ശ്രീമദ്വാല്മീകീയ രാമായണേ അരണ്യകാംഡമ് ।
അഥ ത്രയോവിംശസ്സര്ഗഃ ।
തസ്മിന്യാതേ ബലേ ഘോരമശിവം ശോണിതോദകമ് ।
അഭ്യവര്ഷന്മഹാമേഘസ്തുമുലോ ഗര്ദഭാരുണഃ ॥ 1 ॥
നിപേതുസ്തുരഗാസ്തസ്യ രഥയുക്താ മഹാജവാഃ ।
സമേ പുഷ്പചിതേ ദേശേ രാജമാര്ഗേ യദൃച്ഛയാ ॥ 2 ॥
ശ്യാമം രുധിരപര്യംതം ബഭൂവ പരിവേഷണമ് ।
അലാതചക്രപ്രതിമം പരിഗൃഹ്യ ദിവാകരമ് ॥ 3 ॥
തതോ ധ്വജമുപാഗമ്യ ഹേമദംഡം സമുച്ഛ്രിതമ് ।
സമാക്രമ്യ മഹാകായസ്തസ്ഥൌ ഗൃധ്രസ്സുദാരുണഃ ॥ 4 ॥
ജനസ്ഥാനസമീപേ തു സമാഗമ്യ ഖരസ്വനാഃ ।
വിസ്വരാന്വിവിധാംശ്ചക്രുര്മാംസാദാ മൃഗപക്ഷിണഃ ॥ 5 ॥
വ്യാജഹ്രുശ്ച പ്രദീപ്തായാം ദിശി വൈ ഭൈരവസ്വനമ് ।
അശിവം യാതുധാനാനാം ശിവാ ഘോരാ മഹാസ്വനാഃ ॥ 6 ॥
പ്രഭിന്നഗിരിസംകാശാസ്തോയശോണിതധാരിണഃ ।
ആകാശം തദനാകാശം ചക്രുര്ഭീമാ വലാഹകാഃ ॥ 7 ॥
ബഭൂവ തിമിരം ഘോരമുദ്ധതം രോമഹര്ഷണമ് ।
ദിശോ വാ വിദിശോ വാപി ന ച വ്യക്തം ചകാശിരേ ॥ 8 ॥
ക്ഷതജാര്ദ്രസവര്ണാഭാ സംധ്യാകാലം വിനാ ബഭൌ ।
ഖരസ്യാഭിമുഖാ നേദുസ്തദാ ഘോരമൃഗാഃ ഖഗാഃ ॥ 9 ॥
കംകഗോമായുഗൃധ്രാശ്ച ചുക്രുശുര്ഭയശംസിനഃ ।
നിത്യാശുഭകരാ യുദ്ധേ ശിവാ ഘോരനിദര്ശനാഃ ॥ 10 ॥
നേദുര്ബലസ്യാഭിമുഖം ജ്വാലോദ്ഗാരിഭിരാനനൈഃ ।
കബംധഃ പരിഘാഭാസോ ദൃശ്യതേ ഭാസ്കരാംതികേ ॥ 11 ॥
ജഗ്രാഹ സൂര്യം സ്വര്ഭാനുരപർവണി മഹാഗ്രഹഃ ।
പ്രവാതി മാരുതശ്ശീഘ്രം നിഷ്പ്രഭോഽഭൂദ്ദിവാകരഃ ॥ 12 ॥
ഉത്പേതുശ്ച വിനാ രാത്രിം താരാഃ ഖദ്യോതസപ്രഭാഃ ।
സംലീനമീനവിഹഗാ നലിന്യശ്ശുഷ്കപംകജാഃ ॥ 13 ॥
തസ്മിന് ക്ഷണേ ബഭൂവുശ്ച വിനാ പുഷ്പഫലൈര്ദ്രുമാഃ ।
ഉദ്ധൂതശ്ച വിനാ വാതം രേണുര്ജലധരാരുണഃ ॥ 14 ॥
വീചീകൂചീതി വാശ്യംത്യോ ബഭൂവുസ്തത്ര ശാരികാഃ ।
ഉല്കാശ്ചാപി സനിര്ഘാതാ നിപേതുര്ഘോരദര്ശനാഃ ॥ 15 ॥
പ്രചചാല മഹീ സർവാ സശൈലവനകാനനാ ।
ഖരസ്യ ച രഥസ്ഥസ്യ നര്ദമാനസ്യ ധീമതഃ ॥ 16 ॥
പ്രാകംപത ഭുജസ്സവ്യസ്സ്വരശ്ചാസ്യാവസജ്ജത ।
സാസ്രാ സംപദ്യതേ ദൃഷ്ടിഃ പശ്യമാനസ്യ സർവതഃ ॥ 17 ॥
ലലാടേ ച രുജാ ജാതാ ന ച മോഹാന്യവര്തത ।
താന്സമീക്ഷയ മഹോത്പാതാനുത്ഥിതാന്രോമഹര്ഷണാന് ॥ 18 ॥
