শ্রীমদ্বাল্মীকীয় রামাযণে অরণ্যকাংডম্ ।
অথ চতুর্দশস্সর্গঃ ।
অথ পংচবটীং গচ্ছন্নংতরা রঘুনংদনঃ ।
আসসাদ মহাকায়ং গৃধ্রং ভীমপরাক্রমম্ ॥ 1 ॥
তং দৃষ্ট্বা তৌ মহাভাগৌ বটস্থং রামলক্ষ্মণৌ ।
মেনাতে রাক্ষসং পক্ষিং ব্রুবাণৌ কো ভবানিতি ॥ 2 ॥
স তৌ মধুরয়া বাচা সৌম্যয়া প্রীণযন্নিব ।
উবাচ বত্স মাং বিদ্ধি বযস্য়ং পিতুরাত্মনঃ ॥ 3 ॥
স তং পিতৃসখং বুদ্ধ্বা পূজয়ামাস রাঘবঃ ।
স তস্য় কুলমব্যগ্রমথ পপ্রচ্ছ নাম চ ॥ 4 ॥
রামস্য় বচনং শ্রুত্বা সর্বভূতসমুদ্ভবম্ ।
আচচক্ষে দ্বিজস্তস্মৈ কুলমাত্মানমেব চ ॥ 5 ॥
পূর্বকালে মহাবাহো যে প্রজাপতয়োঽভবন্ ।
তান্মে নিগদতস্সর্বানাদিতশ্শৃণু রাঘব ॥ 6 ॥
কর্দমঃ প্রথমস্তেষাং বিক্রীতস্তদনংতরঃ ।
শেষশ্চ সংশ্রযশ্চৈব বহুপুত্রশ্চ বীর্যবান্ ॥ 7 ॥
স্থাণুর্মরীচিরত্রিশ্চ ক্রতুশ্চৈব মহাবলঃ ।
পুলস্ত্যশ্চাংগিরাশ্চৈব প্রচেতাঃ পূলহস্তথা ॥ 8 ॥
দক্ষো বিবস্বানপরোঽরিষ্টনেমিশ্চ রাঘব ।
কাশ্যপশ্চ মহাতেজাস্তেষামাসীচ্চ পশ্চিমঃ ॥ 9 ॥
প্রজাপতেস্তু দক্ষস্য় বভূবুরিতি বিশ্রুতম্ ।
ষষ্টির্দুহিতরো রাম যশস্বিন্য়ো মহাযশঃ ॥ 10 ॥
কাশ্যপঃ প্রতিজগ্রাহ তাসামষ্টৌ সুমধ্যমাঃ ।
অদিতিং চ দিতিং চৈব দনুমপ্যথ কালিকাম্ ॥ 11 ॥
তাম্রাং ক্রোধবশাং চৈব মনুং চাপ্যনলামপি ।
তাস্তু কন্য়াস্ততঃ প্রীতঃ কাশ্যপঃ পুনরব্রবীত্ ॥ 12 ॥
পুত্রাং স্স্রৈলোক্যভর্তৃন্বৈ জনয়িষ্যথ মত্সমান্ ।
অদিতিস্তন্মনা রাম দিতিশ্চ মনুজর্ষভ ॥ 13 ॥
কালিকা চ মহাবাহো শেষাস্ত্বমনসোঽভবন্ ।
অদিত্য়াং জজ্ঞিরে দেবাত্রযস্ত্রিংশদরিংদম ॥ 14 ॥
আদিত্য়া বসবো রুদ্রা হ্যশ্বিনৌ চ পরংতপ ।
দিতিস্ত্বজনযত্পুত্রান্ দৈত্য়াংস্তাত যশস্বিনঃ ॥ 15 ॥
তেষামিয়ং বসুমতী পুরাঽসীত্সবনার্ণবা ।
দনুস্ত্বজনযত্পুত্রমশ্বগ্রীবমরিংদম ॥ 16 ॥
নরকং কালকংচৈব কালিকাপি ব্যজাযত ।
ক্রৌংচীং ভাসীং তথা শ্য়েনীং ধৃতরাষ্ট্রীং তথা শুকীম্ ॥ 17 ॥
তাম্রাপি সুষুবে কন্য়াঃ পংচৈতা লোকবিশ্রুতাঃ ।
উলূকাংজনযত্ক্রৌংচী ভাসী ভাসান্ব্যজাযত ॥ 18 ॥
শ্য়েনী শ্য়েনাংশ্চ গৃধ্রাংশ্চ ব্যজাযত সুতেজসঃ ।
