ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ സപ്താശീതിതമസ്സര്ഗഃ ।
ഗുഹസ്യ വചനം ശ്രുത്വാ ഭരതോ ഭൃശമപ്രിയമ് ।
ധ്യാനം ജഗാമ തത്രൈവ യത്ര തച്ഛ്രുതമപ്രിയമ് ॥ 1 ॥
സുകുമാരോ മഹാസത്ത്വസ്സിംഹസ്കംധോ മഹാഭുജഃ ।
പുംഡരീകവിശാലാക്ഷ സ്തരുണഃ പ്രിയദര്ശനഃ ॥ 2 ॥
പ്രത്യാശ്വസ്യ മുഹൂര്തം തു കാലം പരമദുര്മനാഃ ।
പപാത സഹസാ തോത്രൈര്ഹ്യതിവിദ്ധ ഇവ ദ്വിപഃ ॥ 3 ॥
തദവസ്ഥം തു ഭരതം ശത്രുഘ്നോഽനംതരസ്ഥിതഃ ।
പരിഷ്വജ്യ രുരോദോച്ചൈർവിസംജ്ഞശ്ശോകകര്ശിതഃ ॥ 4 ॥
തതസ്സർവാസ്സമാപേതുര്മാതരോ ഭരതസ്യ താഃ ।
ഉപവാസകൃശാ ദീനാ ഭര്തൃവ്യസനകര്ശിതാഃ ॥ 5 ॥
താശ്ച തം പതിതം ഭൂമൌ രുദംത്യഃ പര്യവാരയന് ।
കൌസല്യാ ത്വനുസൃത്യൈനം ദുര്മനാഃ പരിഷസ്വജേ ॥ 6 ॥
വത്സലാ സ്വം യഥാ വത്സമുപഗൂഹ്യ തപസ്വിനീ ।
പരിപപ്രച്ഛ ഭരതം രുദംതീ ശോകലാലസാ ॥ 7 ॥
പുത്ര വ്യാധിര്ന തേ കച്ചിച്ഛരീരം പരിബാധതേ ।
അദ്യ രാജകുലസ്യാസ്യ ത്വദധീനം ഹി ജീവിതമ് ॥ 8 ॥
ത്വാം ദൃഷ്ട്വാ പുത്ര ജീവാമി രാമേ സഭ്രാതൃകേഗതേ ।
വൃത്തേ ദശരഥേ രാജ്ഞി നാഥ ഏകസ്ത്വമദ്യ നഃ ॥ 9 ॥
കച്ചിന്ന ലക്ഷ്മണേ പുത്ര ശ്രുതം തേ കിംചദപ്രിയമ് ।
പുത്രേ വാഽപ്യേകപുത്രായാ സ്സഹഭാര്യേ വനം ഗതേ ॥ 10 ॥
സ മുഹൂര്തം സമാശ്വസ്യ രുദന്നേവ മഹായശാഃ ।
കൌസല്യാം പരിസാംത്വേദ്യം ഗുഹം വചനമബ്രവീത് ॥ 11 ॥
ഭ്രാതാ മേ ക്വാവസദ്രാത്രൌ ക്വ സീതാ ക്വ ച ലക്ഷ്മണഃ ।
അസ്വപച്ഛയനേ കസ്മിന് കിം ഭുക്ത്വാ ഗുഹ ശംസ മേ ॥ 12 ॥
സോഽബ്രവീദ്ഭരതം ഹൃഷ്ടോ നിഷാദാധിപതിര്ഗുഹഃ ।
യദ്വിധം പ്രതിപേദേ ച രാമേ പ്രിയഹിതേഽതിഥൌ ॥ 13 ॥
അന്നമുച്ചാവചം ഭക്ഷാഃ ഫലാനി വിവിധാനി ച ।
രാമായാഭ്യവഹാരാര്ഥം ബഹുചോപഹൃതം മയാ ॥ 14 ॥
തത്സർവം പ്രത്യനുജ്ഞാസീദ്രാമ സ്സത്യപരാക്രമഃ ।
ന തു തത്പ്രത്യഗൃഹ്ണാത്സ ക്ഷത്രധര്മമനുസ്മരന് ॥ 15 ॥
ന ഹ്യസ്മാഭിഃ പ്രതിഗ്രാഹ്യം സഖേ ദേയം തു സർവദാ ।
ഇതി തേന വയം രാജന്നനുനീതാ മഹാത്മനാ ॥ 16 ॥
ലക്ഷ്മണേന സമാനീതം പീത്വാ വാരി മഹായശാഃ ।
ഔപവാസ്യം തദാഽകാര്ഷീദ്രാഘവസ്സഹ സീതയാ ॥ 17 ॥
തതസ്തു ജലശേഷേണ ലക്ഷ്മണോഽപ്യകരോത്തദാ ।
വാഗ്യതാസ്തേ ത്രയ സ്സംധ്യാം സമുപാസത സംഹിതാഃ ॥ 18 ॥
സൌമിത്രിസ്തു തതഃ പശ്ചാദകരോത്സ്വാസ്തരം ശുഭമ് ।
സ്വയമാനീയ ബര്ഹീംഷി ക്ഷിപ്രം രാഘവകാരണാത് ॥ 19 ॥
തസ്മിന്സമാവിശദ്രാമ സ്സ്വാസ്തരേ സഹ സീതയാ ।
പ്രക്ഷാല്യ ച തയോഃ പാദാവപചക്രാമ ലക്ഷ്മണഃ ॥ 20 ॥
ഏതത്തദിംഗുദീമൂലമിദമേവ ച തത്തൃണമ് ।
യസ്മിന്രാമശ്ച സീതാ ച രാത്രിം താം ശയിതാവുഭൌ ॥ 21 ॥
നിയമ്യ പൃഷ്ഠേ തു തലാംഗുലിത്രവാന് ശരൈസ്സുപൂര്ണാവിഷുധീ പരംതപഃ ।
മഹാദ്ധനു സ്സജ്യമുപോഹ്യ ലക്ഷ്മണോ നിശാമതിഷ്ഠത്പരിതോഽസ്യ കേവലമ് ॥ 22 ॥
തത സ്ത്വഹംചോത്തമബാണചാപധൃത് സ്ഥിതോഽഭവം തത്ര സ യത്ര ലക്ഷ്മണഃ ।
അതംദ്രിതൈര്ജ്ഞാതിഭിരാത്തകാര്മുകൈര്മഹേംദ്രകല്പം പരിപാലയംസ്തദാ ॥ 23 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ സപ്താശീതിതമസ്സര്ഗഃ ॥
