ශ්රීමද්වාල්මීකීය රාමායණේ අරණ්යකාංඩම් ।
අථ ත්රිංශස්සර්ගඃ ।
භිත්ත්වා තු තාං ගදාං බාණෛ රාඝවෝ ධර්මවත්සලඃ ।
ස්මයමානඃ ඛරං වාක්යං සංරබ්ධමිදමබ්රවීත් ॥ 1 ॥
ඒතත්තේ බලසර්වස්වං දර්ශිතං රාක්ෂසාධම ।
ශක්තිහීනතරෝ මත්තෝ වෘථා ත්වමවගර්ජසි ॥ 2 ॥
ඒෂා බාණවිනිර්භින්නා ගදා භූමිතලං ගතා ।
අභිධානප්රගල්භස්ය තව ප්රත්යයඝාතිනී ॥ 3 ॥
යත්ත්වයෝක්තං විනෂ්ටානාමහමශ්රුප්රමාර්ජනම් ।
රාක්ෂසානාං කරෝමීති මිථ්යා තදපි තේ වචඃ ॥ 4 ॥
නීචස්ය ක්ෂුද්රශීලස්ය මිථ්යාවෘත්තස්ය රක්ෂසඃ ।
ප්රාණානහං හරිෂ්යාමි ගරුත්මානමෘතං යථා ॥ 5 ॥
අද්ය තේ ඡින්නකංඨස්ය ඵේනබුද්බුදභූෂිතම් ।
විදාරිතස්ය මද්බාණෛර්මහී පාස්යති ශෝණිතම් ॥ 6 ॥
පාංසුරූෂිතසර්වාංගස්ස්රස්තන්යස්ත භුජද්වයඃ ।
ස්වප්ස්යසේ ගාං සමාලිංග්ය දුර්ලභාං ප්රමදාමිව ॥ 7 ॥
ප්රබද්ධනිද්රේ ශයිතේ ත්වයි රාක්ෂසපාංසනේ ।
භවිෂ්යංතිශරණ්යානාං ශරණ්යා දංඩකා ඉමේ ॥ 8 ॥
ජනස්ථානේ හතස්ථානේ තව රාක්ෂස මච්ඡරෛඃ ।
නිර්භයා විචරිෂ්යංති සර්වතෝ මුනයෝ වනේ ॥ 9 ॥
අද්ය විප්රසරිෂ්යංති රාක්ෂස්යෝ හතබාංධවාඃ ।
බාෂ්පාර්ද්රවදනා දීනා භයාදන්යභයාවහාඃ ॥ 10 ॥
අද්ය ශෝකරසජ්ඤාස්තා භවිෂ්යංති නිරර්ථකාඃ ।
අනුරූපකුලාඃ පත්න්යෝ යාසාං ත්වං පතිරීදෘශඃ ॥ 11 ॥
නෘශංස නීච ක්ෂුද්රාත්මන්නිත්යං බ්රාහ්මණකංටක ।
යත්කෘතේ ශංකිතෛරග්නෞ මුනිභිඃ පාත්යතේ හවිඃ ॥ 12 ॥
තමේවමභිසංරබ්ධං බ්රුවාණං රාඝවං රණේ ।
ඛරෝ නිර්භර්ත්සයාමාස රෝෂාත්ඛරතරස්වරඃ ॥ 13 ॥
දෘඪං ඛල්වවලිප්තෝऽසි භයේෂ්වපි ච නිර්භයඃ ।
වාච්යාවාච්යං තතෝ හි ත්වං මෘත්යුවශ්යෝ න බුධ්යසේ ॥ 14 ॥
කාලපාශපරික්ෂිප්තා භවංති පුරුෂා හි යේ ।
කාර්යාකාර්යං න ජානංති තේ නිරස්තෂඩිංද්රියාඃ ॥ 15 ॥
ඒවමුක්ත්වා තතෝ රාමං සංරුධ්ය භ්රුකුටීං තතඃ ।
ස දදර්ශ මහාසාලමවිදූරේ නිශාචරඃ ॥ 16 ॥
රණේ ප්රහරණස්යාර්ථේ සර්වතෝ හ්යවලෝකයන් ।
ස තමුත්පාටයාමාස සංදශ්ය දශනච්ඡදම් ॥ 17 ॥
තං සමුත්ක්ෂිප්ය බාහුභ්යාං විනද්ය ච මහාබලඃ ।
රාමමුද්දිශ්ය චික්ෂේප හතස්ත්වමිති චාබ්රවීත් ॥ 18 ॥
තමාපතංතං බාණෞඝෛච්ඡිත්වා රාමඃ ප්රතාපවාන් ।
රෝෂමාහාරයත්තීව්රං නිහංතුං සමරේ ඛරම් ॥ 19 ॥
ජාතස්වේදස්තතෝ රාමෝ රෝෂාද්රක්තාංතලෝචනඃ ।
නිර්භිභේද සහස්රේණ බාණානාං සමරේ ඛරම් ॥ 20 ॥
තස්ය බාණාංතරාද්රක්තං බහු සුස්රාව ඵේනිලම් ।
