ශ්රීමද්වාල්මීකීය රාමායණේ අරණ්යකාංඩම් ।
අථ ෂෝඩශස්සර්ගඃ ।
වසතස්තස්ය තු සුඛං රාඝවස්ය මහාත්මනඃ ।
ශරද්ව්යපායේ හේමංතඍතුරිෂ්ටඃ ප්රවර්තත ॥ 1 ॥
ස කදාචිත්ප්රභාතායාං ශර්වර්යාං රඝුනංදනඃ ।
ප්රයයාවභිෂේකාර්ථං රම්යාං ගෝදාවරීං නදීම් ॥ 2 ॥
ප්රහ්වඃ කලශහස්තස්තං සීතයා සහ වීර්යවාන් ।
පෘෂ්ඨතෝऽනුව්රජන්භ්රාතා සෞමිත්රිරිදමබ්රවීත් ॥ 3 ॥
අයං ස කාලඃ සංප්රාප්තඃ ප්රියෝ යස්තේ ප්රියංවද ।
අලංකෘත ඉවාභාති යේන සංවත්සරඃ ශුභඃ ॥ 4 ॥
නීහාරපරුෂෝ ලෝකඃ පෘථිවී සස්යශාලිනී ।
ජලාන්යනුපභෝග්යානි සුභගෝ හව්යවාහනඃ ॥ 5 ॥
නවාග්රයණපූජාභිරභ්යර්ච්ය පිතෘදේවතාඃ ।
කෘතාග්රයණකාඃ කාලේ සංතෝ විගතකල්මෂාඃ ॥ 6 ॥
ප්රාජ්යකාමා ජනපදාස්සංපන්නතරගෝරසාඃ ।
විචරංති මහීපාලා යාත්රාස්ථා විජිගීෂවඃ ॥ 7 ॥
සේවමානේ දෘඪං සූර්යේ දිශමංතක සේවිතාම් ।
විහීනතිලකේව ස්ත්රී නෝත්තරා දික්ප්රකාශතේ ॥ 8 ॥
ප්රකෘත්යා හිමකෝශාඪ්යෝ දූරසූර්යශ්ච සාංප්රතම් ।
යථාර්ථනාමා සුව්යක්තං හිමවාන්හිමවාන්ගිරිඃ ॥ 9 ॥
අත්යංතසුඛසංචාරා මධ්යාහ්නේ ස්පර්ශතස්සුඛාඃ ।
දිවසාස්සුභගාදිත්යාශ්චායාසලිලදුර්භගාඃ ॥ 10 ॥
මෘදුසූර්යාස්සනීහාරාඃ පටුශීතාස්සමාරුතාඃ ।
ශූන්යාරණ්යා හිමධ්වස්තා දිවසා භාංතිසාංප්රතම් ॥ 11 ॥
නිවෘත්තාකාශශයනාඃ පුෂ්යනීතා හිමාරුණාඃ ।
ශීතා වෘද්ධතරායාමාස්ත්රියාමා යාංති සාංප්රතම් ॥ 12 ॥
රවිසංක්රාංතසෞභාග්ය ස්තුෂාරාරුණමංඩලඃ ।
නිශ්ශ්වාසාංධ ඉවාදර්ශන්ඡංද්රමා න ප්රකාශතේ ॥ 13 ॥
ජ්යෝත්ස්න තුෂාරමලිනා පෞර්ණමාස්යාං න රාජතේ ।
සීතේව චාතපශ්යාමා ලක්ෂ්යතේ න තු ශෝභතේ ॥ 14 ॥
ප්රකෘත්යා ශීතලස්පර්ශෝ හිමවිද්ධශ්ච සාංප්රතම් ।
ප්රවාති පශ්චිමෝ වායුඃ කාලේ ද්විගුණශීතලඃ ॥ 15 ॥
බාෂ්පච්ඡන්නාන්යරණ්යානි යවගෝධූමවංති ච ।
ශෝභංතේऽභ්යුදිතේ සූර්යේ නද්භි ක්රෞංචසාරසෛඃ ॥ 16 ॥
ඛර්ජූරපුෂ්පාකෘතිභිශ්ශිරෝභිඃ පූර්ණතංඩුලෛඃ ।
ශෝභංතේ කිංචිදානම්රාශ්ශාලයඃ කනකප්රභාඃ ॥ 17 ॥
මයූඛෛරුපසර්පද්භිර්හිමනීහාරසංවෘතෛඃ ।
දූරමභ්යුදිතස්සූර්යශ්ශශාංක ඉව ලක්ෂ්යතේ ॥ 18 ॥
අග්රාහ්යවීර්යඃ පූර්වාහ්ණේ මධ්යාහ්නේ ස්පර්ශතස්සුඛඃ ।
සංරක්තඃ කිංචිදාපාංඩුරාතපශ්ශෝභතේ ක්ෂිතෞ ॥ 19 ॥
අවශ්යායනිපාතේන කිංචිත්ප්රක්ලින්නශාද්වලා ।
වනානාං ශෝභතේ භූමිර්නිවිෂ්ටතරුණාතපා ॥ 20 ॥
ස්පෘශංස්තු විමලං ශීතමුදකං ද්විරදස්සුඛම් ।
අත්යංතතෘෂිතෝ වන්යඃ ප්රතිසංහරතේ කරම් ॥ 21 ॥
ඒතේ හි සමුපාසීනා විහගා ජලචාරිණඃ ।
නාවගාහංති සලිලමප්රගල්භා ඉවාහවම් ॥ 22 ॥
