ශ්රීමද්වාල්මීකීය රාමායණේ අරණ්යකාංඩම් ।
අථ චතුර්දශස්සර්ගඃ ।
අථ පංචවටීං ගච්ඡන්නංතරා රඝුනංදනඃ ।
ආසසාද මහාකායං ගෘධ්රං භීමපරාක්රමම් ॥ 1 ॥
තං දෘෂ්ට්වා තෞ මහාභාගෞ වටස්ථං රාමලක්ෂ්මණෞ ।
මේනාතේ රාක්ෂසං පක්ෂිං බ්රුවාණෞ කෝ භවානිති ॥ 2 ॥
ස තෞ මධුරයා වාචා සෞම්යයා ප්රීණයන්නිව ।
උවාච වත්ස මාං විද්ධි වයස්යං පිතුරාත්මනඃ ॥ 3 ॥
ස තං පිතෘසඛං බුද්ධ්වා පූජයාමාස රාඝවඃ ।
ස තස්ය කුලමව්යග්රමථ පප්රච්ඡ නාම ච ॥ 4 ॥
රාමස්ය වචනං ශ්රුත්වා සර්වභූතසමුද්භවම් ।
ආචචක්ෂේ ද්විජස්තස්මෛ කුලමාත්මානමේව ච ॥ 5 ॥
පූර්වකාලේ මහාබාහෝ යේ ප්රජාපතයෝऽභවන් ।
තාන්මේ නිගදතස්සර්වානාදිතශ්ශෘණු රාඝව ॥ 6 ॥
කර්දමඃ ප්රථමස්තේෂාං වික්රීතස්තදනංතරඃ ।
ශේෂශ්ච සංශ්රයශ්චෛව බහුපුත්රශ්ච වීර්යවාන් ॥ 7 ॥
ස්ථාණුර්මරීචිරත්රිශ්ච ක්රතුශ්චෛව මහාබලඃ ।
පුලස්ත්යශ්චාංගිරාශ්චෛව ප්රචේතාඃ පූලහස්තථා ॥ 8 ॥
දක්ෂෝ විවස්වානපරෝऽරිෂ්ටනේමිශ්ච රාඝව ।
කාශ්යපශ්ච මහාතේජාස්තේෂාමාසීච්ච පශ්චිමඃ ॥ 9 ॥
ප්රජාපතේස්තු දක්ෂස්ය බභූවුරිති විශ්රුතම් ।
ෂෂ්ටිර්දුහිතරෝ රාම යශස්වින්යෝ මහායශඃ ॥ 10 ॥
කාශ්යපඃ ප්රතිජග්රාහ තාසාමෂ්ටෞ සුමධ්යමාඃ ।
අදිතිං ච දිතිං චෛව දනුමප්යථ කාලිකාම් ॥ 11 ॥
තාම්රාං ක්රෝධවශාං චෛව මනුං චාප්යනලාමපි ।
තාස්තු කන්යාස්තතඃ ප්රීතඃ කාශ්යපඃ පුනරබ්රවීත් ॥ 12 ॥
පුත්රාං ස්ස්රෛලෝක්යභර්තෘන්වෛ ජනයිෂ්යථ මත්සමාන් ।
අදිතිස්තන්මනා රාම දිතිශ්ච මනුජර්ෂභ ॥ 13 ॥
කාලිකා ච මහාබාහෝ ශේෂාස්ත්වමනසෝऽභවන් ।
අදිත්යාං ජජ්ඤිරේ දේවාත්රයස්ත්රිංශදරිංදම ॥ 14 ॥
ආදිත්යා වසවෝ රුද්රා හ්යශ්විනෞ ච පරංතප ।
දිතිස්ත්වජනයත්පුත්රාන් දෛත්යාංස්තාත යශස්විනඃ ॥ 15 ॥
තේෂාමියං වසුමතී පුරාऽසීත්සවනාර්ණවා ।
දනුස්ත්වජනයත්පුත්රමශ්වග්රීවමරිංදම ॥ 16 ॥
නරකං කාලකංචෛව කාලිකාපි ව්යජායත ।
ක්රෞංචීං භාසීං තථා ශ්යේනීං ධෘතරාෂ්ට්රීං තථා ශුකීම් ॥ 17 ॥
තාම්රාපි සුෂුවේ කන්යාඃ පංචෛතා ලෝකවිශ්රුතාඃ ।
උලූකාංජනයත්ක්රෞංචී භාසී භාසාන්ව්යජායත ॥ 18 ॥
ශ්යේනී ශ්යේනාංශ්ච ගෘධ්රාංශ්ච ව්යජායත සුතේජසඃ ।
