ශ්රීමද්වාල්මීකීය රාමායණේ අරණ්යකාංඩම් ।
අථ ත්රයෝවිංශස්සර්ගඃ ।
තස්මින්යාතේ බලේ ඝෝරමශිවං ශෝණිතෝදකම් ।
අභ්යවර්ෂන්මහාමේඝස්තුමුලෝ ගර්දභාරුණඃ ॥ 1 ॥
නිපේතුස්තුරගාස්තස්ය රථයුක්තා මහාජවාඃ ।
සමේ පුෂ්පචිතේ දේශේ රාජමාර්ගේ යදෘච්ඡයා ॥ 2 ॥
ශ්යාමං රුධිරපර්යංතං බභූව පරිවේෂණම් ।
අලාතචක්රප්රතිමං පරිගෘහ්ය දිවාකරම් ॥ 3 ॥
තතෝ ධ්වජමුපාගම්ය හේමදංඩං සමුච්ඡ්රිතම් ।
සමාක්රම්ය මහාකායස්තස්ථෞ ගෘධ්රස්සුදාරුණඃ ॥ 4 ॥
ජනස්ථානසමීපේ තු සමාගම්ය ඛරස්වනාඃ ।
විස්වරාන්විවිධාංශ්චක්රුර්මාංසාදා මෘගපක්ෂිණඃ ॥ 5 ॥
ව්යාජහ්රුශ්ච ප්රදීප්තායාං දිශි වෛ භෛරවස්වනම් ।
අශිවං යාතුධානානාං ශිවා ඝෝරා මහාස්වනාඃ ॥ 6 ॥
ප්රභින්නගිරිසංකාශාස්තෝයශෝණිතධාරිණඃ ।
ආකාශං තදනාකාශං චක්රුර්භීමා වලාහකාඃ ॥ 7 ॥
බභූව තිමිරං ඝෝරමුද්ධතං රෝමහර්ෂණම් ।
දිශෝ වා විදිශෝ වාපි න ච ව්යක්තං චකාශිරේ ॥ 8 ॥
ක්ෂතජාර්ද්රසවර්ණාභා සංධ්යාකාලං විනා බභෞ ।
ඛරස්යාභිමුඛා නේදුස්තදා ඝෝරමෘගාඃ ඛගාඃ ॥ 9 ॥
කංකගෝමායුගෘධ්රාශ්ච චුක්රුශුර්භයශංසිනඃ ।
නිත්යාශුභකරා යුද්ධේ ශිවා ඝෝරනිදර්ශනාඃ ॥ 10 ॥
නේදුර්බලස්යාභිමුඛං ජ්වාලෝද්ගාරිභිරානනෛඃ ।
කබංධඃ පරිඝාභාසෝ දෘශ්යතේ භාස්කරාංතිකේ ॥ 11 ॥
ජග්රාහ සූර්යං ස්වර්භානුරපර්වණි මහාග්රහඃ ।
ප්රවාති මාරුතශ්ශීඝ්රං නිෂ්ප්රභෝऽභූද්දිවාකරඃ ॥ 12 ॥
උත්පේතුශ්ච විනා රාත්රිං තාරාඃ ඛද්යෝතසප්රභාඃ ।
සංලීනමීනවිහගා නලින්යශ්ශුෂ්කපංකජාඃ ॥ 13 ॥
තස්මින් ක්ෂණේ බභූවුශ්ච විනා පුෂ්පඵලෛර්ද්රුමාඃ ।
උද්ධූතශ්ච විනා වාතං රේණුර්ජලධරාරුණඃ ॥ 14 ॥
වීචීකූචීති වාශ්යංත්යෝ බභූවුස්තත්ර ශාරිකාඃ ।
උල්කාශ්චාපි සනිර්ඝාතා නිපේතුර්ඝෝරදර්ශනාඃ ॥ 15 ॥
ප්රචචාල මහී සර්වා සශෛලවනකානනා ।
ඛරස්ය ච රථස්ථස්ය නර්දමානස්ය ධීමතඃ ॥ 16 ॥
ප්රාකංපත භුජස්සව්යස්ස්වරශ්චාස්යාවසජ්ජත ।
සාස්රා සංපද්යතේ දෘෂ්ටිඃ පශ්යමානස්ය සර්වතඃ ॥ 17 ॥
ලලාටේ ච රුජා ජාතා න ච මෝහාන්යවර්තත ।
තාන්සමීක්ෂය මහෝත්පාතානුත්ථිතාන්රෝමහර්ෂණාන් ॥ 18 ॥
