ശ്രീമദ്വാല്മീകീയ രാമായണേ അരണ്യകാംഡമ് ।
അഥ ത്രിംശസ്സര്ഗഃ ।
ഭിത്ത്വാ തു താം ഗദാം ബാണൈ രാഘവോ ധര്മവത്സലഃ ।
സ്മയമാനഃ ഖരം വാക്യം സംരബ്ധമിദമബ്രവീത് ॥ 1 ॥
ഏതത്തേ ബലസർവസ്വം ദര്ശിതം രാക്ഷസാധമ ।
ശക്തിഹീനതരോ മത്തോ വൃഥാ ത്വമവഗര്ജസി ॥ 2 ॥
ഏഷാ ബാണവിനിര്ഭിന്നാ ഗദാ ഭൂമിതലം ഗതാ ।
അഭിധാനപ്രഗല്ഭസ്യ തവ പ്രത്യയഘാതിനീ ॥ 3 ॥
യത്ത്വയോക്തം വിനഷ്ടാനാമഹമശ്രുപ്രമാര്ജനമ് ।
രാക്ഷസാനാം കരോമീതി മിഥ്യാ തദപി തേ വചഃ ॥ 4 ॥
നീചസ്യ ക്ഷുദ്രശീലസ്യ മിഥ്യാവൃത്തസ്യ രക്ഷസഃ ।
പ്രാണാനഹം ഹരിഷ്യാമി ഗരുത്മാനമൃതം യഥാ ॥ 5 ॥
അദ്യ തേ ഛിന്നകംഠസ്യ ഫേനബുദ്ബുദഭൂഷിതമ് ।
വിദാരിതസ്യ മദ്ബാണൈര്മഹീ പാസ്യതി ശോണിതമ് ॥ 6 ॥
പാംസുരൂഷിതസർവാംഗസ്സ്രസ്തന്യസ്ത ഭുജദ്വയഃ ।
സ്വപ്സ്യസേ ഗാം സമാലിംഗ്യ ദുര്ലഭാം പ്രമദാമിവ ॥ 7 ॥
പ്രബദ്ധനിദ്രേ ശയിതേ ത്വയി രാക്ഷസപാംസനേ ।
ഭവിഷ്യംതിശരണ്യാനാം ശരണ്യാ ദംഡകാ ഇമേ ॥ 8 ॥
ജനസ്ഥാനേ ഹതസ്ഥാനേ തവ രാക്ഷസ മച്ഛരൈഃ ।
നിര്ഭയാ വിചരിഷ്യംതി സർവതോ മുനയോ വനേ ॥ 9 ॥
അദ്യ വിപ്രസരിഷ്യംതി രാക്ഷസ്യോ ഹതബാംധവാഃ ।
ബാഷ്പാര്ദ്രവദനാ ദീനാ ഭയാദന്യഭയാവഹാഃ ॥ 10 ॥
അദ്യ ശോകരസജ്ഞാസ്താ ഭവിഷ്യംതി നിരര്ഥകാഃ ।
അനുരൂപകുലാഃ പത്ന്യോ യാസാം ത്വം പതിരീദൃശഃ ॥ 11 ॥
നൃശംസ നീച ക്ഷുദ്രാത്മന്നിത്യം ബ്രാഹ്മണകംടക ।
യത്കൃതേ ശംകിതൈരഗ്നൌ മുനിഭിഃ പാത്യതേ ഹവിഃ ॥ 12 ॥
തമേവമഭിസംരബ്ധം ബ്രുവാണം രാഘവം രണേ ।
ഖരോ നിര്ഭര്ത്സയാമാസ രോഷാത്ഖരതരസ്വരഃ ॥ 13 ॥
ദൃഢം ഖല്വവലിപ്തോഽസി ഭയേഷ്വപി ച നിര്ഭയഃ ।
വാച്യാവാച്യം തതോ ഹി ത്വം മൃത്യുവശ്യോ ന ബുധ്യസേ ॥ 14 ॥
കാലപാശപരിക്ഷിപ്താ ഭവംതി പുരുഷാ ഹി യേ ।
കാര്യാകാര്യം ന ജാനംതി തേ നിരസ്തഷഡിംദ്രിയാഃ ॥ 15 ॥
ഏവമുക്ത്വാ തതോ രാമം സംരുധ്യ ഭ്രുകുടീം തതഃ ।
സ ദദര്ശ മഹാസാലമവിദൂരേ നിശാചരഃ ॥ 16 ॥
രണേ പ്രഹരണസ്യാര്ഥേ സർവതോ ഹ്യവലോകയന് ।
സ തമുത്പാടയാമാസ സംദശ്യ ദശനച്ഛദമ് ॥ 17 ॥
തം സമുത്ക്ഷിപ്യ ബാഹുഭ്യാം വിനദ്യ ച മഹാബലഃ ।
രാമമുദ്ദിശ്യ ചിക്ഷേപ ഹതസ്ത്വമിതി ചാബ്രവീത് ॥ 18 ॥
തമാപതംതം ബാണൌഘൈച്ഛിത്വാ രാമഃ പ്രതാപവാന് ।
രോഷമാഹാരയത്തീവ്രം നിഹംതും സമരേ ഖരമ് ॥ 19 ॥
ജാതസ്വേദസ്തതോ രാമോ രോഷാദ്രക്താംതലോചനഃ ।
നിര്ഭിഭേദ സഹസ്രേണ ബാണാനാം സമരേ ഖരമ് ॥ 20 ॥
തസ്യ ബാണാംതരാദ്രക്തം ബഹു സുസ്രാവ ഫേനിലമ് ।
