śrīmadvālmīkīya rāmāyaṇē ayōdhyākāṇḍam ।
atha saptāśītitamassargaḥ ।
guhasya vachanaṃ śrutvā bharatō bhṛśamapriyam ।
dhyānaṃ jagāma tatraiva yatra tachChrutamapriyam ॥ 1 ॥
sukumārō mahāsattvassiṃhaskandhō mahābhujaḥ ।
puṇḍarīkaviśālākṣa staruṇaḥ priyadarśanaḥ ॥ 2 ॥
pratyāśvasya muhūrtaṃ tu kālaṃ paramadurmanāḥ ।
papāta sahasā tōtrairhyatividdha iva dvipaḥ ॥ 3 ॥
tadavasthaṃ tu bharataṃ śatrughnō'nantarasthitaḥ ।
pariṣvajya rurōdōchchairvisañjñaśśōkakarśitaḥ ॥ 4 ॥
tatassarvāssamāpēturmātarō bharatasya tāḥ ।
upavāsakṛśā dīnā bhartṛvyasanakarśitāḥ ॥ 5 ॥
tāścha taṃ patitaṃ bhūmau rudantyaḥ paryavārayan ।
kausalyā tvanusṛtyainaṃ durmanāḥ pariṣasvajē ॥ 6 ॥
vatsalā svaṃ yathā vatsamupagūhya tapasvinī ।
paripaprachCha bharataṃ rudantī śōkalālasā ॥ 7 ॥
putra vyādhirna tē kachchichCharīraṃ paribādhatē ।
adya rājakulasyāsya tvadadhīnaṃ hi jīvitam ॥ 8 ॥
tvāṃ dṛṣṭvā putra jīvāmi rāmē sabhrātṛkēgatē ।
vṛttē daśarathē rājñi nātha ēkastvamadya naḥ ॥ 9 ॥
kachchinna lakṣmaṇē putra śrutaṃ tē kiñchadapriyam ।
putrē vā'pyēkaputrāyā ssahabhāryē vanaṃ gatē ॥ 10 ॥
sa muhūrtaṃ samāśvasya rudannēva mahāyaśāḥ ।
kausalyāṃ parisāntvēdyaṃ guhaṃ vachanamabravīt ॥ 11 ॥
bhrātā mē kvāvasadrātrau kva sītā kva cha lakṣmaṇaḥ ।
asvapachChayanē kasmin kiṃ bhuktvā guha śaṃsa mē ॥ 12 ॥
sō'bravīdbharataṃ hṛṣṭō niṣādādhipatirguhaḥ ।
yadvidhaṃ pratipēdē cha rāmē priyahitē'tithau ॥ 13 ॥
annamuchchāvachaṃ bhakṣāḥ phalāni vividhāni cha ।
rāmāyābhyavahārārthaṃ bahuchōpahṛtaṃ mayā ॥ 14 ॥
tatsarvaṃ pratyanujñāsīdrāma ssatyaparākramaḥ ।
na tu tatpratyagṛhṇātsa kṣatradharmamanusmaran ॥ 15 ॥
na hyasmābhiḥ pratigrāhyaṃ sakhē dēyaṃ tu sarvadā ।
iti tēna vayaṃ rājannanunītā mahātmanā ॥ 16 ॥
lakṣmaṇēna samānītaṃ pītvā vāri mahāyaśāḥ ।
aupavāsyaṃ tadā'kārṣīdrāghavassaha sītayā ॥ 17 ॥
tatastu jalaśēṣēṇa lakṣmaṇō'pyakarōttadā ।
vāgyatāstē traya ssandhyāṃ samupāsata saṃhitāḥ ॥ 18 ॥
saumitristu tataḥ paśchādakarōtsvāstaraṃ śubham ।
svayamānīya barhīṃṣi kṣipraṃ rāghavakāraṇāt ॥ 19 ॥
tasminsamāviśadrāma ssvāstarē saha sītayā ।
prakṣālya cha tayōḥ pādāvapachakrāma lakṣmaṇaḥ ॥ 20 ॥
ētattadiṅgudīmūlamidamēva cha tattṛṇam ।
yasminrāmaścha sītā cha rātriṃ tāṃ śayitāvubhau ॥ 21 ॥
niyamya pṛṣṭhē tu talāṅgulitravān śaraissupūrṇāviṣudhī parantapaḥ ।
mahāddhanu ssajyamupōhya lakṣmaṇō niśāmatiṣṭhatparitō'sya kēvalam ॥ 22 ॥
tata stvahañchōttamabāṇachāpadhṛt sthitō'bhavaṃ tatra sa yatra lakṣmaṇaḥ ।
atandritairjñātibhirāttakārmukairmahēndrakalpaṃ paripālayaṃstadā ॥ 23 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē saptāśītitamassargaḥ ॥
