śrīmadvālmīkīya rāmāyaṇē araṇyakāṇḍam ।
atha aṣṭāviṃśassargaḥ ।
nihataṃ dūṣaṇaṃ dṛṣṭvā raṇē triśirasā saha ।
kharasyāpyabhavattrāsō dṛṣṭvā rāmasya vikramam ॥ 1 ॥
sa dṛṣṭvā rākṣasaṃ sainyamavisahyaṃ mahābalaḥ ।
hatamēkēna rāmēṇa triśirōdūṣaṇāvapi ॥ 2 ॥
tadbalaṃ hatabhūyiṣṭhaṃ vimanāḥ prēkṣya rākṣasaḥ ।
āsasāda kharō rāmaṃ namuchirvāsavaṃ yathā ॥ 3 ॥
vikṛṣya balavachchāpaṃ nārāchānraktabhōjanān ।
kharaśchikṣēpa rāmāya kruddhānāśīviṣāniva ॥ 4 ॥
jyāṃ vidhūnvaṃsubahuśaśśikṣayāstrāṇi darśayan ।
chachāra samarē mārgāñCharai rathagataḥ kharaḥ ॥ 5 ॥
sa sarvāścha diśō bāṇaiḥ pradiśaścha mahārathaḥ ।
pūrayāmāsa taṃ dṛṣṭvā rāmō'pi sumahaddhanuḥ ॥ 6 ॥
sa sāyakairdurvisahaissasphuliṅgairivāgnibhiḥ ।
nabhaśchakārāvivaraṃ parjanya iva vṛṣṭibhiḥ ॥ 7 ॥
tadbabhūva śitairbāṇaiḥ khararāmavisarjitaiḥ ।
paryākāśamanākāśaṃ sarvataśśarasaṅkulam ॥ 8 ॥
śarajālāvṛtassūryō na tadā sma prakāśatē ।
anyōnyavadhasaṃrambhādubhayōssamprayudhyatōḥ ॥ 9 ॥
tatō nālīkanārāchaistīkṣṇāgraiścha vikarṇibhiḥ ।
ājaghāna kharō rāmaṃ tōtrairiva mahādvipam ॥ 10 ॥
taṃ rathasthaṃ dhanuṣpāṇiṃ rākṣasaṃ paryavasthitam ।
dadṛśussarvabhūtāni pāśahastamivāntakam ॥ 11 ॥
hantāraṃ sarvasainyasya pauruṣē paryavasthitam ।
pariśrāntaṃ mahāsatvaṃ mēnē rāmaṃ kharastadā ॥ 12 ॥
taṃ siṃhamiva vikrāntaṃ siṃhavikrāntagāminam ।
dṛṣṭvā nōdvijatē rāmaḥ siṃhaḥ kṣudramṛgaṃ yathā ॥ 13 ॥
tataḥ sūryanikāśēna rathēna mahatā kharaḥ ।
āsasāda raṇē rāmaṃ pataṅga iva pāvakam ॥ 14 ॥
tatō'sya saśaraṃ chāpaṃ muṣṭidēśē mahātmanaḥ ।
kharaśchichChēda rāmasya darśayanpāṇilāghavam ॥ 15 ॥
sa punastvaparānsapta śarānādāya varmaṇi ।
nijaghāna kharaḥ kruddhaśśakrāśanisamaprabhān ॥ 16 ॥
tatastatprahataṃ bāṇaiḥ kharamuktaissuparvabhiḥ ।
papāta kavachaṃ bhūmau rāmasyādityavarchasaḥ ॥ 17 ॥
tataśśarasahasrēṇa rāmamapratimaujasam ।
ardayitvā mahānādaṃ nanāda samarē kharaḥ ॥ 18 ॥
sa śarairarditaḥ kruddhassarvagātrēṣu rāghavaḥ ।
rarāja samarē rāmō vidhūmō'gniriva jvalan ॥ 19 ॥
tatō gambhīranirhrādaṃ rāmaśśatrunibarhaṇaḥ ।
chakārāntāya sa ripōssajyamanyanmahaddhanuḥ ॥ 20 ॥
sumahadvaiṣṇavaṃ yattadatisṛṣṭaṃ maharṣiṇā ।
varaṃ taddhanurudyamya kharaṃ samabhidhāvata ॥ 21 ॥
tataḥ kanakapuṅkhaistu śaraissannataparvabhiḥ ।
bibhēda rāmassaṅkruddhaḥ kharasya samarē dhvajam ॥ 22 ॥
sa darśanīyō bahudhā vikīrṇaḥ kāñchanadhvajaḥ ।
jagāma dharaṇīṃ sūryō dēvatānāmivājñayā ॥ 23 ॥
taṃ chaturbhiḥ kharaḥ kruddhō rāmaṃ gātrēṣu mārgaṇaiḥ ।
vivyādha yudhi marmajñō mātaṅgamiva tōmaraiḥ ॥ 24 ॥
sa rāmō bahubhirbāṇaiḥ kharakārmukanissṛtaiḥ ।
viddhō rudhirasiktāṅgō babhūva ruṣitō bhṛśam ॥ 25 ॥
sa dhanurdhanvināṃ śrēṣṭhaḥ pragṛhya paramāhavē ।
mumōcha paramēṣvāsaṣṣaṭCharānabhilakṣitān ॥ 26 ॥
śirasyēkēna bāṇēna dvābhyāṃ bahvōrathārdayat ।
tribhiśchandrārdhavaktraiścha vakṣasyabhijaghāna ha ॥ 27 ॥
tataḥ paśchānmahātējā nārāchānbhāskarōpamān ।
jighāṃsū rākṣasaṅkṛddhastrayōdaśa samādadē ॥ 28 ॥
tatō'sya yugamēkēna chaturbhiśchaturō hayān ।
ṣaṣṭhēna tu śirassaṅkhyē kharasya rathasārathēḥ ॥ 29 ॥
tribhistrivēṇuṃ balavāndvābhyāmakṣaṃ mahābalaḥ ।
dvādaśēna tu bāṇēna kharasya saśaraṃ dhanuḥ ॥ 30 ॥
Chitvā vajranikāśēna rāghavaḥ prahasanniva ।
trayōdaśēnēndrasamō bibhēda samarē kharam ॥ 31 ॥
prabhagnadhanvā virathō hatāśvō hatasārathiḥ ।
gadāpāṇiravaplutya tasthau bhūmau kharastadā ॥ 32 ॥
tatkarma rāmasya mahārathasya samētya dēvāścha maharṣayaścha ।
apūjayanprāñjalayaḥ prahṛṣṭāḥ tadā vimānāgragatāssamētāḥ ॥ 33 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē aṣṭāviṃśassargaḥ ॥
