥ 18 ॥
සෞමිත්රිස්තු තතඃ පශ්චාදකරෝත්ස්වාස්තරං ශුභම් ।
ස්වයමානීය බර්හීංෂි ක්ෂිප්රං රාඝවකාරණාත් ॥ 19 ॥
තස්මින්සමාවිශද්රාම ස්ස්වාස්තරේ සහ සීතයා ।
ප්රක්ෂාල්ය ච තයෝඃ පාදාවපචක්රාම ලක්ෂ්මණඃ ॥ 20 ॥
ඒතත්තදිංගුදීමූලමිදමේව ච තත්තෘණම් ।
යස්මින්රාමශ්ච සීතා ච රාත්රිං තාං ශයිතාවුභෞ ॥ 21 ॥
නියම්ය පෘෂ්ඨේ තු තලාංගුලිත්රවාන් ශරෛස්සුපූර්ණාවිෂුධී පරංතපඃ ।
මහාද්ධනු ස්සජ්යමුපෝහ්ය ලක්ෂ්මණෝ නිශාමතිෂ්ඨත්පරිතෝऽස්ය කේවලම් ॥ 22 ॥
තත ස්ත්වහංචෝත්තමබාණචාපධෘත් ස්ථිතෝऽභවං තත්ර ස යත්ර ලක්ෂ්මණඃ ।
අතංද්රිතෛර්ජ්ඤාතිභිරාත්තකාර්මුකෛර්මහේංද්රකල්පං පරිපාලයංස්තදා ॥ 23 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ සප්තාශීතිතමස්සර්ගඃ ॥
