ශ්රීමද්වාල්මීකීය රාමායණේ අරණ්යකාංඩම් ।
අථ අෂ්ටාවිංශස්සර්ගඃ ।
නිහතං දූෂණං දෘෂ්ට්වා රණේ ත්රිශිරසා සහ ।
ඛරස්යාප්යභවත්ත්රාසෝ දෘෂ්ට්වා රාමස්ය වික්රමම් ॥ 1 ॥
ස දෘෂ්ට්වා රාක්ෂසං සෛන්යමවිසහ්යං මහාබලඃ ।
හතමේකේන රාමේණ ත්රිශිරෝදූෂණාවපි ॥ 2 ॥
තද්බලං හතභූයිෂ්ඨං විමනාඃ ප්රේක්ෂ්ය රාක්ෂසඃ ।
ආසසාද ඛරෝ රාමං නමුචිර්වාසවං යථා ॥ 3 ॥
විකෘෂ්ය බලවච්චාපං නාරාචාන්රක්තභෝජනාන් ।
ඛරශ්චික්ෂේප රාමාය ක්රුද්ධානාශීවිෂානිව ॥ 4 ॥
ජ්යාං විධූන්වංසුබහුශශ්ශික්ෂයාස්ත්රාණි දර්ශයන් ।
චචාර සමරේ මාර්ගාංඡරෛ රථගතඃ ඛරඃ ॥ 5 ॥
ස සර්වාශ්ච දිශෝ බාණෛඃ ප්රදිශශ්ච මහාරථඃ ।
පූරයාමාස තං දෘෂ්ට්වා රාමෝऽපි සුමහද්ධනුඃ ॥ 6 ॥
ස සායකෛර්දුර්විසහෛස්සස්ඵුලිංගෛරිවාග්නිභිඃ ।
නභශ්චකාරාවිවරං පර්ජන්ය ඉව වෘෂ්ටිභිඃ ॥ 7 ॥
තද්බභූව ශිතෛර්බාණෛඃ ඛරරාමවිසර්ජිතෛඃ ।
පර්යාකාශමනාකාශං සර්වතශ්ශරසංකුලම් ॥ 8 ॥
ශරජාලාවෘතස්සූර්යෝ න තදා ස්ම ප්රකාශතේ ।
අන්යෝන්යවධසංරංභාදුභයෝස්සංප්රයුධ්යතෝඃ ॥ 9 ॥
තතෝ නාලීකනාරාචෛස්තීක්ෂ්ණාග්රෛශ්ච විකර්ණිභිඃ ।
ආජඝාන ඛරෝ රාමං තෝත්රෛරිව මහාද්විපම් ॥ 10 ॥
තං රථස්ථං ධනුෂ්පාණිං රාක්ෂසං පර්යවස්ථිතම් ।
දදෘශුස්සර්වභූතානි පාශහස්තමිවාංතකම් ॥ 11 ॥
හංතාරං සර්වසෛන්යස්ය පෞරුෂේ පර්යවස්ථිතම් ।
පරිශ්රාංතං මහාසත්වං මේනේ රාමං ඛරස්තදා ॥ 12 ॥
තං සිංහමිව වික්රාංතං සිංහවික්රාංතගාමිනම් ।
දෘෂ්ට්වා නෝද්විජතේ රාමඃ සිංහඃ ක්ෂුද්රමෘගං යථා ॥ 13 ॥
තතඃ සූර්යනිකාශේන රථේන මහතා ඛරඃ ।
ආසසාද රණේ රාමං පතංග ඉව පාවකම් ॥ 14 ॥
තතෝऽස්ය සශරං චාපං මුෂ්ටිදේශේ මහාත්මනඃ ।
ඛරශ්චිච්ඡේද රාමස්ය දර්ශයන්පාණිලාඝවම් ॥ 15 ॥
ස පුනස්ත්වපරාන්සප්ත ශරානාදාය වර්මණි ।
නිජඝාන ඛරඃ ක්රුද්ධශ්ශක්රාශනිසමප්රභාන් ॥ 16 ॥
තතස්තත්ප්රහතං බාණෛඃ ඛරමුක්තෛස්සුපර්වභිඃ ।
