ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଏକଚତ୍ଵାରିଂଶସ୍ସର୍ଗଃ ।
ଆଜ୍ଞପ୍ତୋ ରାଜଵଦ୍ଵାକ୍ୟଂ ପ୍ରତିକୂଲଂ ନିଶାଚରଃ ।
ଅବ୍ରଵୀତ୍ପରୁଷଂ ଵାକ୍ୟଂ ମାରୀଚୋ ରାକ୍ଷସାଧିପମ୍ ॥ 1 ॥
କେନାୟମୁପଦିଷ୍ଟସ୍ତେ ଵିନାଶଃ ପାପକର୍ମଣା ।
ସପୁତ୍ରସ୍ୟ ସରାଷ୍ଟ୍ରସ୍ୟ ସାମାତ୍ୟସ୍ୟ ନିଶାଚର ॥ 2 ॥
କସ୍ତ୍ଵୟା ସୁଖିନା ରାଜନ୍ନାଭିନଂଦତି ପାପକୃତ୍ ।
କେନେଦମୁପଦିଷ୍ଟଂ ତେ ମୃତ୍ୟୁଦ୍ଵାରମୁପାୟତଃ ॥ 3 ॥
ଶତ୍ରଵସ୍ତଵ ସୁଵ୍ୟକ୍ତଂ ହୀନଵୀର୍ୟା ନିଶାଚରାଃ ।
ଇଚ୍ଛଂତି ତ୍ଵାଂ ଵିନଶ୍ୟଂତମୁପରୁଦ୍ଧଂ ବଲୀୟସା ॥ 4 ॥
କେନେଦମୁପଦିଷ୍ଟଂ ତେ କ୍ଷୁଦ୍ରେଣାହିତଵାଦିନା ।
ୟସ୍ତ୍ଵାମିଚ୍ଛତି ନଶ୍ୟଂତଂ ସ୍ଵକୃତେନ ନିଶାଚର ॥ 5 ॥
ଵଧ୍ୟାଃ ଖଲୁ ନ ହନ୍ୟଂତେ ସଚିଵାସ୍ତଵ ରାଵଣ ।
ୟେ ତ୍ଵାମୁତ୍ପଥମାରୂଢଂ ନ ନିଗୃହ୍ଣଂତି ସର୍ଵଶଃ ॥ 6 ॥
ଅମାତ୍ୟୈଃ କାମଵୃତ୍ତୋ ହି ରାଜା କାପଥମାଶ୍ରିତଃ ।
ନିଗ୍ରାହ୍ୟସ୍ସର୍ଵଥା ସଦଭିର୍ନ ନିଗ୍ରାହ୍ୟୋ ନିଗୃହ୍ୟସେ ॥ 7 ॥
ଧର୍ମମର୍ଥଂ ଚ କାମଂ ଚ ୟଶଶ୍ଚ ଜୟତାଂ ଵର ।
ସ୍ଵାମିପ୍ରସାଦାତ୍ସଚିଵାଃ ପ୍ରାପ୍ନୁଵଂତି ନିଶାଚର ॥ 8 ॥
ଵିପର୍ୟୟେ ତୁ ତତ୍ସର୍ଵଂ ଵ୍ୟର୍ଥଂ ଭଵତି ରାଵଣ ।
ଵ୍ୟସନଂ ସ୍ଵାମିଵୈଗୁଣ୍ୟାତ୍ପ୍ରାପ୍ନୁଵଂତୀତରେ ଜନାଃ ॥ 9 ॥
ରାଜମୂଲୋ ହି ଧର୍ମଶ୍ଚ ଜୟଶ୍ଚ ଜୟତାଂ ଵର ।
ତସ୍ମାତ୍ସର୍ଵାସ୍ଵଵସ୍ଥାସୁ ରକ୍ଷିତଵ୍ୟା ନରାଧିପାଃ ॥ 10 ॥
ରାଜ୍ୟଂ ପାଲୟିତୁଂ ଶକ୍ୟଂ ନ ତୀକ୍ଷ୍ଣେନ ନିଶାଚର ।
ନ ଚାପି ପ୍ରତିକୂଲେନ ନାଵିନୀତେନ ରାକ୍ଷସ ॥ 11 ॥
ୟେ ତୀକ୍ଷ୍ଣମଂତ୍ରାସ୍ସଚିଵା ଭଜ୍ୟଂତେ ସହ ତେନ ଵୈ ।
ଵିଷମେ ତୁରଗା ଶ୍ଶୀଘ୍ରା ମଂଦସାରଥୟୋ ୟଥା ॥ 12 ॥
ବହଵସ୍ସାଧଵୋ ଲୋକେ ୟୁକ୍ତା ଧର୍ମମନୁଷ୍ଠିତାଃ ।
ପରେଷାମପରାଧେନ ଵିନଷ୍ଟାସ୍ସପରିଚ୍ଛଦାଃ ॥ 13 ॥
ସ୍ଵାମିନା ପ୍ରତିକୂଲେନ ପ୍ରଜାସ୍ତୀକ୍ଷ୍ଣେନ ରାଵଣ ।
ରକ୍ଷ୍ୟମାଣା ନ ଵର୍ଧଂତେ ମେଷା ଗୋମାୟୁନା ୟଥା ॥ 14 ॥
ଅଵଶ୍ୟଂ ଵିନଶିଷ୍ୟଂତି ସର୍ଵେ ରାଵଣ ରାକ୍ଷସାଃ ।
ୟେଷାଂ ତ୍ଵଂ କର୍କଶୋ ରାଜା ଦୁର୍ବୁଦ୍ଧିରଜିତେଂଦ୍ରିୟଃ ॥ 15 ॥
ତଦିଦଂ କାକତାଲୀୟଂ ଘୋରମାସାଦିତଂ ମୟା ।
ଅତ୍ର କିଂ ଶୋଚନୀୟସ୍ତ୍ଵଂ ସସୈନ୍ୟୋ ଵିନଶିଷ୍ୟସି ॥ 16 ॥
ମାଂ ନିହତ୍ୟ ତୁ ରାମଶ୍ଚ ନ ଚିରାତ୍ତ୍ଵାଂ ଵଧିଷ୍ୟତି ।
ଅନେନ କୃତକୃତ୍ୟୋଽସ୍ମି ମ୍ରିୟେୟମରିଣା ହତଃ ॥ 17 ॥
ଦର୍ଶନାଦେଵ ରାମସ୍ୟ ହତଂ ମାମଵଧାରୟ ।
ଆତ୍ମାନଂ ଚ ହତଂ ଵିଦ୍ଧି ହୃତ୍ଵା ସୀତାଂ ସବାଂଧଵମ୍ ॥ 18 ॥
ଆନୟିଷ୍ୟସି ଚେତ୍ସୀତାମାଶ୍ରମାତ୍ସହିତୋ ମୟା ।
ନୈଵତ୍ଵମସି ନାହଂ ଚ ନୈଵ ଲଂକା ନ ରାକ୍ଷସାଃ ॥ 19 ॥
ନିଵାର୍ୟମାଣସ୍ତୁ ମୟା ହିତୈଷିଣା ନ ମୃଷ୍ୟସେ ଵାକ୍ୟମିଦଂ ନିଶାଚର ।
ପରେତକଲ୍ପା ହି ଗତାୟୁଷୋ ନରା ହିତଂ ନ ଗୃହ୍ଣଂତି ସୁହୃଦ୍ଭିରୀରିତମ୍ ॥ 20 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଏକଚତ୍ଵାରିଂଶସ୍ସର୍ଗଃ ॥
