ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଦ୍ଵିଚତ୍ଵାରିଂଶସ୍ସର୍ଗଃ ।
ଏଵମୁକ୍ତ୍ଵା ତୁ ଵଚନଂ ମାରୀଚୋ ରାଵଣଂ ତତଃ ।
ଗଚ୍ଛାଵେତ୍ୟବ୍ରଵୀଦ୍ଦୀନୋ ଭୟାଦ୍ରାତ୍ରିଂଚରପ୍ରଭୋଃ ॥ 1 ॥
ଦୃଷ୍ଟଶ୍ଚାହଂ ପୁନସ୍ତେନ ଶରଚାପାସିଧାରିଣା ।
ମଦ୍ଵଧୋଦ୍ୟତଶସ୍ତ୍ରେଽଣ ଵିନଷ୍ଟଂ ଜୀଵିତଂ ଚ ମେ ॥ 2 ॥
ନ ହି ରାମଂ ପରାକ୍ରମ୍ୟ ଜୀଵନ୍ପ୍ରତିନିଵର୍ତତେ ।
ଵର୍ତତେ ପ୍ରତିରୂପୋଽସୌ ୟମଦଂଡହତସ୍ୟ ତେ ॥ 3 ॥
କିଂ ନୁ ଶକ୍ୟଂ ମୟା କର୍ତୁମେଵଂ ତ୍ଵୟି ଦୁରାତ୍ମନି ।
ଏଷ ଗଚ୍ଛାମ୍ୟହଂ ତାତ ସ୍ଵସ୍ତି ତେଽସ୍ତୁ ନିଶାଚର ॥ 4 ॥
ପ୍ରହୃଷ୍ଟସ୍ତ୍ଵଭଵତ୍ତେନ ଵଚନେନ ସ ରାଵଣଃ ।
ପରିଷ୍ଵଜ୍ୟ ସୁସଂଶ୍ଲିଷ୍ଟମିଦଂ ଵଚନମବ୍ରଵୀତ୍ ॥ 5 ॥
ଏତଚ୍ଛୌଂଡୀର୍ୟୟୁକ୍ତଂ ତେ ମଚ୍ଛଂଦଵଶଵର୍ତିନଃ ।
ଇଦାନୀମସି ମାରୀଚଃ ପୂର୍ଵମନ୍ୟୋ ନିଶାଚରଃ ॥ 6 ॥
ଆରୁହ୍ୟତାମୟଂ ଶୀଘ୍ରଂ ରଥୋ ରତ୍ନଵିଭୂଷିତଃ ।
ମୟା ସହ ତଥା ୟୁକ୍ତଃ ପିଶାଚଵଦନୈଃ ଖରୈଃ ॥ 7 ॥
ପ୍ରଲୋଭୟିତ୍ଵା ଵୈଦେହୀଂ ୟଥେଷ୍ଟଂ ଗଂତୁମର୍ହସି ।
ତାଂ ଶୂନ୍ୟେ ପ୍ରସଭଂ ସୀତାମାନୟିଷ୍ୟାମି ମୈଥିଲୀମ୍ ॥ 8 ॥
ତତୋ ରାଵଣମାରୀଚୌ ଵିମାନମିଵ ତଂ ରଥମ୍ ।
ଆରୁହ୍ୟ ୟୟତୁଶ୍ଶୀଘ୍ରଂ ତସ୍ମାଦାଶ୍ରମମଂଡଲାତ୍ ॥ 9 ॥
ତଥୈଵ ତତ୍ର ପଶ୍ୟଂତୌ ପତ୍ତନାନି ଵନାନି ଚ ।
ଗୀରୀଂଶ୍ଚ ସରିତସ୍ସର୍ଵା ରାଷ୍ଟ୍ରାଣି ନଗରାଣି ଚ ॥ 10 ॥
