ശ്രീമദ്വാല്മീകീയ രാമായണേ അരണ്യകാംഡമ് ।
അഥ അഷ്ടാവിംശസ്സര്ഗഃ ।
നിഹതം ദൂഷണം ദൃഷ്ട്വാ രണേ ത്രിശിരസാ സഹ ।
ഖരസ്യാപ്യഭവത്ത്രാസോ ദൃഷ്ട്വാ രാമസ്യ വിക്രമമ് ॥ 1 ॥
സ ദൃഷ്ട്വാ രാക്ഷസം സൈന്യമവിസഹ്യം മഹാബലഃ ।
ഹതമേകേന രാമേണ ത്രിശിരോദൂഷണാവപി ॥ 2 ॥
തദ്ബലം ഹതഭൂയിഷ്ഠം വിമനാഃ പ്രേക്ഷ്യ രാക്ഷസഃ ।
ആസസാദ ഖരോ രാമം നമുചിർവാസവം യഥാ ॥ 3 ॥
വികൃഷ്യ ബലവച്ചാപം നാരാചാന്രക്തഭോജനാന് ।
ഖരശ്ചിക്ഷേപ രാമായ ക്രുദ്ധാനാശീവിഷാനിവ ॥ 4 ॥
ജ്യാം വിധൂന്വംസുബഹുശശ്ശിക്ഷയാസ്ത്രാണി ദര്ശയന് ।
ചചാര സമരേ മാര്ഗാംഛരൈ രഥഗതഃ ഖരഃ ॥ 5 ॥
സ സർവാശ്ച ദിശോ ബാണൈഃ പ്രദിശശ്ച മഹാരഥഃ ।
പൂരയാമാസ തം ദൃഷ്ട്വാ രാമോഽപി സുമഹദ്ധനുഃ ॥ 6 ॥
സ സായകൈര്ദുർവിസഹൈസ്സസ്ഫുലിംഗൈരിവാഗ്നിഭിഃ ।
നഭശ്ചകാരാവിവരം പര്ജന്യ ഇവ വൃഷ്ടിഭിഃ ॥ 7 ॥
തദ്ബഭൂവ ശിതൈര്ബാണൈഃ ഖരരാമവിസര്ജിതൈഃ ।
പര്യാകാശമനാകാശം സർവതശ്ശരസംകുലമ് ॥ 8 ॥
ശരജാലാവൃതസ്സൂര്യോ ന തദാ സ്മ പ്രകാശതേ ।
അന്യോന്യവധസംരംഭാദുഭയോസ്സംപ്രയുധ്യതോഃ ॥ 9 ॥
തതോ നാലീകനാരാചൈസ്തീക്ഷ്ണാഗ്രൈശ്ച വികര്ണിഭിഃ ।
ആജഘാന ഖരോ രാമം തോത്രൈരിവ മഹാദ്വിപമ് ॥ 10 ॥
തം രഥസ്ഥം ധനുഷ്പാണിം രാക്ഷസം പര്യവസ്ഥിതമ് ।
ദദൃശുസ്സർവഭൂതാനി പാശഹസ്തമിവാംതകമ് ॥ 11 ॥
ഹംതാരം സർവസൈന്യസ്യ പൌരുഷേ പര്യവസ്ഥിതമ് ।
പരിശ്രാംതം മഹാസത്വം മേനേ രാമം ഖരസ്തദാ ॥ 12 ॥
തം സിംഹമിവ വിക്രാംതം സിംഹവിക്രാംതഗാമിനമ് ।
ദൃഷ്ട്വാ നോദ്വിജതേ രാമഃ സിംഹഃ ക്ഷുദ്രമൃഗം യഥാ ॥ 13 ॥
തതഃ സൂര്യനികാശേന രഥേന മഹതാ ഖരഃ ।
ആസസാദ രണേ രാമം പതംഗ ഇവ പാവകമ് ॥ 14 ॥
തതോഽസ്യ സശരം ചാപം മുഷ്ടിദേശേ മഹാത്മനഃ ।
ഖരശ്ചിച്ഛേദ രാമസ്യ ദര്ശയന്പാണിലാഘവമ് ॥ 15 ॥
സ പുനസ്ത്വപരാന്സപ്ത ശരാനാദായ വര്മണി ।
നിജഘാന ഖരഃ ക്രുദ്ധശ്ശക്രാശനിസമപ്രഭാന് ॥ 16 ॥
തതസ്തത്പ്രഹതം ബാണൈഃ ഖരമുക്തൈസ്സുപർവഭിഃ ।
പപാത കവചം ഭൂമൌ രാമസ്യാദിത്യവര്ചസഃ ॥ 17 ॥