ගිරේඃ ප්රස්රවණස්යේව තෝයධාරාපරිස්රවඃ ॥ 21 ॥
විහ්වලස්සකෘතෝ බාණෛඃ ඛරෝ රාමේණ සංයුගේ ।
මත්තෝ රුධිරගංධේන තමේවාභ්යද්රවද්ද්රුතම් ॥ 22 ॥
තමාපතංතං සංරබ්ධං කෘතාස්ත්රෝ රුධිරාප්ලුතම් ।
අපාසර්පත්ප්රතිපදං කිංචිත්වරිතවික්රමඃ ॥ 23 ॥
තතඃ පාවකසංකාශං වධාය සමරේ ශරම් ।
ඛරස්ය රාමෝ ජග්රාහ බ්රහ්මදංඩමිවාපරම් ॥ 24 ॥
ස තං දත්තං මඝවතා සුරරාජේන ධීමතා ।
සංදධේ චාපි ධර්මාත්මා මුමෝච ච ඛරං ප්රති ॥ 25 ॥
ස විමුක්තෝ මහාබාණෝ නිර්ඝාතසමනිස්වනඃ ।
රාමේණ ධනුරායම්ය ඛරස්යෝරසිචාපතත් ॥ 26 ॥
ස පපාත ඛරෝ භූමෞ දහ්යමානශ්ශරානග්නිනා ।
රුද්රේණේව විනිර්දග්ධශ්වේතාරණ්යේ යථාංතකඃ ॥ 27 ॥
ස වෘත්ර ඉව වජ්රේණ ඵේනේන නමුචිර්යථා ।
බලෝ වේංද්රාශනිහතෝ නිපපාත හතඃ ඛරඃ ॥ 28 ॥
තතෝ රාජර්ෂයස්සර්වේ සංගතාඃ පරමර්ෂයඃ ।
සභාජ්ය මුදිතා රාමමිදං වචනමබ්රුවන් ॥ 29 ॥
ඒතදර්ථං මහාතේජා මහේංද්රඃ පාකශාසනඃ ।
ශරභංගාශ්රමං පුණ්යමාජගාම පුරංදරඃ ॥ 30 ॥
ආනීතස්ත්වමිමං දේශමුපායේන මහර්ෂිභිඃ ।
ඒෂාං වධාර්ථං ක්රූරාණාං රක්ෂසාං පාපකර්මණාම් ॥ 31 ॥
තදිදං නඃ කෘතං කාර්යං ත්වයා දශරථාත්මජ ।
සුඛං ධර්මං චරිෂ්යංති දංඩකේෂු මහර්ෂයඃ ॥ 32 ॥
ඒතස්මිංතරේ දේවාශ්චාරණෛස්සහ සංගතාඃ ।
දුංදුභීංශ්චාභිනිඝ්නංතඃ පුෂ්පවර්ෂං සමංතතඃ ॥ 33 ॥
රාමස්යෝපරි සංහ්රුෂ්ටා වවෘෂුර්විස්මිතාස්තදා ।
අර්ධාධිකමුහූර්තේන රාමේණ නිශිතෛශ්ශරෛඃ ॥ 34 ॥
චතුර්දශසහස්රාණි රක්ෂසාං භීමකර්මණාම් ।
ඛරදූෂණමුඛ්යානාං නිහතානි මහාහවේ ॥ 35 ॥
අහෝ බත මහත්කර්ම රාමස්ය විදිතාත්මනඃ ।
අහෝ වීර්යමහෝ දාක්ෂ්යං විෂ්ණෝරිව හි දෘශ්යතේ ॥ 36 ॥
ඉත්යේවමුක්ත්වා තේ සර්වේ යයුර්දේවා යථාගතම් ।
තස්මින්නංතරේ වීරෝ ලක්ෂ්මණස්සහ සීතයා ।
ගිරිදුර්ගාද්විනිෂ්ක්රම්ය සංවිවේශාශ්රමං සුඛී ॥ 37 ॥
තතෝ රාමස්තු විජයී පූජ්යමානෝ මහර්ෂිභිඃ ।
ප්රවිවේශාශ්රමං වීරෝ ලක්ෂ්මණේනාභිපූජිතඃ ॥ 38 ॥
තං දෘෂ්ට්වා ශත්රුහංතාරං මහර්ෂීණාං සුඛාවහම් ।
බභූව හෘෂ්ටා වෛදේහී භර්තාරං පරිෂස්වජේ ॥ 39 ॥
මුදා පරමයා යුක්තා දෘෂ්ට්වා රක්ෂෝගණාන්හතාන් ।
රාමං චෛවාව්යථං දෘෂ්ට්වා තුතෝෂ ජනකාත්මජා ॥ 40 ॥
තතස්තු තං රාක්ෂසසංඝමර්දනං සභාජ්යමානං මුදිතෛර්මහර්ෂිභිඃ ।
පුනඃ පරිෂ්වජ්ය ශශිප්රභානනා බභූව හෘෂ්ටා ජනකාත්මජා තදා ॥ 41 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ත්රිංශස්සර්ගඃ ॥
