śrīmadvālmīkīya rāmāyaṇē ayōdhyākāṇḍam ।
atha pañchanavatitamassargaḥ ।
atha śailādviniṣkramya maithilīṃ kōsalēśvaraḥ ।
adarśayachChubhajalāṃ ramyāṃ mandākinīṃ nadīm ॥ 1 ॥
abravīchcha varārōhāṃ chāruchandranibhānanām ।
vidēharājasya sutāṃ rāmō rājīvalōchanaḥ ॥ 2 ॥
vichitrapulināṃ ramyāṃ haṃsasārasasēvitām ।
kamalairupasampannāṃ paśya mandākinīṃ nadīm ॥ 3 ॥
nānāvidhaistīraruhai rvṛtāṃ puṣpaphaladrumaiḥ ।
rājantīṃ rājarājasya nalinīmiva sarvataḥ ॥ 4 ॥
mṛgayūthanipītāni kaluṣāmbhāṃsi sāmpratam ।
tīrthāni ramaṇīyāni ratiṃ sañjanayanti mē ॥ 5 ॥
jaṭājinadharāḥ kālē valkalōttaravāsasaḥ ।
ṛṣaya stvavagāhantē nadīṃ mandākinīṃ priyē ॥ 6 ॥
ādityamupatiṣṭhantē niyamādūrdhvabāhavaḥ ।
ētē parē viśālākṣi munaya ssaṃśitavratāḥ ॥ 7 ॥
mārutōddhūtaśikharaiḥ pranṛtta iva parvataḥ ।
pādapaiḥ patrapuṣpāṇi sṛjadbhirabhitō nadīm ॥ 8 ॥
chinmaṇinikāśōdāṃ kvachitpulinaśālinīm ।
kvachitsiddhajanākīrṇāṃ paśya mandākinīṃ nadīm ॥ 9 ॥
nirdhūtānvāyunā paśya vitatānpuṣpasañchayān ।
pōplūyamānānaparānpaśya tvaṃ jalamadhyagān ॥ 10 ॥
tāṃśchātivalguvachasō rathāṅgāhvayanā dvijāḥ ।
adhirōhanti kalyāṇi niṣkūjanta śśubhā giraḥ ॥ 11 ॥
darśanaṃ chitrakūṭasya mandākinyāścha śōbhanē ।
adhikaṃ puravāsāchcha manyē tava cha darśanāt ॥ 12 ॥
vidhūtakaluṣai ssiddhaistapōdamaśamānvitaiḥ ।
nityavikṣōbhitajalāṃ vigāhasva mayā saha ॥ 13 ॥
sakhīvachcha vigāhasva sītē mandākinīṃ nadīm ।
kamalānyavamajjantī puṣkarāṇi cha bhāmini ॥ 14 ॥
tvaṃ paurajanavadvyālānayōdhyāmiva parvatam ।
manyasva vanitē nityaṃ sarayūvadimāṃ nadīm ॥ 15 ॥
lakṣmaṇaśchāpi dharmātmā mannidēśē vyavasthitaḥ ।
tvaṃ chānukūlā vaidēhi prītiṃ janayathō mama ॥ 16 ॥
upaspṛśaṃstriṣavaṇaṃ madhumūlaphalāśanaḥ ।
nāyōdhyāyaina rājyāya spṛhayē'dya tvayā saha ॥ 17 ॥
imāṃhi ramyāṃ mṛgayūthaśālinīṃ nipītatōyāṃ gajasiṃhavānaraiḥ ।
supuṣpitāṃ puṣpabharairalaṅkṛtāṃ nasō'sti ya ssyānna gataklama ssukhī ॥ 18 ॥
itīva rāmō bahusaṅgataṃ vachaḥ priyāsahāya ssaritaṃ prati bruvan ।
chachāra ramyaṃ nayanāñjanaprabhaṃ sa chitrakūṭaṃ raghuvaṃśavardhanaḥ ॥ 19 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē pañchanavatitamassargaḥ ॥