ধৃতরাষ্ট্রীতু হংসাংশ্চ কলহংসাংশ্চ সর্বশঃ ॥ 19 ॥
চক্রবাকাংশ্চ ভদ্রং তে বিজজ্ঞে সাপি ভামিনী ।
শুকী নতাং বিজজ্ঞে তু নতায়া বিনতা সুতা ॥ 20 ॥
দশ ক্রোধবশা রাম বিজজ্ঞে হ্য়াত্মসংভবাঃ ।
মৃগীং চ মৃগমংদাং চ হরীং ভদ্রমদামপি ॥ 21 ॥
মাতংগীমপি শার্দূলীং শ্বেতাং চ সুরভিং তথা ।
সর্বলক্ষণসংপন্নাং সুরসাং কদ্রুকামপি ॥ 22 ॥
অপত্য়ং তু মৃগাস্সর্বে মৃগ্য়া নরবরোত্তম ।
ঋক্ষাশ্চ মৃগমংদায়াস্সৃমরাশ্চমরা স্তথা ॥ 23 ॥
হর্য়াশ্চ হরয়োঽপত্য়ং বানরাশ্চ তরস্স্বিনঃ ।
ততস্ত্বিরাবতীং নাম জজ্ঞে ভদ্রমদা সুতাম্ ॥ 24 ॥
তস্য়াস্ত্বৈরাবতঃ পুত্রো লোকনাথো মহাগজঃ ।
মাতংগ্য়া স্ত্বথ মাতংগা অপত্য়ং মনুজর্ষভ ॥ 25 ॥
গোলাংগূলাংশ্চ শার্দূলী ব্য়াঘ্রাংশ্চাজনযত্সুতান্ ।
দিশাগজাংশ্চ কাকুত্স্থ শ্বেতাপ্যজনযত্সুতান্ ॥ 26 ॥
ততো দুহিতরৌ রাম সুরভির্দ্বেব্যজাযত ।
রোহিণীং নাম ভদ্রং তে গংধর্বীং চ যশস্স্বিনীম্ ॥ 27 ॥
রোহিণ্যজনযদ্ গাবো গংধর্বী বাজিনঃ সুতান্ ।
সুরসাঽজনযন্নাগান্রাম কদ্রূস্তু পন্নগান্ ॥ 28 ॥
মনুর্মনুষ্য়ান্ জনযদ্রাম পুত্রান্ যশস্বিনঃ ।
ব্রাহ্মণান্ ক্ষত্রিয়ান্ বৈশ্য়ান্ শূদ্রাংশ্চ মনুজর্ষভ ॥ 29 ॥
সর্বান্ পুণ্যফলান্বৃক্ষাননলাপি ব্যজাযত ।
বিনতা চ শুকীপৌত্রী কদ্রূশ্চ সুরসাস্বসা ॥ 30 ॥
কদ্রূর্নাগং সহস্রাস্য়ং বিজজ্ঞে ধরণীধরম্ ।
দ্বৌ পুত্রৌ বিনতায়াস্তু গরুডোঽরুণ এব চ ॥ 31 ॥
তস্মাজ্জাতোঽহমরুণাত্সংপাতিস্তু মমাগ্রজঃ ।
জটায়ুরিতি মাং বিদ্ধি শ্য়েনীপুত্রমরিংদম ॥ 32 ॥
সোঽহং বাসসহাযস্তে ভবিষ্য়ামি যদীচ্ছসি ।
ইদং দুর্গং হি কাংতারং মৃগরাক্ষস সেবিতম্ ॥ 33 ॥
সীতাং চ তাত রক্ষিষ্য়ে ত্বয়ি যাতে সলক্ষ্মণে ।
জটায়ুষং তং প্রতিপূজ্য় রাঘবো মুদা পরিষ্বজ্য় চ সন্নতোঽভবত্ ।
পিতুর্হি শুশ্রাব সখিত্বমাত্মবান্ জটায়ুষা সংকথিতং পুনঃ পুনঃ ॥ 34 ॥
স তত্র সীতাং পরিদায় মৈথিলীং সহৈব তেনাতিবলেন পক্ষিণা ।
জগাম তাং পংচবটীং সলক্ষ্মণো রিপূংদিধক্ষংছলভানি বানলঃ ॥ 35 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে চতুর্দশস্সর্গঃ ॥
