ශ්රීමද්වාල්මීකීය රාමායණේ අයෝධ්යාකාංඩම් ।
අථ පංචනවතිතමස්සර්ගඃ ।
අථ ශෛලාද්විනිෂ්ක්රම්ය මෛථිලීං කෝසලේශ්වරඃ ।
අදර්ශයච්ඡුභජලාං රම්යාං මංදාකිනීං නදීම් ॥ 1 ॥
අබ්රවීච්ච වරාරෝහාං චාරුචංද්රනිභානනාම් ।
විදේහරාජස්ය සුතාං රාමෝ රාජීවලෝචනඃ ॥ 2 ॥
විචිත්රපුලිනාං රම්යාං හංසසාරසසේවිතාම් ।
කමලෛරුපසංපන්නාං පශ්ය මංදාකිනීං නදීම් ॥ 3 ॥
නානාවිධෛස්තීරරුහෛ ර්වෘතාං පුෂ්පඵලද්රුමෛඃ ।
රාජංතීං රාජරාජස්ය නලිනීමිව සර්වතඃ ॥ 4 ॥
මෘගයූථනිපීතානි කලුෂාංභාංසි සාංප්රතම් ।
තීර්ථානි රමණීයානි රතිං සංජනයංති මේ ॥ 5 ॥
ජටාජිනධරාඃ කාලේ වල්කලෝත්තරවාසසඃ ।
ඍෂය ස්ත්වවගාහංතේ නදීං මංදාකිනීං ප්රියේ ॥ 6 ॥
ආදිත්යමුපතිෂ්ඨංතේ නියමාදූර්ධ්වබාහවඃ ।
ඒතේ පරේ විශාලාක්ෂි මුනය ස්සංශිතව්රතාඃ ॥ 7 ॥
මාරුතෝද්ධූතශිඛරෛඃ ප්රනෘත්ත ඉව පර්වතඃ ।
පාදපෛඃ පත්රපුෂ්පාණි සෘජද්භිරභිතෝ නදීම් ॥ 8 ॥
චින්මණිනිකාශෝදාං ක්වචිත්පුලිනශාලිනීම් ।
ක්වචිත්සිද්ධජනාකීර්ණාං පශ්ය මංදාකිනීං නදීම් ॥ 9 ॥
නිර්ධූතාන්වායුනා පශ්ය විතතාන්පුෂ්පසංචයාන් ।
පෝප්ලූයමානානපරාන්පශ්ය ත්වං ජලමධ්යගාන් ॥ 10 ॥
තාංශ්චාතිවල්ගුවචසෝ රථාංගාහ්වයනා ද්විජාඃ ।
අධිරෝහංති කල්යාණි නිෂ්කූජංත ශ්ශුභා ගිරඃ ॥ 11 ॥
දර්ශනං චිත්රකූටස්ය මංදාකින්යාශ්ච ශෝභනේ ।
අධිකං පුරවාසාච්ච මන්යේ තව ච දර්ශනාත් ॥ 12 ॥
විධූතකලුෂෛ ස්සිද්ධෛස්තපෝදමශමාන්විතෛඃ ।
නිත්යවික්ෂෝභිතජලාං විගාහස්ව මයා සහ ॥ 13 ॥
සඛීවච්ච විගාහස්ව සීතේ මංදාකිනීං නදීම් ।
කමලාන්යවමජ්ජංතී පුෂ්කරාණි ච භාමිනි ॥ 14 ॥
ත්වං පෞරජනවද්ව්යාලානයෝධ්යාමිව පර්වතම් ।
මන්යස්ව වනිතේ නිත්යං සරයූවදිමාං නදීම් ॥ 15 ॥
ලක්ෂ්මණශ්චාපි ධර්මාත්මා මන්නිදේශේ ව්යවස්ථිතඃ ।
ත්වං චානුකූලා වෛදේහි ප්රීතිං ජනයථෝ මම ॥ 16 ॥
උපස්පෘශංස්ත්රිෂවණං මධුමූලඵලාශනඃ ।
නායෝධ්යායෛන රාජ්යාය ස්පෘහයේऽද්ය ත්වයා සහ ॥ 17 ॥
ඉමාංහි රම්යාං මෘගයූථශාලිනීං නිපීතතෝයාං ගජසිංහවානරෛඃ ।
සුපුෂ්පිතාං පුෂ්පභරෛරලංකෘතාං නසෝऽස්ති ය ස්ස්යාන්න ගතක්ලම ස්සුඛී ॥ 18 ॥
ඉතීව රාමෝ බහුසංගතං වචඃ ප්රියාසහාය ස්සරිතං ප්රති බ්රුවන් ।
චචාර රම්යං නයනාංජනප්රභං ස චිත්රකූටං රඝුවංශවර්ධනඃ ॥ 19 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ පංචනවතිතමස්සර්ගඃ ॥
