શ્રીમદ્વાલ્મીકીય રામાયણે અયોધ્યાકાંડમ્ ।
અથ પંચનવતિતમસ્સર્ગઃ ।
અથ શૈલાદ્વિનિષ્ક્રમ્ય મૈથિલીં કોસલેશ્વરઃ ।
અદર્શયચ્છુભજલાં રમ્યાં મંદાકિનીં નદીમ્ ॥ 1 ॥
અબ્રવીચ્ચ વરારોહાં ચારુચંદ્રનિભાનનામ્ ।
વિદેહરાજસ્ય સુતાં રામો રાજીવલોચનઃ ॥ 2 ॥
વિચિત્રપુલિનાં રમ્યાં હંસસારસસેવિતામ્ ।
કમલૈરુપસંપન્નાં પશ્ય મંદાકિનીં નદીમ્ ॥ 3 ॥
નાનાવિધૈસ્તીરરુહૈ ર્વૃતાં પુષ્પફલદ્રુમૈઃ ।
રાજંતીં રાજરાજસ્ય નલિનીમિવ સર્વતઃ ॥ 4 ॥
મૃગયૂથનિપીતાનિ કલુષાંભાંસિ સાંપ્રતમ્ ।
તીર્થાનિ રમણીયાનિ રતિં સંજનયંતિ મે ॥ 5 ॥
જટાજિનધરાઃ કાલે વલ્કલોત્તરવાસસઃ ।
ઋષય સ્ત્વવગાહંતે નદીં મંદાકિનીં પ્રિયે ॥ 6 ॥
આદિત્યમુપતિષ્ઠંતે નિયમાદૂર્ધ્વબાહવઃ ।
એતે પરે વિશાલાક્ષિ મુનય સ્સંશિતવ્રતાઃ ॥ 7 ॥
મારુતોદ્ધૂતશિખરૈઃ પ્રનૃત્ત ઇવ પર્વતઃ ।
પાદપૈઃ પત્રપુષ્પાણિ સૃજદ્ભિરભિતો નદીમ્ ॥ 8 ॥
ચિન્મણિનિકાશોદાં ક્વચિત્પુલિનશાલિનીમ્ ।
ક્વચિત્સિદ્ધજનાકીર્ણાં પશ્ય મંદાકિનીં નદીમ્ ॥ 9 ॥
નિર્ધૂતાન્વાયુના પશ્ય વિતતાન્પુષ્પસંચયાન્ ।
પોપ્લૂયમાનાનપરાન્પશ્ય ત્વં જલમધ્યગાન્ ॥ 10 ॥
તાંશ્ચાતિવલ્ગુવચસો રથાંગાહ્વયના દ્વિજાઃ ।
અધિરોહંતિ કલ્યાણિ નિષ્કૂજંત શ્શુભા ગિરઃ ॥ 11 ॥
દર્શનં ચિત્રકૂટસ્ય મંદાકિન્યાશ્ચ શોભને ।
અધિકં પુરવાસાચ્ચ મન્યે તવ ચ દર્શનાત્ ॥ 12 ॥
વિધૂતકલુષૈ સ્સિદ્ધૈસ્તપોદમશમાન્વિતૈઃ ।
નિત્યવિક્ષોભિતજલાં વિગાહસ્વ મયા સહ ॥ 13 ॥
સખીવચ્ચ વિગાહસ્વ સીતે મંદાકિનીં નદીમ્ ।
કમલાન્યવમજ્જંતી પુષ્કરાણિ ચ ભામિનિ ॥ 14 ॥
ત્વં પૌરજનવદ્વ્યાલાનયોધ્યામિવ પર્વતમ્ ।
મન્યસ્વ વનિતે નિત્યં સરયૂવદિમાં નદીમ્ ॥ 15 ॥
લક્ષ્મણશ્ચાપિ ધર્માત્મા મન્નિદેશે વ્યવસ્થિતઃ ।
ત્વં ચાનુકૂલા વૈદેહિ પ્રીતિં જનયથો મમ ॥ 16 ॥
ઉપસ્પૃશંસ્ત્રિષવણં મધુમૂલફલાશનઃ ।
નાયોધ્યાયૈન રાજ્યાય સ્પૃહયેઽદ્ય ત્વયા સહ ॥ 17 ॥
ઇમાંહિ રમ્યાં મૃગયૂથશાલિનીં નિપીતતોયાં ગજસિંહવાનરૈઃ ।
સુપુષ્પિતાં પુષ્પભરૈરલંકૃતાં નસોઽસ્તિ ય સ્સ્યાન્ન ગતક્લમ સ્સુખી ॥ 18 ॥
ઇતીવ રામો બહુસંગતં વચઃ પ્રિયાસહાય સ્સરિતં પ્રતિ બ્રુવન્ ।
ચચાર રમ્યં નયનાંજનપ્રભં સ ચિત્રકૂટં રઘુવંશવર્ધનઃ ॥ 19 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અયોધ્યાકાંડે પંચનવતિતમસ્સર્ગઃ ॥
