শ্রীমদ্বাল্মীকীয় রামাযণে অয়োধ্য়াকাংডম্ ।
অথ ত্রিনবতিতমস্সর্গঃ ।
তয়া মহত্য়া যায়িন্য়া ধ্বজিন্য়া বনবাসিনঃ ।
অর্দিতা যূথপা মত্তাঃ সয়ূথাস্সংপ্রদুদ্রুবুঃ ॥ 1 ॥
ঋক্ষাঃ পৃষতসংঘাশ্চ রুরবশ্চ সমংততঃ ।
দৃশ্য়ংতে বনরাজীষু গিরিষ্বপি নদীষু চ ॥ 2 ॥
স সংপ্রতস্থে ধর্মাত্মা প্রীতো দশরথাত্মজঃ ।
বৃতো মহত্য়া নাদিন্য়া সেনয়া চতুরংগয়া ॥ 3 ॥
সাগরৌঘনিভা সেনা ভরতস্য় মহাত্মনঃ ।
মহীং সংছাদয়ামাস প্রাবৃষি দ্য়ামিবাংবুদঃ ॥ 4 ॥
তুরংগৌঘৈরবততা বারণৈশ্চ মহাজবৈঃ ।
অনালক্ষ্য়া চিরং কালং তস্মিন্কালে বভূব ভূঃ ॥ 5 ॥
স যাত্বা দূরমধ্বানং সুপরিশ্রাংতবাহনঃ ।
উবাচ ভরত শ্শ্রীমান্ বসিষ্ঠং মংত্রিণাং বরম্ ॥ 6 ॥
যাদৃশং লক্ষ্যতে রূপং যথা চৈব শ্রুতং ময়া ।
ব্যক্তং প্রাপ্তাঃ স্ম তং দেশং ভরদ্বাজো যমব্রবীত্ ॥ 7 ॥
অয়ং গিরিশ্চিত্রকূট ইয়ং মংদাকিনী নদী ।
এতত্প্রকাশতে দূরান্নীলমেঘনিভং বনম্ ॥ 8 ॥
গিরে স্সানূনি রম্য়াণি চিত্রকূটস্য় সংপ্রতি ।
বারণৈরবমৃদ্য়ংতে মামকৈ পর্বতোপমৈঃ ॥ 9 ॥
মুংচংতি কুসুমান্য়েতে নগাঃ পর্বতসানুষু ।
নীলা ইবাতপাপায়ে তোয়ং তোযধরা ঘনাঃ ॥ 10 ॥
কিন্নরাচরিতং দেশং পশ্য় শত্রুঘ্ন পর্বতম্ ।
মৃগৈস্সমংতাদাকীর্ণং মকরৈরিব সাগরম্ ॥ 11 ॥
এতে মৃগগণা ভাংতি শীঘ্রবেগাঃ প্রচোদিতাঃ ।
বায়ুপ্রবিদ্ধা শ্শরদি মেঘরাজিরিবাংবরে ॥ 12 ॥
কুর্বংতি কুসুমাপীডান্ শিরস্সু সুরভীনমী ।
মেঘপ্রকাশৈঃ ফলকৈর্দাক্ষিণাত্য়া যথা নরাঃ ॥ 13 ॥
নিষ্কূজমিব ভূত্বেদং বনং ঘোরপ্রদর্শনম্ ।
অয়োধ্য়েব জনাকীর্ণা সংপ্রতি প্রতিভাতি মা ॥ 14 ॥
খুরৈরুদীরিতো রেণুর্দাবং প্রচ্ছাদ্য় তিষ্ঠতি ।
তং বহত্যনিল শ্শ্রীঘ্রং কুর্বন্নিব মম প্রিযম্ ॥ 15 ॥
স্য়ংদনাংস্তুরগোপেতান্সূতমুখ্য়ৈ রধিষ্ঠিতান্ ।
এতান্সংপততশ্শ্রীঘ্রং পশ্য় শত্রুঘ্ন কাননে ॥ 16 ॥
এতান্বিত্রাসিতান্পশ্যবর্হিণঃ প্রিযদর্শনান্ ।
এতমাবিশত শ্শ্রীঘ্রমধিবাসং পতত্রিণঃ ॥ 17 ॥
অতিমাত্রময়ং দেশো মনোজ্ঞঃ প্রতিভাতি মে ।
তাপসানাং নিবাসোঽয়ং ব্যক্তং স্বর্গপথো যথা ॥ 18 ॥
মৃগা মৃগীভিঃ সহিতা বহবঃ পৃষতা বনে ।
মনোজ্ঞরূপা দৃশ্য়ংতে কুসুমৈরিব চিত্রিতাঃ ॥ 19 ॥
সাধু সৈন্য়াঃ প্রতিষ্ঠংতাং বিচিন্বংতু চ কাননে ।
যথা তৌ পুরুষব্য়াঘ্রৌ দৃশ্য়েতে রামলক্ষ্মণৌ ॥ 20 ॥
ভরতস্য় বচশ্শ্রুত্বা পুরুষাশ্শস্ত্রপাণয়ঃ ।
বিবিশু স্তদ্বনং শূরা ধূমং চ দদৃশু স্ততঃ ॥ 21 ॥
তে সমালোক্য় ধূমাগ্রমূচুর্ভরতমাগতাঃ ।
নামনুষ্য়ে ভবত্যগ্নি র্ব্যক্তমত্রৈব রাঘবৌ ॥ 22 ॥
অথ নাঽত্র নরব্য়াঘ্রৌ রাজপুত্রৌ পরংতপৌ ।
অন্য়ে রামোপমা স্সংতি ব্যক্তমত্র তপস্বিনঃ ॥ 23 ॥
তচ্ছ্রুত্বা ভরতস্তেষাং বচনং সাধুসম্মতম্ ।
সৈন্য়ানুবাচ সর্বাংস্তানমিত্রবলমর্দনঃ ॥ 24 ॥
যত্তা ভবংতস্তিষ্ঠংতু নেতো গংতব্যমগ্রতঃ ।
অহমেব গমিষ্য়ামি সুমংত্রো গুরুরেব চ ॥ 25 ॥
এবমুক্তা স্ততস্সর্বে তত্র তস্থুঃ সমংতঃ ।
ভরতো যত্র ধূমাগ্রং তত্র দৃষ্টিং সমাদধাত্ ॥ 26 ॥
ব্যবস্থিতা যা ভরতেন সা চমূর্নিরীক্ষমাণাঽপি চ ভূমিমগ্রতঃ ।
বভূব হৃষ্টা ন চিরেণ জানতী প্রিযস্য় রামস্য় সমাগমং তদা ॥ 27 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে ত্রিনবতিতমস্সর্গঃ ॥