തതശ്ശരസഹസ്രേണ രാമമപ്രതിമൌജസമ് ।
അര്ദയിത്വാ മഹാനാദം നനാദ സമരേ ഖരഃ ॥ 18 ॥
സ ശരൈരര്ദിതഃ ക്രുദ്ധസ്സർവഗാത്രേഷു രാഘവഃ ।
രരാജ സമരേ രാമോ വിധൂമോഽഗ്നിരിവ ജ്വലന് ॥ 19 ॥
തതോ ഗംഭീരനിര്ഹ്രാദം രാമശ്ശത്രുനിബര്ഹണഃ ।
ചകാരാംതായ സ രിപോസ്സജ്യമന്യന്മഹദ്ധനുഃ ॥ 20 ॥
സുമഹദ്വൈഷ്ണവം യത്തദതിസൃഷ്ടം മഹര്ഷിണാ ।
വരം തദ്ധനുരുദ്യമ്യ ഖരം സമഭിധാവത ॥ 21 ॥
തതഃ കനകപുംഖൈസ്തു ശരൈസ്സന്നതപർവഭിഃ ।
ബിഭേദ രാമസ്സംക്രുദ്ധഃ ഖരസ്യ സമരേ ധ്വജമ് ॥ 22 ॥
സ ദര്ശനീയോ ബഹുധാ വികീര്ണഃ കാംചനധ്വജഃ ।
ജഗാമ ധരണീം സൂര്യോ ദേവതാനാമിവാജ്ഞയാ ॥ 23 ॥
തം ചതുര്ഭിഃ ഖരഃ ക്രുദ്ധോ രാമം ഗാത്രേഷു മാര്ഗണൈഃ ।
വിവ്യാധ യുധി മര്മജ്ഞോ മാതംഗമിവ തോമരൈഃ ॥ 24 ॥
സ രാമോ ബഹുഭിര്ബാണൈഃ ഖരകാര്മുകനിസ്സൃതൈഃ ।
വിദ്ധോ രുധിരസിക്താംഗോ ബഭൂവ രുഷിതോ ഭൃശമ് ॥ 25 ॥
സ ധനുര്ധന്വിനാം ശ്രേഷ്ഠഃ പ്രഗൃഹ്യ പരമാഹവേ ।
മുമോച പരമേഷ്വാസഷ്ഷട്ഛരാനഭിലക്ഷിതാന് ॥ 26 ॥
ശിരസ്യേകേന ബാണേന ദ്വാഭ്യാം ബഹ്വോരഥാര്ദയത് ।
ത്രിഭിശ്ചംദ്രാര്ധവക്ത്രൈശ്ച വക്ഷസ്യഭിജഘാന ഹ ॥ 27 ॥
തതഃ പശ്ചാന്മഹാതേജാ നാരാചാന്ഭാസ്കരോപമാന് ।
ജിഘാംസൂ രാക്ഷസംകൃദ്ധസ്ത്രയോദശ സമാദദേ ॥ 28 ॥
തതോഽസ്യ യുഗമേകേന ചതുര്ഭിശ്ചതുരോ ഹയാന് ।
ഷഷ്ഠേന തു ശിരസ്സംഖ്യേ ഖരസ്യ രഥസാരഥേഃ ॥ 29 ॥
ത്രിഭിസ്ത്രിവേണും ബലവാംദ്വാഭ്യാമക്ഷം മഹാബലഃ ।
ദ്വാദശേന തു ബാണേന ഖരസ്യ സശരം ധനുഃ ॥ 30 ॥
ഛിത്വാ വജ്രനികാശേന രാഘവഃ പ്രഹസന്നിവ ।
ത്രയോദശേനേംദ്രസമോ ബിഭേദ സമരേ ഖരമ് ॥ 31 ॥
പ്രഭഗ്നധന്വാ വിരഥോ ഹതാശ്വോ ഹതസാരഥിഃ ।
ഗദാപാണിരവപ്ലുത്യ തസ്ഥൌ ഭൂമൌ ഖരസ്തദാ ॥ 32 ॥
തത്കര്മ രാമസ്യ മഹാരഥസ്യ സമേത്യ ദേവാശ്ച മഹര്ഷയശ്ച ।
അപൂജയന്പ്രാംജലയഃ പ്രഹൃഷ്ടാഃ തദാ വിമാനാഗ്രഗതാസ്സമേതാഃ ॥ 33 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ അഷ്ടാവിംശസ്സര്ഗഃ ॥
