শ্রীমদ্বাল্মীকীয় রামাযণে অয়োধ্য়াকাংডম্ ।
অথ পংচনবতিতমস্সর্গঃ ।
অথ শৈলাদ্বিনিষ্ক্রম্য় মৈথিলীং কোসলেশ্বরঃ ।
অদর্শযচ্ছুভজলাং রম্য়াং মংদাকিনীং নদীম্ ॥ 1 ॥
অব্রবীচ্চ বরারোহাং চারুচংদ্রনিভাননাম্ ।
বিদেহরাজস্য় সুতাং রামো রাজীবলোচনঃ ॥ 2 ॥
বিচিত্রপুলিনাং রম্য়াং হংসসারসসেবিতাম্ ।
কমলৈরুপসংপন্নাং পশ্য় মংদাকিনীং নদীম্ ॥ 3 ॥
নানাবিধৈস্তীররুহৈ র্বৃতাং পুষ্পফলদ্রুমৈঃ ।
রাজংতীং রাজরাজস্য় নলিনীমিব সর্বতঃ ॥ 4 ॥
মৃগয়ূথনিপীতানি কলুষাংভাংসি সাংপ্রতম্ ।
তীর্থানি রমণীয়ানি রতিং সংজনয়ংতি মে ॥ 5 ॥
জটাজিনধরাঃ কালে বল্কলোত্তরবাসসঃ ।
ঋষয় স্ত্ববগাহংতে নদীং মংদাকিনীং প্রিয়ে ॥ 6 ॥
আদিত্যমুপতিষ্ঠংতে নিযমাদূর্ধ্ববাহবঃ ।
এতে পরে বিশালাক্ষি মুনয় স্সংশিতব্রতাঃ ॥ 7 ॥
মারুতোদ্ধূতশিখরৈঃ প্রনৃত্ত ইব পর্বতঃ ।
পাদপৈঃ পত্রপুষ্পাণি সৃজদ্ভিরভিতো নদীম্ ॥ 8 ॥
চিন্মণিনিকাশোদাং ক্বচিত্পুলিনশালিনীম্ ।
ক্বচিত্সিদ্ধজনাকীর্ণাং পশ্য় মংদাকিনীং নদীম্ ॥ 9 ॥
নির্ধূতান্বায়ুনা পশ্য় বিততান্পুষ্পসংচয়ান্ ।
পোপ্লূযমানানপরান্পশ্য় ত্বং জলমধ্যগান্ ॥ 10 ॥
তাংশ্চাতিবল্গুবচসো রথাংগাহ্বযনা দ্বিজাঃ ।
অধিরোহংতি কল্য়াণি নিষ্কূজংত শ্শুভা গিরঃ ॥ 11 ॥
দর্শনং চিত্রকূটস্য় মংদাকিন্য়াশ্চ শোভনে ।
অধিকং পুরবাসাচ্চ মন্য়ে তব চ দর্শনাত্ ॥ 12 ॥
বিধূতকলুষৈ স্সিদ্ধৈস্তপোদমশমান্বিতৈঃ ।
নিত্যবিক্ষোভিতজলাং বিগাহস্ব ময়া সহ ॥ 13 ॥
সখীবচ্চ বিগাহস্ব সীতে মংদাকিনীং নদীম্ ।
কমলান্যবমজ্জংতী পুষ্করাণি চ ভামিনি ॥ 14 ॥
ত্বং পৌরজনবদ্ব্য়ালানয়োধ্য়ামিব পর্বতম্ ।
মন্যস্ব বনিতে নিত্য়ং সরয়ূবদিমাং নদীম্ ॥ 15 ॥
লক্ষ্মণশ্চাপি ধর্মাত্মা মন্নিদেশে ব্যবস্থিতঃ ।
ত্বং চানুকূলা বৈদেহি প্রীতিং জনযথো মম ॥ 16 ॥
উপস্পৃশংস্ত্রিষবণং মধুমূলফলাশনঃ ।
নায়োধ্য়ায়ৈন রাজ্য়ায় স্পৃহয়েঽদ্য় ত্বয়া সহ ॥ 17 ॥
ইমাংহি রম্য়াং মৃগয়ূথশালিনীং নিপীততোয়াং গজসিংহবানরৈঃ ।
সুপুষ্পিতাং পুষ্পভরৈরলংকৃতাং নসোঽস্তি য স্স্য়ান্ন গতক্লম স্সুখী ॥ 18 ॥
ইতীব রামো বহুসংগতং বচঃ প্রিয়াসহায় স্সরিতং প্রতি ব্রুবন্ ।
চচার রম্য়ং নযনাংজনপ্রভং স চিত্রকূটং রঘুবংশবর্ধনঃ ॥ 19 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে পংচনবতিতমস্সর্গঃ ॥
