ශ්රීමද්වාල්මීකීය රාමායණේ අයෝධ්යාකාංඩම් ।
අථ ත්රිනවතිතමස්සර්ගඃ ।
තයා මහත්යා යායින්යා ධ්වජින්යා වනවාසිනඃ ।
අර්දිතා යූථපා මත්තාඃ සයූථාස්සංප්රදුද්රුවුඃ ॥ 1 ॥
ඍක්ෂාඃ පෘෂතසංඝාශ්ච රුරවශ්ච සමංතතඃ ।
දෘශ්යංතේ වනරාජීෂු ගිරිෂ්වපි නදීෂු ච ॥ 2 ॥
ස සංප්රතස්ථේ ධර්මාත්මා ප්රීතෝ දශරථාත්මජඃ ।
වෘතෝ මහත්යා නාදින්යා සේනයා චතුරංගයා ॥ 3 ॥
සාගරෞඝනිභා සේනා භරතස්ය මහාත්මනඃ ।
මහීං සංඡාදයාමාස ප්රාවෘෂි ද්යාමිවාංබුදඃ ॥ 4 ॥
තුරංගෞඝෛරවතතා වාරණෛශ්ච මහාජවෛඃ ।
අනාලක්ෂ්යා චිරං කාලං තස්මින්කාලේ බභූව භූඃ ॥ 5 ॥
ස යාත්වා දූරමධ්වානං සුපරිශ්රාංතවාහනඃ ।
උවාච භරත ශ්ශ්රීමාන් වසිෂ්ඨං මංත්රිණාං වරම් ॥ 6 ॥
යාදෘශං ලක්ෂ්යතේ රූපං යථා චෛව ශ්රුතං මයා ।
ව්යක්තං ප්රාප්තාඃ ස්ම තං දේශං භරද්වාජෝ යමබ්රවීත් ॥ 7 ॥
අයං ගිරිශ්චිත්රකූට ඉයං මංදාකිනී නදී ।
ඒතත්ප්රකාශතේ දූරාන්නීලමේඝනිභං වනම් ॥ 8 ॥
ගිරේ ස්සානූනි රම්යාණි චිත්රකූටස්ය සංප්රති ।
වාරණෛරවමෘද්යංතේ මාමකෛ පර්වතෝපමෛඃ ॥ 9 ॥
මුංචංති කුසුමාන්යේතේ නගාඃ පර්වතසානුෂු ।
නීලා ඉවාතපාපායේ තෝයං තෝයධරා ඝනාඃ ॥ 10 ॥
කින්නරාචරිතං දේශං පශ්ය ශත්රුඝ්න පර්වතම් ।
මෘගෛස්සමංතාදාකීර්ණං මකරෛරිව සාගරම් ॥ 11 ॥
ඒතේ මෘගගණා භාංති ශීඝ්රවේගාඃ ප්රචෝදිතාඃ ।
වායුප්රවිද්ධා ශ්ශරදි මේඝරාජිරිවාංබරේ ॥ 12 ॥
කුර්වංති කුසුමාපීඩාන් ශිරස්සු සුරභීනමී ।
මේඝප්රකාශෛඃ ඵලකෛර්දාක්ෂිණාත්යා යථා නරාඃ ॥ 13 ॥
නිෂ්කූජමිව භූත්වේදං වනං ඝෝරප්රදර්ශනම් ।
අයෝධ්යේව ජනාකීර්ණා සංප්රති ප්රතිභාති මා ॥ 14 ॥
ඛුරෛරුදීරිතෝ රේණුර්දාවං ප්රච්ඡාද්ය තිෂ්ඨති ।
තං වහත්යනිල ශ්ශ්රීඝ්රං කුර්වන්නිව මම ප්රියම් ॥ 15 ॥
ස්යංදනාංස්තුරගෝපේතාන්සූතමුඛ්යෛ රධිෂ්ඨිතාන් ।
ඒතාන්සංපතතශ්ශ්රීඝ්රං පශ්ය ශත්රුඝ්න කානනේ ॥ 16 ॥
ඒතාන්විත්රාසිතාන්පශ්යබර්හිණඃ ප්රියදර්ශනාන් ।
ඒතමාවිශත ශ්ශ්රීඝ්රමධිවාසං පතත්රිණඃ ॥ 17 ॥
අතිමාත්රමයං දේශෝ මනෝජ්ඤඃ ප්රතිභාති මේ ।
තාපසානාං නිවාසෝऽයං ව්යක්තං ස්වර්ගපථෝ යථා ॥ 18 ॥
මෘගා මෘගීභිඃ සහිතා බහවඃ පෘෂතා වනේ ।
මනෝජ්ඤරූපා දෘශ්යංතේ කුසුමෛරිව චිත්රිතාඃ ॥ 19 ॥
සාධු සෛන්යාඃ ප්රතිෂ්ඨංතාං විචින්වංතු ච කානනේ ।
යථා තෞ පුරුෂව්යාඝ්රෞ දෘශ්යේතේ රාමලක්ෂ්මණෞ ॥ 20 ॥
භරතස්ය වචශ්ශ්රුත්වා පුරුෂාශ්ශස්ත්රපාණයඃ ।
විවිශු ස්තද්වනං ශූරා ධූමං ච දදෘශු ස්තතඃ ॥ 21 ॥
තේ සමාලෝක්ය ධූමාග්රමූචුර්භරතමාගතාඃ ।
නාමනුෂ්යේ භවත්යග්නි ර්ව්යක්තමත්රෛව රාඝවෞ ॥ 22 ॥
අථ නාऽත්ර නරව්යාඝ්රෞ රාජපුත්රෞ පරංතපෞ ।
අන්යේ රාමෝපමා ස්සංති ව්යක්තමත්ර තපස්විනඃ ॥ 23 ॥
තච්ඡ්රුත්වා භරතස්තේෂාං වචනං සාධුසම්මතම් ।
සෛන්යානුවාච සර්වාංස්තානමිත්රබලමර්දනඃ ॥ 24 ॥
යත්තා භවංතස්තිෂ්ඨංතු නේතෝ ගංතව්යමග්රතඃ ।
අහමේව ගමිෂ්යාමි සුමංත්රෝ ගුරුරේව ච ॥ 25 ॥
ඒවමුක්තා ස්තතස්සර්වේ තත්ර තස්ථුඃ සමංතඃ ।
භරතෝ යත්ර ධූමාග්රං තත්ර දෘෂ්ටිං සමාදධාත් ॥ 26 ॥
ව්යවස්ථිතා යා භරතේන සා චමූර්නිරීක්ෂමාණාऽපි ච භූමිමග්රතඃ ।
බභූව හෘෂ්ටා න චිරේණ ජානතී ප්රියස්ය රාමස්ය සමාගමං තදා ॥ 27 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ත්රිනවතිතමස්සර්ගඃ ॥