ධෘතරාෂ්ට්රීතු හංසාංශ්ච කලහංසාංශ්ච සර්වශඃ ॥ 19 ॥
චක්රවාකාංශ්ච භද්රං තේ විජජ්ඤේ සාපි භාමිනී ।
ශුකී නතාං විජජ්ඤේ තු නතායා විනතා සුතා ॥ 20 ॥
දශ ක්රෝධවශා රාම විජජ්ඤේ හ්යාත්මසංභවාඃ ।
මෘගීං ච මෘගමංදාං ච හරීං භද්රමදාමපි ॥ 21 ॥
මාතංගීමපි ශාර්දූලීං ශ්වේතාං ච සුරභිං තථා ।
සර්වලක්ෂණසංපන්නාං සුරසාං කද්රුකාමපි ॥ 22 ॥
අපත්යං තු මෘගාස්සර්වේ මෘග්යා නරවරෝත්තම ।
ඍක්ෂාශ්ච මෘගමංදායාස්සෘමරාශ්චමරා ස්තථා ॥ 23 ॥
හර්යාශ්ච හරයෝऽපත්යං වානරාශ්ච තරස්ස්විනඃ ।
තතස්ත්විරාවතීං නාම ජජ්ඤේ භද්රමදා සුතාම් ॥ 24 ॥
තස්යාස්ත්වෛරාවතඃ පුත්රෝ ලෝකනාථෝ මහාගජඃ ।
මාතංග්යා ස්ත්වථ මාතංගා අපත්යං මනුජර්ෂභ ॥ 25 ॥
ගෝලාංගූලාංශ්ච ශාර්දූලී ව්යාඝ්රාංශ්චාජනයත්සුතාන් ।
දිශාගජාංශ්ච කාකුත්ස්ථ ශ්වේතාප්යජනයත්සුතාන් ॥ 26 ॥
තතෝ දුහිතරෞ රාම සුරභිර්ද්වේව්යජායත ।
රෝහිණීං නාම භද්රං තේ ගංධර්වීං ච යශස්ස්විනීම් ॥ 27 ॥
රෝහිණ්යජනයද් ගාවෝ ගංධර්වී වාජිනඃ සුතාන් ।
සුරසාऽජනයන්නාගාන්රාම කද්රූස්තු පන්නගාන් ॥ 28 ॥
මනුර්මනුෂ්යාන් ජනයද්රාම පුත්රාන් යශස්විනඃ ।
බ්රාහ්මණාන් ක්ෂත්රියාන් වෛශ්යාන් ශූද්රාංශ්ච මනුජර්ෂභ ॥ 29 ॥
සර්වාන් පුණ්යඵලාන්වෘක්ෂානනලාපි ව්යජායත ।
විනතා ච ශුකීපෞත්රී කද්රූශ්ච සුරසාස්වසා ॥ 30 ॥
කද්රූර්නාගං සහස්රාස්යං විජජ්ඤේ ධරණීධරම් ।
ද්වෞ පුත්රෞ විනතායාස්තු ගරුඩෝऽරුණ ඒව ච ॥ 31 ॥
තස්මාජ්ජාතෝऽහමරුණාත්සංපාතිස්තු මමාග්රජඃ ।
ජටායුරිති මාං විද්ධි ශ්යේනීපුත්රමරිංදම ॥ 32 ॥
සෝऽහං වාසසහායස්තේ භවිෂ්යාමි යදීච්ඡසි ।
ඉදං දුර්ගං හි කාංතාරං මෘගරාක්ෂස සේවිතම් ॥ 33 ॥
සීතාං ච තාත රක්ෂිෂ්යේ ත්වයි යාතේ සලක්ෂ්මණේ ।
ජටායුෂං තං ප්රතිපූජ්ය රාඝවෝ මුදා පරිෂ්වජ්ය ච සන්නතෝऽභවත් ।
පිතුර්හි ශුශ්රාව සඛිත්වමාත්මවාන් ජටායුෂා සංකථිතං පුනඃ පුනඃ ॥ 34 ॥
ස තත්ර සීතාං පරිදාය මෛථිලීං සහෛව තේනාතිබලේන පක්ෂිණා ।
ජගාම තාං පංචවටීං සලක්ෂ්මණෝ රිපූංදිධක්ෂංඡලභානි වානලඃ ॥ 35 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ චතුර්දශස්සර්ගඃ ॥
