ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ ത്രിനവതിതമസ്സര്ഗഃ ।
തയാ മഹത്യാ യായിന്യാ ധ്വജിന്യാ വനവാസിനഃ ।
അര്ദിതാ യൂഥപാ മത്താഃ സയൂഥാസ്സംപ്രദുദ്രുവുഃ ॥ 1 ॥
ഋക്ഷാഃ പൃഷതസംഘാശ്ച രുരവശ്ച സമംതതഃ ।
ദൃശ്യംതേ വനരാജീഷു ഗിരിഷ്വപി നദീഷു ച ॥ 2 ॥
സ സംപ്രതസ്ഥേ ധര്മാത്മാ പ്രീതോ ദശരഥാത്മജഃ ।
വൃതോ മഹത്യാ നാദിന്യാ സേനയാ ചതുരംഗയാ ॥ 3 ॥
സാഗരൌഘനിഭാ സേനാ ഭരതസ്യ മഹാത്മനഃ ।
മഹീം സംഛാദയാമാസ പ്രാവൃഷി ദ്യാമിവാംബുദഃ ॥ 4 ॥
തുരംഗൌഘൈരവതതാ വാരണൈശ്ച മഹാജവൈഃ ।
അനാലക്ഷ്യാ ചിരം കാലം തസ്മിന്കാലേ ബഭൂവ ഭൂഃ ॥ 5 ॥
സ യാത്വാ ദൂരമധ്വാനം സുപരിശ്രാംതവാഹനഃ ।
ഉവാച ഭരത ശ്ശ്രീമാന് വസിഷ്ഠം മംത്രിണാം വരമ് ॥ 6 ॥
യാദൃശം ലക്ഷ്യതേ രൂപം യഥാ ചൈവ ശ്രുതം മയാ ।
വ്യക്തം പ്രാപ്താഃ സ്മ തം ദേശം ഭരദ്വാജോ യമബ്രവീത് ॥ 7 ॥
അയം ഗിരിശ്ചിത്രകൂട ഇയം മംദാകിനീ നദീ ।
ഏതത്പ്രകാശതേ ദൂരാന്നീലമേഘനിഭം വനമ് ॥ 8 ॥
ഗിരേ സ്സാനൂനി രമ്യാണി ചിത്രകൂടസ്യ സംപ്രതി ।
വാരണൈരവമൃദ്യംതേ മാമകൈ പർവതോപമൈഃ ॥ 9 ॥
മുംചംതി കുസുമാന്യേതേ നഗാഃ പർവതസാനുഷു ।
നീലാ ഇവാതപാപായേ തോയം തോയധരാ ഘനാഃ ॥ 10 ॥
കിന്നരാചരിതം ദേശം പശ്യ ശത്രുഘ്ന പർവതമ് ।
മൃഗൈസ്സമംതാദാകീര്ണം മകരൈരിവ സാഗരമ് ॥ 11 ॥
ഏതേ മൃഗഗണാ ഭാംതി ശീഘ്രവേഗാഃ പ്രചോദിതാഃ ।
വായുപ്രവിദ്ധാ ശ്ശരദി മേഘരാജിരിവാംബരേ ॥ 12 ॥
കുർവംതി കുസുമാപീഡാന് ശിരസ്സു സുരഭീനമീ ।
മേഘപ്രകാശൈഃ ഫലകൈര്ദാക്ഷിണാത്യാ യഥാ നരാഃ ॥ 13 ॥
നിഷ്കൂജമിവ ഭൂത്വേദം വനം ഘോരപ്രദര്ശനമ് ।
അയോധ്യേവ ജനാകീര്ണാ സംപ്രതി പ്രതിഭാതി മാ ॥ 14 ॥
ഖുരൈരുദീരിതോ രേണുര്ദാവം പ്രച്ഛാദ്യ തിഷ്ഠതി ।
തം വഹത്യനില ശ്ശ്രീഘ്രം കുർവന്നിവ മമ പ്രിയമ് ॥ 15 ॥
സ്യംദനാംസ്തുരഗോപേതാന്സൂതമുഖ്യൈ രധിഷ്ഠിതാന് ।
ഏതാന്സംപതതശ്ശ്രീഘ്രം പശ്യ ശത്രുഘ്ന കാനനേ ॥ 16 ॥
ഏതാന്വിത്രാസിതാന്പശ്യബര്ഹിണഃ പ്രിയദര്ശനാന് ।
ഏതമാവിശത ശ്ശ്രീഘ്രമധിവാസം പതത്രിണഃ ॥ 17 ॥
അതിമാത്രമയം ദേശോ മനോജ്ഞഃ പ്രതിഭാതി മേ ।
താപസാനാം നിവാസോഽയം വ്യക്തം സ്വര്ഗപഥോ യഥാ ॥ 18 ॥
മൃഗാ മൃഗീഭിഃ സഹിതാ ബഹവഃ പൃഷതാ വനേ ।
മനോജ്ഞരൂപാ ദൃശ്യംതേ കുസുമൈരിവ ചിത്രിതാഃ ॥ 19 ॥
സാധു സൈന്യാഃ പ്രതിഷ്ഠംതാം വിചിന്വംതു ച കാനനേ ।
യഥാ തൌ പുരുഷവ്യാഘ്രൌ ദൃശ്യേതേ രാമലക്ഷ്മണൌ ॥ 20 ॥
ഭരതസ്യ വചശ്ശ്രുത്വാ പുരുഷാശ്ശസ്ത്രപാണയഃ ।
വിവിശു സ്തദ്വനം ശൂരാ ധൂമം ച ദദൃശു സ്തതഃ ॥ 21 ॥
തേ സമാലോക്യ ധൂമാഗ്രമൂചുര്ഭരതമാഗതാഃ ।
നാമനുഷ്യേ ഭവത്യഗ്നി ർവ്യക്തമത്രൈവ രാഘവൌ ॥ 22 ॥
അഥ നാഽത്ര നരവ്യാഘ്രൌ രാജപുത്രൌ പരംതപൌ ।
അന്യേ രാമോപമാ സ്സംതി വ്യക്തമത്ര തപസ്വിനഃ ॥ 23 ॥
തച്ഛ്രുത്വാ ഭരതസ്തേഷാം വചനം സാധുസമ്മതമ് ।
സൈന്യാനുവാച സർവാംസ്താനമിത്രബലമര്ദനഃ ॥ 24 ॥
യത്താ ഭവംതസ്തിഷ്ഠംതു നേതോ ഗംതവ്യമഗ്രതഃ ।
അഹമേവ ഗമിഷ്യാമി സുമംത്രോ ഗുരുരേവ ച ॥ 25 ॥
ഏവമുക്താ സ്തതസ്സർവേ തത്ര തസ്ഥുഃ സമംതഃ ।
ഭരതോ യത്ര ധൂമാഗ്രം തത്ര ദൃഷ്ടിം സമാദധാത് ॥ 26 ॥
വ്യവസ്ഥിതാ യാ ഭരതേന സാ ചമൂര്നിരീക്ഷമാണാഽപി ച ഭൂമിമഗ്രതഃ ।
ബഭൂവ ഹൃഷ്ടാ ന ചിരേണ ജാനതീ പ്രിയസ്യ രാമസ്യ സമാഗമം തദാ ॥ 27 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ ത്രിനവതിതമസ്സര്ഗഃ ॥