අබ්රවීද්රාක්ෂසාන්සර්වාන්ප්රහසන්සඛරස්තදා ।
මහෝත්පාතානිමාන්සර්වානුත්ථිතාන්ඝෝරදර්ශනාන් ॥ 19 ॥
න චිංතයාම්යහං වීර්යාද්බලවාංදුර්බලානිව ।
තාරා අපි ශරෛස්තීක්ෂ්ණෛඃ පාතයාමි නභස්ස්ථලාත් ॥ 20 ॥
මෘත්යුං මරණධර්මේණ සංක්රුද්ධෝ යෝජයාම්යහම් ।
රාඝවං තං බලෝත්සික්තං භ්රාතරං චාස්ය ලක්ෂ්මණම් ॥ 21 ॥
අහත්වා සායකෛස්තීක්ෂ්ණෛර්නෝපාවර්තිතුමුත්සහේ ।
සකාමා භගිනී මේऽස්තු පීත්වා තු රුධිරං තයෝඃ ॥ 22 ॥
යන්නිමිත්තස්තු රාමස්ය ලක්ෂ්මණස්ය විපර්යයඃ ।
න ක්වචිත්ප්රාප්තපූර්වෝ මේ සංයුගේෂු පරාජයඃ ॥ 23 ॥
යුෂ්මාකමේතත්ප්රත්යක්ෂං නානෘතං කථයාම්යහම් ।
දේවරාජමපි ක්රුද්ධෝ මත්තෛරාවතයායිනම් ॥ 24 ॥
වජ්රහස්තං රණේ හන්යාං කිං පුනස්තෞ කුමානුෂෞ ।
සා තස්ය ගර්ජිතං ශ්රුත්වා රාක්ෂසස්ය මහාචමූඃ ॥ 25 ॥
ප්රහර්ෂමතුලං ලේභේ මෘත්යුපාශාවපාශිතා ।
සමීයුශ්ච මහාත්මානෝ යුද්ධදර්ශනකාංක්ෂිණඃ ॥ 26 ॥
ඍෂයෝ දේවගංදර්වාස්සිද්ධාශ්ච සහචාරණෛඃ ।
සමේත්ය චෝචුස්සහිතාස්තේऽන්යෝන්යං පුණ්යකර්මණඃ ।
ස්වස්ති ගෝබ්රාහ්මණේභ්යෝऽස්තු ලෝකානාං යේऽභිසංගතාඃ ॥ 27 ॥
ජයතාං රාඝවස්සංඛ්යේ පෞලස්ත්යාන් රජනීචරාන් ॥ 28 ॥
චක්රහස්තෝ යථා යුද්ධේ සර්වානසුරපුංගවාන් ।
ඒතච්චාන්යච්ච බහුශෝ බ්රුවාණාඃ පරමර්ෂයඃ ॥ 29 ॥
ජාතකෞතූහලාස්තත්ර විමානස්ථාශ්ච දේවතාඃ ।
දදෘශුර්වාහිනීං තේෂාං රාක්ෂසානාං ගතායුෂාම් ॥ 30 ॥
රථේන තු ඛරෝ වේගාදුග්රසෛන්යෝ විනිස්සෘතඃ ।
තං දෘෂ්ට්වා රාක්ෂසං භූයෝ රාක්ෂසාශ්ච විනිස්සෘතාඃ ॥ 31 ॥
ශ්යේනගාමී පෘථුග්රීවෝ යජ්ඤශත්රුර්විහංගමඃ ।
දුර්ජයඃ කරවීරාක්ෂඃ පරුෂඃ කාලකාර්මුකඃ ॥ 32 ॥
මේඝමාලී මහාමාලී සර්වාස්යෝ රුධිරාශනඃ ।
ද්වාදශෛතේ මහාවීර්යාඃ ප්රතස්ථුරභිතඃ ඛරම් ॥ 33 ॥
මහාකපාලිස්ස්ථූලාක්ෂඃ ප්රමාථී ත්රිශිරාස්තථා ।
චත්වාර ඒතේ සේනාන්යෝ දූෂණං පෘෂ්ඨතෝ යයුඃ ॥ 34 ॥
සා භීමවේගා සමරාභිකාමා මහාබලා රාක්ෂසවීරසේනා ।
තෞ රාජපුත්රෞ සහසාභ්යුපේතා මාලා ග්රහාණාමිව චංද්රසූර්යෞ ॥ 35 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ත්රයෝවිංශස්සර්ගඃ ॥
