śrīmadvālmīkīya rāmāyaṇē araṇyakāṇḍam ।
atha trayōviṃśassargaḥ ।
tasminyātē balē ghōramaśivaṃ śōṇitōdakam ।
abhyavarṣanmahāmēghastumulō gardabhāruṇaḥ ॥ 1 ॥
nipētusturagāstasya rathayuktā mahājavāḥ ।
samē puṣpachitē dēśē rājamārgē yadṛchChayā ॥ 2 ॥
śyāmaṃ rudhiraparyantaṃ babhūva parivēṣaṇam ।
alātachakrapratimaṃ parigṛhya divākaram ॥ 3 ॥
tatō dhvajamupāgamya hēmadaṇḍaṃ samuchChritam ।
samākramya mahākāyastasthau gṛdhrassudāruṇaḥ ॥ 4 ॥
janasthānasamīpē tu samāgamya kharasvanāḥ ।
visvarānvividhāṃśchakrurmāṃsādā mṛgapakṣiṇaḥ ॥ 5 ॥
vyājahruścha pradīptāyāṃ diśi vai bhairavasvanam ।
aśivaṃ yātudhānānāṃ śivā ghōrā mahāsvanāḥ ॥ 6 ॥
prabhinnagirisaṅkāśāstōyaśōṇitadhāriṇaḥ ।
ākāśaṃ tadanākāśaṃ chakrurbhīmā valāhakāḥ ॥ 7 ॥
babhūva timiraṃ ghōramuddhataṃ rōmaharṣaṇam ।
diśō vā vidiśō vāpi na cha vyaktaṃ chakāśirē ॥ 8 ॥
kṣatajārdrasavarṇābhā sandhyākālaṃ vinā babhau ।
kharasyābhimukhā nēdustadā ghōramṛgāḥ khagāḥ ॥ 9 ॥
kaṅkagōmāyugṛdhrāścha chukruśurbhayaśaṃsinaḥ ।
nityāśubhakarā yuddhē śivā ghōranidarśanāḥ ॥ 10 ॥
nēdurbalasyābhimukhaṃ jvālōdgāribhirānanaiḥ ।
kabandhaḥ parighābhāsō dṛśyatē bhāskarāntikē ॥ 11 ॥
jagrāha sūryaṃ svarbhānuraparvaṇi mahāgrahaḥ ।
pravāti mārutaśśīghraṃ niṣprabhō'bhūddivākaraḥ ॥ 12 ॥
utpētuścha vinā rātriṃ tārāḥ khadyōtasaprabhāḥ ।
saṃlīnamīnavihagā nalinyaśśuṣkapaṅkajāḥ ॥ 13 ॥
tasmin kṣaṇē babhūvuścha vinā puṣpaphalairdrumāḥ ।
uddhūtaścha vinā vātaṃ rēṇurjaladharāruṇaḥ ॥ 14 ॥
vīchīkūchīti vāśyantyō babhūvustatra śārikāḥ ।
ulkāśchāpi sanirghātā nipēturghōradarśanāḥ ॥ 15 ॥
prachachāla mahī sarvā saśailavanakānanā ।
kharasya cha rathasthasya nardamānasya dhīmataḥ ॥ 16 ॥
prākampata bhujassavyassvaraśchāsyāvasajjata ।
sāsrā sampadyatē dṛṣṭiḥ paśyamānasya sarvataḥ ॥ 17 ॥
lalāṭē cha rujā jātā na cha mōhānyavartata ।
tānsamīkṣaya mahōtpātānutthitānrōmaharṣaṇān ॥ 18 ॥
abravīdrākṣasānsarvānprahasansakharastadā ।
mahōtpātānimānsarvānutthitānghōradarśanān ॥ 19 ॥
na chintayāmyahaṃ vīryādbalavāndurbalāniva ।
tārā api śaraistīkṣṇaiḥ pātayāmi nabhassthalāt ॥ 20 ॥
mṛtyuṃ maraṇadharmēṇa saṅkruddhō yōjayāmyaham ।
rāghavaṃ taṃ balōtsiktaṃ bhrātaraṃ chāsya lakṣmaṇam ॥ 21 ॥
ahatvā sāyakaistīkṣṇairnōpāvartitumutsahē ।
sakāmā bhaginī mē'stu pītvā tu rudhiraṃ tayōḥ ॥ 22 ॥
yannimittastu rāmasya lakṣmaṇasya viparyayaḥ ।
na kvachitprāptapūrvō mē saṃyugēṣu parājayaḥ ॥ 23 ॥
yuṣmākamētatpratyakṣaṃ nānṛtaṃ kathayāmyaham ।
dēvarājamapi kruddhō mattairāvatayāyinam ॥ 24 ॥
vajrahastaṃ raṇē hanyāṃ kiṃ punastau kumānuṣau ।
sā tasya garjitaṃ śrutvā rākṣasasya mahāchamūḥ ॥ 25 ॥
praharṣamatulaṃ lēbhē mṛtyupāśāvapāśitā ।
samīyuścha mahātmānō yuddhadarśanakāṅkṣiṇaḥ ॥ 26 ॥
ṛṣayō dēvagandarvāssiddhāścha sahachāraṇaiḥ ।
samētya chōchussahitāstē'nyōnyaṃ puṇyakarmaṇaḥ ।
svasti gōbrāhmaṇēbhyō'stu lōkānāṃ yē'bhisaṅgatāḥ ॥ 27 ॥
jayatāṃ rāghavassaṅkhyē paulastyān rajanīcharān ॥ 28 ॥
chakrahastō yathā yuddhē sarvānasurapuṅgavān ।
ētachchānyachcha bahuśō bruvāṇāḥ paramarṣayaḥ ॥ 29 ॥
jātakautūhalāstatra vimānasthāścha dēvatāḥ ।
dadṛśurvāhinīṃ tēṣāṃ rākṣasānāṃ gatāyuṣām ॥ 30 ॥
rathēna tu kharō vēgādugrasainyō vinissṛtaḥ ।
taṃ dṛṣṭvā rākṣasaṃ bhūyō rākṣasāścha vinissṛtāḥ ॥ 31 ॥
śyēnagāmī pṛthugrīvō yajñaśatrurvihaṅgamaḥ ।
durjayaḥ karavīrākṣaḥ paruṣaḥ kālakārmukaḥ ॥ 32 ॥
mēghamālī mahāmālī sarvāsyō rudhirāśanaḥ ।
dvādaśaitē mahāvīryāḥ pratasthurabhitaḥ kharam ॥ 33 ॥
mahākapālissthūlākṣaḥ pramāthī triśirāstathā ।
chatvāra ētē sēnānyō dūṣaṇaṃ pṛṣṭhatō yayuḥ ॥ 34 ॥
sā bhīmavēgā samarābhikāmā mahābalā rākṣasavīrasēnā ।
tau rājaputrau sahasābhyupētā mālā grahāṇāmiva chandrasūryau ॥ 35 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē trayōviṃśassargaḥ ॥
