ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ പംചനവതിതമസ്സര്ഗഃ ।
അഥ ശൈലാദ്വിനിഷ്ക്രമ്യ മൈഥിലീം കോസലേശ്വരഃ ।
അദര്ശയച്ഛുഭജലാം രമ്യാം മംദാകിനീം നദീമ് ॥ 1 ॥
അബ്രവീച്ച വരാരോഹാം ചാരുചംദ്രനിഭാനനാമ് ।
വിദേഹരാജസ്യ സുതാം രാമോ രാജീവലോചനഃ ॥ 2 ॥
വിചിത്രപുലിനാം രമ്യാം ഹംസസാരസസേവിതാമ് ।
കമലൈരുപസംപന്നാം പശ്യ മംദാകിനീം നദീമ് ॥ 3 ॥
നാനാവിധൈസ്തീരരുഹൈ ർവൃതാം പുഷ്പഫലദ്രുമൈഃ ।
രാജംതീം രാജരാജസ്യ നലിനീമിവ സർവതഃ ॥ 4 ॥
മൃഗയൂഥനിപീതാനി കലുഷാംഭാംസി സാംപ്രതമ് ।
തീര്ഥാനി രമണീയാനി രതിം സംജനയംതി മേ ॥ 5 ॥
ജടാജിനധരാഃ കാലേ വല്കലോത്തരവാസസഃ ।
ഋഷയ സ്ത്വവഗാഹംതേ നദീം മംദാകിനീം പ്രിയേ ॥ 6 ॥
ആദിത്യമുപതിഷ്ഠംതേ നിയമാദൂര്ധ്വബാഹവഃ ।
ഏതേ പരേ വിശാലാക്ഷി മുനയ സ്സംശിതവ്രതാഃ ॥ 7 ॥
മാരുതോദ്ധൂതശിഖരൈഃ പ്രനൃത്ത ഇവ പർവതഃ ।
പാദപൈഃ പത്രപുഷ്പാണി സൃജദ്ഭിരഭിതോ നദീമ് ॥ 8 ॥
ചിന്മണിനികാശോദാം ക്വചിത്പുലിനശാലിനീമ് ।
ക്വചിത്സിദ്ധജനാകീര്ണാം പശ്യ മംദാകിനീം നദീമ് ॥ 9 ॥
നിര്ധൂതാന്വായുനാ പശ്യ വിതതാന്പുഷ്പസംചയാന് ।
പോപ്ലൂയമാനാനപരാന്പശ്യ ത്വം ജലമധ്യഗാന് ॥ 10 ॥
താംശ്ചാതിവല്ഗുവചസോ രഥാംഗാഹ്വയനാ ദ്വിജാഃ ।
അധിരോഹംതി കല്യാണി നിഷ്കൂജംത ശ്ശുഭാ ഗിരഃ ॥ 11 ॥
ദര്ശനം ചിത്രകൂടസ്യ മംദാകിന്യാശ്ച ശോഭനേ ।
അധികം പുരവാസാച്ച മന്യേ തവ ച ദര്ശനാത് ॥ 12 ॥
വിധൂതകലുഷൈ സ്സിദ്ധൈസ്തപോദമശമാന്വിതൈഃ ।
നിത്യവിക്ഷോഭിതജലാം വിഗാഹസ്വ മയാ സഹ ॥ 13 ॥
സഖീവച്ച വിഗാഹസ്വ സീതേ മംദാകിനീം നദീമ് ।
കമലാന്യവമജ്ജംതീ പുഷ്കരാണി ച ഭാമിനി ॥ 14 ॥
ത്വം പൌരജനവദ്വ്യാലാനയോധ്യാമിവ പർവതമ് ।
മന്യസ്വ വനിതേ നിത്യം സരയൂവദിമാം നദീമ് ॥ 15 ॥
ലക്ഷ്മണശ്ചാപി ധര്മാത്മാ മന്നിദേശേ വ്യവസ്ഥിതഃ ।
ത്വം ചാനുകൂലാ വൈദേഹി പ്രീതിം ജനയഥോ മമ ॥ 16 ॥
ഉപസ്പൃശംസ്ത്രിഷവണം മധുമൂലഫലാശനഃ ।
നായോധ്യായൈന രാജ്യായ സ്പൃഹയേഽദ്യ ത്വയാ സഹ ॥ 17 ॥
ഇമാംഹി രമ്യാം മൃഗയൂഥശാലിനീം നിപീതതോയാം ഗജസിംഹവാനരൈഃ ।
സുപുഷ്പിതാം പുഷ്പഭരൈരലംകൃതാം നസോഽസ്തി യ സ്സ്യാന്ന ഗതക്ലമ സ്സുഖീ ॥ 18 ॥
ഇതീവ രാമോ ബഹുസംഗതം വചഃ പ്രിയാസഹായ സ്സരിതം പ്രതി ബ്രുവന് ।
ചചാര രമ്യം നയനാംജനപ്രഭം സ ചിത്രകൂടം രഘുവംശവര്ധനഃ ॥ 19 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ പംചനവതിതമസ്സര്ഗഃ ॥
