ଶ୍ରୀମଦ୍ଵାଲ୍ମୀକୀୟ ରାମାୟଣେ ଅୟୋଧ୍ୟାକାଂଡମ୍ ।
ଅଥ ପଂଚନଵତିତମସ୍ସର୍ଗଃ ।
ଅଥ ଶୈଲାଦ୍ଵିନିଷ୍କ୍ରମ୍ୟ ମୈଥିଲୀଂ କୋସଲେଶ୍ଵରଃ ।
ଅଦର୍ଶୟଚ୍ଛୁଭଜଲାଂ ରମ୍ୟାଂ ମଂଦାକିନୀଂ ନଦୀମ୍ ॥ 1 ॥
ଅବ୍ରଵୀଚ୍ଚ ଵରାରୋହାଂ ଚାରୁଚଂଦ୍ରନିଭାନନାମ୍ ।
ଵିଦେହରାଜସ୍ୟ ସୁତାଂ ରାମୋ ରାଜୀଵଲୋଚନଃ ॥ 2 ॥
ଵିଚିତ୍ରପୁଲିନାଂ ରମ୍ୟାଂ ହଂସସାରସସେଵିତାମ୍ ।
କମଲୈରୁପସଂପନ୍ନାଂ ପଶ୍ୟ ମଂଦାକିନୀଂ ନଦୀମ୍ ॥ 3 ॥
ନାନାଵିଧୈସ୍ତୀରରୁହୈ ର୍ଵୃତାଂ ପୁଷ୍ପଫଲଦ୍ରୁମୈଃ ।
ରାଜଂତୀଂ ରାଜରାଜସ୍ୟ ନଲିନୀମିଵ ସର୍ଵତଃ ॥ 4 ॥
ମୃଗୟୂଥନିପୀତାନି କଲୁଷାଂଭାଂସି ସାଂପ୍ରତମ୍ ।
ତୀର୍ଥାନି ରମଣୀୟାନି ରତିଂ ସଂଜନୟଂତି ମେ ॥ 5 ॥
ଜଟାଜିନଧରାଃ କାଲେ ଵଲ୍କଲୋତ୍ତରଵାସସଃ ।
ଋଷୟ ସ୍ତ୍ଵଵଗାହଂତେ ନଦୀଂ ମଂଦାକିନୀଂ ପ୍ରିୟେ ॥ 6 ॥
ଆଦିତ୍ୟମୁପତିଷ୍ଠଂତେ ନିୟମାଦୂର୍ଧ୍ଵବାହଵଃ ।
ଏତେ ପରେ ଵିଶାଲାକ୍ଷି ମୁନୟ ସ୍ସଂଶିତଵ୍ରତାଃ ॥ 7 ॥
ମାରୁତୋଦ୍ଧୂତଶିଖରୈଃ ପ୍ରନୃତ୍ତ ଇଵ ପର୍ଵତଃ ।
ପାଦପୈଃ ପତ୍ରପୁଷ୍ପାଣି ସୃଜଦ୍ଭିରଭିତୋ ନଦୀମ୍ ॥ 8 ॥
ଚିନ୍ମଣିନିକାଶୋଦାଂ କ୍ଵଚିତ୍ପୁଲିନଶାଲିନୀମ୍ ।
କ୍ଵଚିତ୍ସିଦ୍ଧଜନାକୀର୍ଣାଂ ପଶ୍ୟ ମଂଦାକିନୀଂ ନଦୀମ୍ ॥ 9 ॥
ନିର୍ଧୂତାନ୍ଵାୟୁନା ପଶ୍ୟ ଵିତତାନ୍ପୁଷ୍ପସଂଚୟାନ୍ ।
ପୋପ୍ଲୂୟମାନାନପରାନ୍ପଶ୍ୟ ତ୍ଵଂ ଜଲମଧ୍ୟଗାନ୍ ॥ 10 ॥
ତାଂଶ୍ଚାତିଵଲ୍ଗୁଵଚସୋ ରଥାଂଗାହ୍ଵୟନା ଦ୍ଵିଜାଃ ।
ଅଧିରୋହଂତି କଲ୍ୟାଣି ନିଷ୍କୂଜଂତ ଶ୍ଶୁଭା ଗିରଃ ॥ 11 ॥
ଦର୍ଶନଂ ଚିତ୍ରକୂଟସ୍ୟ ମଂଦାକିନ୍ୟାଶ୍ଚ ଶୋଭନେ ।
ଅଧିକଂ ପୁରଵାସାଚ୍ଚ ମନ୍ୟେ ତଵ ଚ ଦର୍ଶନାତ୍ ॥ 12 ॥
ଵିଧୂତକଲୁଷୈ ସ୍ସିଦ୍ଧୈସ୍ତପୋଦମଶମାନ୍ଵିତୈଃ ।
ନିତ୍ୟଵିକ୍ଷୋଭିତଜଲାଂ ଵିଗାହସ୍ଵ ମୟା ସହ ॥ 13 ॥
ସଖୀଵଚ୍ଚ ଵିଗାହସ୍ଵ ସୀତେ ମଂଦାକିନୀଂ ନଦୀମ୍ ।
କମଲାନ୍ୟଵମଜ୍ଜଂତୀ ପୁଷ୍କରାଣି ଚ ଭାମିନି ॥ 14 ॥
ତ୍ଵଂ ପୌରଜନଵଦ୍ଵ୍ୟାଲାନୟୋଧ୍ୟାମିଵ ପର୍ଵତମ୍ ।
ମନ୍ୟସ୍ଵ ଵନିତେ ନିତ୍ୟଂ ସରୟୂଵଦିମାଂ ନଦୀମ୍ ॥ 15 ॥
ଲକ୍ଷ୍ମଣଶ୍ଚାପି ଧର୍ମାତ୍ମା ମନ୍ନିଦେଶେ ଵ୍ୟଵସ୍ଥିତଃ ।
ତ୍ଵଂ ଚାନୁକୂଲା ଵୈଦେହି ପ୍ରୀତିଂ ଜନୟଥୋ ମମ ॥ 16 ॥
ଉପସ୍ପୃଶଂସ୍ତ୍ରିଷଵଣଂ ମଧୁମୂଲଫଲାଶନଃ ।
ନାୟୋଧ୍ୟାୟୈନ ରାଜ୍ୟାୟ ସ୍ପୃହୟେଽଦ୍ୟ ତ୍ଵୟା ସହ ॥ 17 ॥
ଇମାଂହି ରମ୍ୟାଂ ମୃଗୟୂଥଶାଲିନୀଂ ନିପୀତତୋୟାଂ ଗଜସିଂହଵାନରୈଃ ।
ସୁପୁଷ୍ପିତାଂ ପୁଷ୍ପଭରୈରଲଂକୃତାଂ ନସୋଽସ୍ତି ୟ ସ୍ସ୍ୟାନ୍ନ ଗତକ୍ଲମ ସ୍ସୁଖୀ ॥ 18 ॥
ଇତୀଵ ରାମୋ ବହୁସଂଗତଂ ଵଚଃ ପ୍ରିୟାସହାୟ ସ୍ସରିତଂ ପ୍ରତି ବ୍ରୁଵନ୍ ।
ଚଚାର ରମ୍ୟଂ ନୟନାଂଜନପ୍ରଭଂ ସ ଚିତ୍ରକୂଟଂ ରଘୁଵଂଶଵର୍ଧନଃ ॥ 19 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅୟୋଧ୍ୟାକାଂଡେ ପଂଚନଵତିତମସ୍ସର୍ଗଃ ॥