ഗിരേഃ പ്രസ്രവണസ്യേവ തോയധാരാപരിസ്രവഃ ॥ 21 ॥
വിഹ്വലസ്സകൃതോ ബാണൈഃ ഖരോ രാമേണ സംയുഗേ ।
മത്തോ രുധിരഗംധേന തമേവാഭ്യദ്രവദ്ദ്രുതമ് ॥ 22 ॥
തമാപതംതം സംരബ്ധം കൃതാസ്ത്രോ രുധിരാപ്ലുതമ് ।
അപാസര്പത്പ്രതിപദം കിംചിത്വരിതവിക്രമഃ ॥ 23 ॥
തതഃ പാവകസംകാശം വധായ സമരേ ശരമ് ।
ഖരസ്യ രാമോ ജഗ്രാഹ ബ്രഹ്മദംഡമിവാപരമ് ॥ 24 ॥
സ തം ദത്തം മഘവതാ സുരരാജേന ധീമതാ ।
സംദധേ ചാപി ധര്മാത്മാ മുമോച ച ഖരം പ്രതി ॥ 25 ॥
സ വിമുക്തോ മഹാബാണോ നിര്ഘാതസമനിസ്വനഃ ।
രാമേണ ധനുരായമ്യ ഖരസ്യോരസിചാപതത് ॥ 26 ॥
സ പപാത ഖരോ ഭൂമൌ ദഹ്യമാനശ്ശരാനഗ്നിനാ ।
രുദ്രേണേവ വിനിര്ദഗ്ധശ്വേതാരണ്യേ യഥാംതകഃ ॥ 27 ॥
സ വൃത്ര ഇവ വജ്രേണ ഫേനേന നമുചിര്യഥാ ।
ബലോ വേംദ്രാശനിഹതോ നിപപാത ഹതഃ ഖരഃ ॥ 28 ॥
തതോ രാജര്ഷയസ്സർവേ സംഗതാഃ പരമര്ഷയഃ ।
സഭാജ്യ മുദിതാ രാമമിദം വചനമബ്രുവന് ॥ 29 ॥
ഏതദര്ഥം മഹാതേജാ മഹേംദ്രഃ പാകശാസനഃ ।
ശരഭംഗാശ്രമം പുണ്യമാജഗാമ പുരംദരഃ ॥ 30 ॥
ആനീതസ്ത്വമിമം ദേശമുപായേന മഹര്ഷിഭിഃ ।
ഏഷാം വധാര്ഥം ക്രൂരാണാം രക്ഷസാം പാപകര്മണാമ് ॥ 31 ॥
തദിദം നഃ കൃതം കാര്യം ത്വയാ ദശരഥാത്മജ ।
സുഖം ധര്മം ചരിഷ്യംതി ദംഡകേഷു മഹര്ഷയഃ ॥ 32 ॥
ഏതസ്മിംതരേ ദേവാശ്ചാരണൈസ്സഹ സംഗതാഃ ।
ദുംദുഭീംശ്ചാഭിനിഘ്നംതഃ പുഷ്പവര്ഷം സമംതതഃ ॥ 33 ॥
രാമസ്യോപരി സംഹ്രുഷ്ടാ വവൃഷുർവിസ്മിതാസ്തദാ ।
അര്ധാധികമുഹൂര്തേന രാമേണ നിശിതൈശ്ശരൈഃ ॥ 34 ॥
ചതുര്ദശസഹസ്രാണി രക്ഷസാം ഭീമകര്മണാമ് ।
ഖരദൂഷണമുഖ്യാനാം നിഹതാനി മഹാഹവേ ॥ 35 ॥
അഹോ ബത മഹത്കര്മ രാമസ്യ വിദിതാത്മനഃ ।
അഹോ വീര്യമഹോ ദാക്ഷ്യം വിഷ്ണോരിവ ഹി ദൃശ്യതേ ॥ 36 ॥
ഇത്യേവമുക്ത്വാ തേ സർവേ യയുര്ദേവാ യഥാഗതമ് ।
തസ്മിന്നംതരേ വീരോ ലക്ഷ്മണസ്സഹ സീതയാ ।
ഗിരിദുര്ഗാദ്വിനിഷ്ക്രമ്യ സംവിവേശാശ്രമം സുഖീ ॥ 37 ॥
തതോ രാമസ്തു വിജയീ പൂജ്യമാനോ മഹര്ഷിഭിഃ ।
പ്രവിവേശാശ്രമം വീരോ ലക്ഷ്മണേനാഭിപൂജിതഃ ॥ 38 ॥
തം ദൃഷ്ട്വാ ശത്രുഹംതാരം മഹര്ഷീണാം സുഖാവഹമ് ।
ബഭൂവ ഹൃഷ്ടാ വൈദേഹീ ഭര്താരം പരിഷസ്വജേ ॥ 39 ॥
മുദാ പരമയാ യുക്താ ദൃഷ്ട്വാ രക്ഷോഗണാന്ഹതാന് ।
രാമം ചൈവാവ്യഥം ദൃഷ്ട്വാ തുതോഷ ജനകാത്മജാ ॥ 40 ॥
തതസ്തു തം രാക്ഷസസംഘമര്ദനം സഭാജ്യമാനം മുദിതൈര്മഹര്ഷിഭിഃ ।
പുനഃ പരിഷ്വജ്യ ശശിപ്രഭാനനാ ബഭൂവ ഹൃഷ്ടാ ജനകാത്മജാ തദാ ॥ 41 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ത്രിംശസ്സര്ഗഃ ॥
