শ্রীমদ্বাল্মীকীয় রামাযণে অরণ্যকাংডম্ ।
অথ অষ্টাবিংশস্সর্গঃ ।
নিহতং দূষণং দৃষ্ট্বা রণে ত্রিশিরসা সহ ।
খরস্য়াপ্যভবত্ত্রাসো দৃষ্ট্বা রামস্য় বিক্রমম্ ॥ 1 ॥
স দৃষ্ট্বা রাক্ষসং সৈন্যমবিসহ্য়ং মহাবলঃ ।
হতমেকেন রামেণ ত্রিশিরোদূষণাবপি ॥ 2 ॥
তদ্বলং হতভূয়িষ্ঠং বিমনাঃ প্রেক্ষ্য় রাক্ষসঃ ।
আসসাদ খরো রামং নমুচির্বাসবং যথা ॥ 3 ॥
বিকৃষ্য় বলবচ্চাপং নারাচান্রক্তভোজনান্ ।
খরশ্চিক্ষেপ রামায় ক্রুদ্ধানাশীবিষানিব ॥ 4 ॥
জ্য়াং বিধূন্বংসুবহুশশ্শিক্ষয়াস্ত্রাণি দর্শযন্ ।
চচার সমরে মার্গাংছরৈ রথগতঃ খরঃ ॥ 5 ॥
স সর্বাশ্চ দিশো বাণৈঃ প্রদিশশ্চ মহারথঃ ।
পূরয়ামাস তং দৃষ্ট্বা রামোঽপি সুমহদ্ধনুঃ ॥ 6 ॥
স সাযকৈর্দুর্বিসহৈস্সস্ফুলিংগৈরিবাগ্নিভিঃ ।
নভশ্চকারাবিবরং পর্জন্য় ইব বৃষ্টিভিঃ ॥ 7 ॥
তদ্বভূব শিতৈর্বাণৈঃ খররামবিসর্জিতৈঃ ।
পর্য়াকাশমনাকাশং সর্বতশ্শরসংকুলম্ ॥ 8 ॥
শরজালাবৃতস্সূর্য়ো ন তদা স্ম প্রকাশতে ।
অন্য়োন্যবধসংরংভাদুভয়োস্সংপ্রয়ুধ্যতোঃ ॥ 9 ॥
ততো নালীকনারাচৈস্তীক্ষ্ণাগ্রৈশ্চ বিকর্ণিভিঃ ।
আজঘান খরো রামং তোত্রৈরিব মহাদ্বিপম্ ॥ 10 ॥
তং রথস্থং ধনুষ্পাণিং রাক্ষসং পর্যবস্থিতম্ ।
দদৃশুস্সর্বভূতানি পাশহস্তমিবাংতকম্ ॥ 11 ॥
হংতারং সর্বসৈন্যস্য় পৌরুষে পর্যবস্থিতম্ ।
পরিশ্রাংতং মহাসত্বং মেনে রামং খরস্তদা ॥ 12 ॥
তং সিংহমিব বিক্রাংতং সিংহবিক্রাংতগামিনম্ ।
দৃষ্ট্বা নোদ্বিজতে রামঃ সিংহঃ ক্ষুদ্রমৃগং যথা ॥ 13 ॥
ততঃ সূর্যনিকাশেন রথেন মহতা খরঃ ।
আসসাদ রণে রামং পতংগ ইব পাবকম্ ॥ 14 ॥
ততোঽস্য় সশরং চাপং মুষ্টিদেশে মহাত্মনঃ ।
খরশ্চিচ্ছেদ রামস্য় দর্শযন্পাণিলাঘবম্ ॥ 15 ॥
স পুনস্ত্বপরান্সপ্ত শরানাদায় বর্মণি ।
নিজঘান খরঃ ক্রুদ্ধশ্শক্রাশনিসমপ্রভান্ ॥ 16 ॥
ততস্তত্প্রহতং বাণৈঃ খরমুক্তৈস্সুপর্বভিঃ ।
পপাত কবচং ভূমৌ রামস্য়াদিত্যবর্চসঃ ॥ 17 ॥
