ශ්රීමද්වාල්මීකීය රාමායණේ අරණ්යකාංඩම් ।
අථ ඒකචත්වාරිංශස්සර්ගඃ ।
ආජ්ඤප්තෝ රාජවද්වාක්යං ප්රතිකූලං නිශාචරඃ ।
අබ්රවීත්පරුෂං වාක්යං මාරීචෝ රාක්ෂසාධිපම් ॥ 1 ॥
කේනායමුපදිෂ්ටස්තේ විනාශඃ පාපකර්මණා ।
සපුත්රස්ය සරාෂ්ට්රස්ය සාමාත්යස්ය නිශාචර ॥ 2 ॥
කස්ත්වයා සුඛිනා රාජන්නාභිනංදති පාපකෘත් ।
කේනේදමුපදිෂ්ටං තේ මෘත්යුද්වාරමුපායතඃ ॥ 3 ॥
ශත්රවස්තව සුව්යක්තං හීනවීර්යා නිශාචරාඃ ।
ඉච්ඡංති ත්වාං විනශ්යංතමුපරුද්ධං බලීයසා ॥ 4 ॥
කේනේදමුපදිෂ්ටං තේ ක්ෂුද්රේණාහිතවාදිනා ।
යස්ත්වාමිච්ඡති නශ්යංතං ස්වකෘතේන නිශාචර ॥ 5 ॥
වධ්යාඃ ඛලු න හන්යංතේ සචිවාස්තව රාවණ ।
යේ ත්වාමුත්පථමාරූඪං න නිගෘහ්ණංති සර්වශඃ ॥ 6 ॥
අමාත්යෛඃ කාමවෘත්තෝ හි රාජා කාපථමාශ්රිතඃ ।
නිග්රාහ්යස්සර්වථා සදභිර්න නිග්රාහ්යෝ නිගෘහ්යසේ ॥ 7 ॥
ධර්මමර්ථං ච කාමං ච යශශ්ච ජයතාං වර ।
ස්වාමිප්රසාදාත්සචිවාඃ ප්රාප්නුවංති නිශාචර ॥ 8 ॥
විපර්යයේ තු තත්සර්වං ව්යර්ථං භවති රාවණ ।
ව්යසනං ස්වාමිවෛගුණ්යාත්ප්රාප්නුවංතීතරේ ජනාඃ ॥ 9 ॥
රාජමූලෝ හි ධර්මශ්ච ජයශ්ච ජයතාං වර ।
තස්මාත්සර්වාස්වවස්ථාසු රක්ෂිතව්යා නරාධිපාඃ ॥ 10 ॥
රාජ්යං පාලයිතුං ශක්යං න තීක්ෂ්ණේන නිශාචර ।
න චාපි ප්රතිකූලේන නාවිනීතේන රාක්ෂස ॥ 11 ॥
යේ තීක්ෂ්ණමංත්රාස්සචිවා භජ්යංතේ සහ තේන වෛ ।
විෂමේ තුරගා ශ්ශීඝ්රා මංදසාරථයෝ යථා ॥ 12 ॥
බහවස්සාධවෝ ලෝකේ යුක්තා ධර්මමනුෂ්ඨිතාඃ ।
පරේෂාමපරාධේන විනෂ්ටාස්සපරිච්ඡදාඃ ॥ 13 ॥
ස්වාමිනා ප්රතිකූලේන ප්රජාස්තීක්ෂ්ණේන රාවණ ।
රක්ෂ්යමාණා න වර්ධංතේ මේෂා ගෝමායුනා යථා ॥ 14 ॥
අවශ්යං විනශිෂ්යංති සර්වේ රාවණ රාක්ෂසාඃ ।
යේෂාං ත්වං කර්කශෝ රාජා දුර්බුද්ධිරජිතේංද්රියඃ ॥ 15 ॥
තදිදං කාකතාලීයං ඝෝරමාසාදිතං මයා ।
අත්ර කිං ශෝචනීයස්ත්වං සසෛන්යෝ විනශිෂ්යසි ॥ 16 ॥
මාං නිහත්ය තු රාමශ්ච න චිරාත්ත්වාං වධිෂ්යති ।
අනේන කෘතකෘත්යෝऽස්මි ම්රියේයමරිණා හතඃ ॥ 17 ॥
දර්ශනාදේව රාමස්ය හතං මාමවධාරය ।
ආත්මානං ච හතං විද්ධි හෘත්වා සීතාං සබාංධවම් ॥ 18 ॥
ආනයිෂ්යසි චේත්සීතාමාශ්රමාත්සහිතෝ මයා ।
නෛවත්වමසි නාහං ච නෛව ලංකා න රාක්ෂසාඃ ॥ 19 ॥
නිවාර්යමාණස්තු මයා හිතෛෂිණා න මෘෂ්යසේ වාක්යමිදං නිශාචර ।
පරේතකල්පා හි ගතායුෂෝ නරා හිතං න ගෘහ්ණංති සුහෘද්භිරීරිතම් ॥ 20 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ඒකචත්වාරිංශස්සර්ගඃ ॥