අවශ්යායතමෝනද්ධා නීහාරතමසාऽවෘතාඃ ।
ප්රසුප්තා ඉව ලක්ෂ්යංතේ විපුෂ්පා වනරාජයඃ ॥ 23 ॥
බාෂ්පසංඡන්නසලිලා රුතවිජ්ඤේයසාරසාඃ ।
හිමාර්ද්රවාලුකෛස්තීරෛස්සරිතෝ භාංති සාංප්රතම් ॥ 24 ॥
තුෂාරපතනාච්චෛව මෘදුත්වාද්භාස්කරස්ය ච ।
ශෛත්යාදගාග්රස්ථමපි ප්රායේණ රසවජ්ජලම් ॥ 25 ॥
ජරාජර්ජරිතෛඃ පද්මෛශශීර්ණකේසරකර්ණිකෛඃ ।
නාලෂේර්හිමධ්වස්සෛර්න භංති කමලාකරාඃ ॥ 26 ॥
අස්මිංස්තු පුරුෂව්යාඝ්රඃ කාලේ දුඃඛසමන්විතඃ ।
තපශ්චරති ධර්මාත්මා ත්වද්භක්ත්යා භරතඃ පුරේ ॥ 27 ॥
ත්යක්ත්වා රාජ්යං ච මානං ච භෝගාංශ්ච විවිධාන්බහූන් ।
තපස්ස්වී නියතාහාරශ්ශේතේ ශීතේ මහීතලේ ॥ 28 ॥
සෝऽපි වේලාමිමාං නූනමභිෂේකාර්ථමුද්යතඃ ।
වෘතඃ ප්රකෘතිභිර්නිත්යං ප්රයාති සරයූං නදීම් ॥ 29 ॥
අත්යංතසුඛසංවෘද්ධස්සුකුමාරස්සුඛෝචිතඃ ।
කථං න්වපරරාත්රේෂු සරයූමවගාහතේ ॥ 30 ॥
පද්මපත්රේක්ෂණෝ වීරශ්ශ්යාමෝ නිරුදරෝ මහාන් ।
ධර්මජ්ඤ ස්සත්යවාදී ච හ්රීනිෂේධෝ ජිතේංද්රියඃ ॥ 31 ॥
ප්රියාභිභාෂී මධුරෝ දීර්ඝබාහුරරිංදමඃ ।
සංත්යජ්ය විවිධාන්භෝගානාර්යං සර්වාත්මනා ශ්රිතඃ ॥ 32 ॥
ජිතස්ස්වර්ගස්තව භ්රාත්රා භරතේන මහාත්මනා ।
වනස්ථමපි තාපස්යේ යස්ත්වාමනුවිධීයතේ ॥ 33 ॥
න පිත්ර්යමනුවර්තංතේ මාතෘකං ද්විපදා ඉති ।
ඛ්යාතෝ ලෝකප්රවාදෝऽයං භරතේනාන්යථා කෘතඃ ॥ 34 ॥
භර්තා දශරථෝ යස්යාස්සාධුශ්ච භරතස්සුතඃ ।
කථං නු සාऽංබා කෛකේයී තාදෘශී ක්රූරශීලිනී ॥ 35 ॥
ඉත්යේවං ලක්ෂ්මණේ වාක්යං ස්නේහාද්බ්රුවති ධාර්මිකේ ।
පරිවාදං ජනන්යාස්තමසහන්රාඝවෝऽබ්රවීත් ॥ 36 ॥
ස තේऽංබා මධ්යමා තාත ගර්හිතව්යා කථංචන ।
තාමේවේක්ෂ්වාකුනාථස්ය භරතස්ය කථාං කුරු ॥ 37 ॥
නිශ්චිතාऽපි හි මේ බුද්ධිර්වනවාසේ දෘඪව්රතා ।
භරතස්නේහසංතප්තා බාලිශීක්රියතේ පුනඃ ॥ 38 ॥
සංස්මරාම්යස්ය වාක්යානි ප්රියාණි මධුරාණි ච ।
හෘද්යාන්යමෘතකල්පානි මනඃප්රහ්ලාදනානි ච ॥ 39 ॥
කදාන්වහං සමේෂ්යාමි භරතේන මහාත්මනා ।
ශත්රුඝ්නේන ච වීරේණ ත්වයා ච රඝුනංදන ॥ 40 ॥
ඉත්යේවං විලපංස්තත්ර ප්රාප්ය ගෝදාවරීං නදීම් ।
චක්රේऽභිෂේකං කාකුත්ස්ථස්සානුජස්සහ සීතයා ॥ 41 ॥
තර්පයිත්වාऽථ සලිලෛස්තේ පිතෘංදෛවතානි ච ।
ස්තුවංති ස්මෝදිතං සූර්යං දේවතාශ්ච සමාහිතාඃ ॥ 42 ॥
කෘතාභිෂේකස්සරරාජ රාමඃ සීතාද්විතීයස්සහ ලක්ෂ්මණේන ।
කෘතාභිෂේකෝ ගිරිරාජපුත්ර්යා රුද්රස්සනංදී භගවානිවේශඃ ॥ 43 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ෂෝඩශස්සර්ගඃ ॥