ততশ্শরসহস্রেণ রামমপ্রতিমৌজসম্ ।
অর্দয়িত্বা মহানাদং ননাদ সমরে খরঃ ॥ 18 ॥
স শরৈরর্দিতঃ ক্রুদ্ধস্সর্বগাত্রেষু রাঘবঃ ।
ররাজ সমরে রামো বিধূমোঽগ্নিরিব জ্বলন্ ॥ 19 ॥
ততো গংভীরনির্হ্রাদং রামশ্শত্রুনিবর্হণঃ ।
চকারাংতায় স রিপোস্সজ্যমন্যন্মহদ্ধনুঃ ॥ 20 ॥
সুমহদ্বৈষ্ণবং যত্তদতিসৃষ্টং মহর্ষিণা ।
বরং তদ্ধনুরুদ্যম্য় খরং সমভিধাবত ॥ 21 ॥
ততঃ কনকপুংখৈস্তু শরৈস্সন্নতপর্বভিঃ ।
বিভেদ রামস্সংক্রুদ্ধঃ খরস্য় সমরে ধ্বজম্ ॥ 22 ॥
স দর্শনীয়ো বহুধা বিকীর্ণঃ কাংচনধ্বজঃ ।
জগাম ধরণীং সূর্য়ো দেবতানামিবাজ্ঞয়া ॥ 23 ॥
তং চতুর্ভিঃ খরঃ ক্রুদ্ধো রামং গাত্রেষু মার্গণৈঃ ।
বিব্য়াধ যুধি মর্মজ্ঞো মাতংগমিব তোমরৈঃ ॥ 24 ॥
স রামো বহুভির্বাণৈঃ খরকার্মুকনিস্সৃতৈঃ ।
বিদ্ধো রুধিরসিক্তাংগো বভূব রুষিতো ভৃশম্ ॥ 25 ॥
স ধনুর্ধন্বিনাং শ্রেষ্ঠঃ প্রগৃহ্য় পরমাহবে ।
মুমোচ পরমেষ্বাসষ্ষট্ছরানভিলক্ষিতান্ ॥ 26 ॥
শিরস্য়েকেন বাণেন দ্বাভ্য়াং বহ্বোরথার্দযত্ ।
ত্রিভিশ্চংদ্রার্ধবক্ত্রৈশ্চ বক্ষস্যভিজঘান হ ॥ 27 ॥
ততঃ পশ্চান্মহাতেজা নারাচান্ভাস্করোপমান্ ।
জিঘাংসূ রাক্ষসংকৃদ্ধস্ত্রয়োদশ সমাদদে ॥ 28 ॥
ততোঽস্য় যুগমেকেন চতুর্ভিশ্চতুরো হয়ান্ ।
ষষ্ঠেন তু শিরস্সংখ্য়ে খরস্য় রথসারথেঃ ॥ 29 ॥
ত্রিভিস্ত্রিবেণুং বলবাংদ্বাভ্য়ামক্ষং মহাবলঃ ।
দ্বাদশেন তু বাণেন খরস্য় সশরং ধনুঃ ॥ 30 ॥
ছিত্বা বজ্রনিকাশেন রাঘবঃ প্রহসন্নিব ।
ত্রয়োদশেনেংদ্রসমো বিভেদ সমরে খরম্ ॥ 31 ॥
প্রভগ্নধন্বা বিরথো হতাশ্বো হতসারথিঃ ।
গদাপাণিরবপ্লুত্য় তস্থৌ ভূমৌ খরস্তদা ॥ 32 ॥
তত্কর্ম রামস্য় মহারথস্য় সমেত্য় দেবাশ্চ মহর্ষযশ্চ ।
অপূজযন্প্রাংজলয়ঃ প্রহৃষ্টাঃ তদা বিমানাগ্রগতাস্সমেতাঃ ॥ 33 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে অষ্টাবিংশস্সর্গঃ ॥
