śrīmadvālmīkīya rāmāyaṇē araṇyakāṇḍam ।
atha ēkachatvāriṃśassargaḥ ।
ājñaptō rājavadvākyaṃ pratikūlaṃ niśācharaḥ ।
abravītparuṣaṃ vākyaṃ mārīchō rākṣasādhipam ॥ 1 ॥
kēnāyamupadiṣṭastē vināśaḥ pāpakarmaṇā ।
saputrasya sarāṣṭrasya sāmātyasya niśāchara ॥ 2 ॥
kastvayā sukhinā rājannābhinandati pāpakṛt ।
kēnēdamupadiṣṭaṃ tē mṛtyudvāramupāyataḥ ॥ 3 ॥
śatravastava suvyaktaṃ hīnavīryā niśācharāḥ ।
ichChanti tvāṃ vinaśyantamuparuddhaṃ balīyasā ॥ 4 ॥
kēnēdamupadiṣṭaṃ tē kṣudrēṇāhitavādinā ।
yastvāmichChati naśyantaṃ svakṛtēna niśāchara ॥ 5 ॥
vadhyāḥ khalu na hanyantē sachivāstava rāvaṇa ।
yē tvāmutpathamārūḍhaṃ na nigṛhṇanti sarvaśaḥ ॥ 6 ॥
amātyaiḥ kāmavṛttō hi rājā kāpathamāśritaḥ ।
nigrāhyassarvathā sadabhirna nigrāhyō nigṛhyasē ॥ 7 ॥
dharmamarthaṃ cha kāmaṃ cha yaśaścha jayatāṃ vara ।
svāmiprasādātsachivāḥ prāpnuvanti niśāchara ॥ 8 ॥
viparyayē tu tatsarvaṃ vyarthaṃ bhavati rāvaṇa ।
vyasanaṃ svāmivaiguṇyātprāpnuvantītarē janāḥ ॥ 9 ॥
rājamūlō hi dharmaścha jayaścha jayatāṃ vara ।
tasmātsarvāsvavasthāsu rakṣitavyā narādhipāḥ ॥ 10 ॥
rājyaṃ pālayituṃ śakyaṃ na tīkṣṇēna niśāchara ।
na chāpi pratikūlēna nāvinītēna rākṣasa ॥ 11 ॥
yē tīkṣṇamantrāssachivā bhajyantē saha tēna vai ।
viṣamē turagā śśīghrā mandasārathayō yathā ॥ 12 ॥
bahavassādhavō lōkē yuktā dharmamanuṣṭhitāḥ ।
parēṣāmaparādhēna vinaṣṭāssaparichChadāḥ ॥ 13 ॥
svāminā pratikūlēna prajāstīkṣṇēna rāvaṇa ।
rakṣyamāṇā na vardhantē mēṣā gōmāyunā yathā ॥ 14 ॥
avaśyaṃ vinaśiṣyanti sarvē rāvaṇa rākṣasāḥ ।
yēṣāṃ tvaṃ karkaśō rājā durbuddhirajitēndriyaḥ ॥ 15 ॥
tadidaṃ kākatālīyaṃ ghōramāsāditaṃ mayā ।
atra kiṃ śōchanīyastvaṃ sasainyō vinaśiṣyasi ॥ 16 ॥
māṃ nihatya tu rāmaścha na chirāttvāṃ vadhiṣyati ।
anēna kṛtakṛtyō'smi mriyēyamariṇā hataḥ ॥ 17 ॥
darśanādēva rāmasya hataṃ māmavadhāraya ।
ātmānaṃ cha hataṃ viddhi hṛtvā sītāṃ sabāndhavam ॥ 18 ॥
ānayiṣyasi chētsītāmāśramātsahitō mayā ।
naivatvamasi nāhaṃ cha naiva laṅkā na rākṣasāḥ ॥ 19 ॥
nivāryamāṇastu mayā hitaiṣiṇā na mṛṣyasē vākyamidaṃ niśāchara ।
parētakalpā hi gatāyuṣō narā hitaṃ na gṛhṇanti suhṛdbhirīritam ॥ 20 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē ēkachatvāriṃśassargaḥ ॥