පපාත කවචං භූමෞ රාමස්යාදිත්යවර්චසඃ ॥ 17 ॥
තතශ්ශරසහස්රේණ රාමමප්රතිමෞජසම් ।
අර්දයිත්වා මහානාදං නනාද සමරේ ඛරඃ ॥ 18 ॥
ස ශරෛරර්දිතඃ ක්රුද්ධස්සර්වගාත්රේෂු රාඝවඃ ।
රරාජ සමරේ රාමෝ විධූමෝऽග්නිරිව ජ්වලන් ॥ 19 ॥
තතෝ ගංභීරනිර්හ්රාදං රාමශ්ශත්රුනිබර්හණඃ ।
චකාරාංතාය ස රිපෝස්සජ්යමන්යන්මහද්ධනුඃ ॥ 20 ॥
සුමහද්වෛෂ්ණවං යත්තදතිසෘෂ්ටං මහර්ෂිණා ।
වරං තද්ධනුරුද්යම්ය ඛරං සමභිධාවත ॥ 21 ॥
තතඃ කනකපුංඛෛස්තු ශරෛස්සන්නතපර්වභිඃ ।
බිභේද රාමස්සංක්රුද්ධඃ ඛරස්ය සමරේ ධ්වජම් ॥ 22 ॥
ස දර්ශනීයෝ බහුධා විකීර්ණඃ කාංචනධ්වජඃ ।
ජගාම ධරණීං සූර්යෝ දේවතානාමිවාජ්ඤයා ॥ 23 ॥
තං චතුර්භිඃ ඛරඃ ක්රුද්ධෝ රාමං ගාත්රේෂු මාර්ගණෛඃ ।
විව්යාධ යුධි මර්මජ්ඤෝ මාතංගමිව තෝමරෛඃ ॥ 24 ॥
ස රාමෝ බහුභිර්බාණෛඃ ඛරකාර්මුකනිස්සෘතෛඃ ।
විද්ධෝ රුධිරසික්තාංගෝ බභූව රුෂිතෝ භෘශම් ॥ 25 ॥
ස ධනුර්ධන්විනාං ශ්රේෂ්ඨඃ ප්රගෘහ්ය පරමාහවේ ।
මුමෝච පරමේෂ්වාසෂ්ෂට්ඡරානභිලක්ෂිතාන් ॥ 26 ॥
ශිරස්යේකේන බාණේන ද්වාභ්යාං බහ්වෝරථාර්දයත් ।
ත්රිභිශ්චංද්රාර්ධවක්ත්රෛශ්ච වක්ෂස්යභිජඝාන හ ॥ 27 ॥
තතඃ පශ්චාන්මහාතේජා නාරාචාන්භාස්කරෝපමාන් ।
ජිඝාංසූ රාක්ෂසංකෘද්ධස්ත්රයෝදශ සමාදදේ ॥ 28 ॥
තතෝऽස්ය යුගමේකේන චතුර්භිශ්චතුරෝ හයාන් ।
ෂෂ්ඨේන තු ශිරස්සංඛ්යේ ඛරස්ය රථසාරථේඃ ॥ 29 ॥
ත්රිභිස්ත්රිවේණුං බලවාංද්වාභ්යාමක්ෂං මහාබලඃ ।
ද්වාදශේන තු බාණේන ඛරස්ය සශරං ධනුඃ ॥ 30 ॥
ඡිත්වා වජ්රනිකාශේන රාඝවඃ ප්රහසන්නිව ।
ත්රයෝදශේනේංද්රසමෝ බිභේද සමරේ ඛරම් ॥ 31 ॥
ප්රභග්නධන්වා විරථෝ හතාශ්වෝ හතසාරථිඃ ।
ගදාපාණිරවප්ලුත්ය තස්ථෞ භූමෞ ඛරස්තදා ॥ 32 ॥
තත්කර්ම රාමස්ය මහාරථස්ය සමේත්ය දේවාශ්ච මහර්ෂයශ්ච ।
අපූජයන්ප්රාංජලයඃ ප්රහෘෂ්ටාඃ තදා විමානාග්රගතාස්සමේතාඃ ॥ 33 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ අෂ්ටාවිංශස්සර්ගඃ ॥