അബ്രവീദ്രാക്ഷസാന്സർവാന്പ്രഹസന്സഖരസ്തദാ ।
മഹോത്പാതാനിമാന്സർവാനുത്ഥിതാന്ഘോരദര്ശനാന് ॥ 19 ॥
ന ചിംതയാമ്യഹം വീര്യാദ്ബലവാംദുര്ബലാനിവ ।
താരാ അപി ശരൈസ്തീക്ഷ്ണൈഃ പാതയാമി നഭസ്സ്ഥലാത് ॥ 20 ॥
മൃത്യും മരണധര്മേണ സംക്രുദ്ധോ യോജയാമ്യഹമ് ।
രാഘവം തം ബലോത്സിക്തം ഭ്രാതരം ചാസ്യ ലക്ഷ്മണമ് ॥ 21 ॥
അഹത്വാ സായകൈസ്തീക്ഷ്ണൈര്നോപാവര്തിതുമുത്സഹേ ।
സകാമാ ഭഗിനീ മേഽസ്തു പീത്വാ തു രുധിരം തയോഃ ॥ 22 ॥
യന്നിമിത്തസ്തു രാമസ്യ ലക്ഷ്മണസ്യ വിപര്യയഃ ।
ന ക്വചിത്പ്രാപ്തപൂർവോ മേ സംയുഗേഷു പരാജയഃ ॥ 23 ॥
യുഷ്മാകമേതത്പ്രത്യക്ഷം നാനൃതം കഥയാമ്യഹമ് ।
ദേവരാജമപി ക്രുദ്ധോ മത്തൈരാവതയായിനമ് ॥ 24 ॥
വജ്രഹസ്തം രണേ ഹന്യാം കിം പുനസ്തൌ കുമാനുഷൌ ।
സാ തസ്യ ഗര്ജിതം ശ്രുത്വാ രാക്ഷസസ്യ മഹാചമൂഃ ॥ 25 ॥
പ്രഹര്ഷമതുലം ലേഭേ മൃത്യുപാശാവപാശിതാ ।
സമീയുശ്ച മഹാത്മാനോ യുദ്ധദര്ശനകാംക്ഷിണഃ ॥ 26 ॥
ഋഷയോ ദേവഗംദർവാസ്സിദ്ധാശ്ച സഹചാരണൈഃ ।
സമേത്യ ചോചുസ്സഹിതാസ്തേഽന്യോന്യം പുണ്യകര്മണഃ ।
സ്വസ്തി ഗോബ്രാഹ്മണേഭ്യോഽസ്തു ലോകാനാം യേഽഭിസംഗതാഃ ॥ 27 ॥
ജയതാം രാഘവസ്സംഖ്യേ പൌലസ്ത്യാന് രജനീചരാന് ॥ 28 ॥
ചക്രഹസ്തോ യഥാ യുദ്ധേ സർവാനസുരപുംഗവാന് ।
ഏതച്ചാന്യച്ച ബഹുശോ ബ്രുവാണാഃ പരമര്ഷയഃ ॥ 29 ॥
ജാതകൌതൂഹലാസ്തത്ര വിമാനസ്ഥാശ്ച ദേവതാഃ ।
ദദൃശുർവാഹിനീം തേഷാം രാക്ഷസാനാം ഗതായുഷാമ് ॥ 30 ॥
രഥേന തു ഖരോ വേഗാദുഗ്രസൈന്യോ വിനിസ്സൃതഃ ।
തം ദൃഷ്ട്വാ രാക്ഷസം ഭൂയോ രാക്ഷസാശ്ച വിനിസ്സൃതാഃ ॥ 31 ॥
ശ്യേനഗാമീ പൃഥുഗ്രീവോ യജ്ഞശത്രുർവിഹംഗമഃ ।
ദുര്ജയഃ കരവീരാക്ഷഃ പരുഷഃ കാലകാര്മുകഃ ॥ 32 ॥
മേഘമാലീ മഹാമാലീ സർവാസ്യോ രുധിരാശനഃ ।
ദ്വാദശൈതേ മഹാവീര്യാഃ പ്രതസ്ഥുരഭിതഃ ഖരമ് ॥ 33 ॥
മഹാകപാലിസ്സ്ഥൂലാക്ഷഃ പ്രമാഥീ ത്രിശിരാസ്തഥാ ।
ചത്വാര ഏതേ സേനാന്യോ ദൂഷണം പൃഷ്ഠതോ യയുഃ ॥ 34 ॥
സാ ഭീമവേഗാ സമരാഭികാമാ മഹാബലാ രാക്ഷസവീരസേനാ ।
തൌ രാജപുത്രൌ സഹസാഭ്യുപേതാ മാലാ ഗ്രഹാണാമിവ ചംദ്രസൂര്യൌ ॥ 35 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ത്രയോവിംശസ്സര്ഗഃ ॥