ସମେତ୍ୟ ଦଂଡକାରଣ୍ୟଂ ରାଘଵସ୍ୟାଶ୍ରମଂ ତତଃ ।
ଦଦର୍ଶ ସହ ମାରୀଚୋ ରାଵଣୋ ରାକ୍ଷସାଧିପଃ ॥ 11 ॥
ଅଵତୀର୍ୟ ରଥାତ୍ତସ୍ମାତ୍ତତଃ କାଂଚନଭୂଷଣାତ୍ ।
ହସ୍ତେ ଗୃହୀତ୍ଵା ମାରୀଚଂ ରାଵଣୋ ଵାକ୍ୟମବ୍ରଵୀତ୍ ॥ 12 ॥
ଏତଦାଶ୍ରମପଦଂ ଦୃଶ୍ୟତେ କଦଲୀଵୃତମ୍ ।
କ୍ରିୟତାଂ ତତ୍ସଖେ ଶୀଘ୍ରଂ ୟଦର୍ଥଂ ଵୟମାଗତାଃ ॥ 13 ॥
ସ ରାଵଣଵଚଶ୍ଶ୍ରୁତ୍ଵା ମାରୀଚୋ ରାକ୍ଷସସ୍ତଦା ।
ମୃଗୋ ଭୂତ୍ଵାଽଶ୍ରମଦ୍ଵାରି ରାମସ୍ୟ ଵିଚଚାର ହ ॥ 14 ॥
ସ ତୁ ତଦ୍ରୂପମାସ୍ଥାୟ ମହଦଦ୍ଭୁତଦର୍ଶନମ୍ ।
ମଣିପ୍ରଵରଶୃଂଗାଗ୍ରସ୍ସିତାସିତମୁଖାକୃତିଃ ॥ 15 ॥
ରକ୍ତପଦ୍ମୋତ୍ପଲମୁଖ ଇଂଦ୍ରନୀଲୋତ୍ପଲଶ୍ରଵାଃ ।
କିଂଚିଦଭ୍ୟୁନ୍ନତଗ୍ରୀଵ ଇଂଦ୍ରନୀଲଦଲାଧରଃ ॥ 16 ॥
କୁଂଦେଂଦୁଵଜ୍ରସଂକାଶମୁଦରଂ ଚାସ୍ୟ ଭାସ୍ଵରମ୍ ।
ମଧୂକନିଭପାର୍ଶ୍ଵଶ୍ଚ ପଦ୍ମକିଂଜଲ୍କସନ୍ନିଭଃ ॥ 17 ॥
ଵୈଡୂର୍ୟସଂକାଶଖୁରସ୍ତନୁଜଂଘସ୍ସୁସଂହତଃ ।
ଇଂଦ୍ରାୟୁଧସଵର୍ଣେନ ପୁଚ୍ଛେନୋର୍ଧ୍ଵଂ ଵିରାଜତା ॥ 18 ॥
ମନୋହରସ୍ସ୍ନିଗ୍ଧଵର୍ଣୋ ରତ୍ନୈର୍ନାନାଵିଧୈର୍ଵୃତଃ ।
କ୍ଷଣେନ ରାକ୍ଷସୋ ଜାତୋ ମୃଗଃ ପରମଶୋଭନଃ ॥ 19 ॥
ଵନଂ ପ୍ରଜ୍ଵଲୟନ୍ରମ୍ୟଂ ରାମାଶ୍ରମପଦଂ ଚ ତତ୍ ।
ମନୋହରଂ ଦର୍ଶନୀୟଂ ରୂପଂ କୃତ୍ଵା ସ ରାକ୍ଷସଃ ॥ 20 ॥
ପ୍ରଲୋଭନାର୍ଥଂ ଵୈଦେହ୍ୟା ନାନାଧାତୁଵିଚିତ୍ରିତମ୍ ।
ଵିଚରନ୍ଗଚ୍ଛତେ ତସ୍ମାଚ୍ଛାଦ୍ଵଲାନି ସମଂତତଃ ॥ 21 ॥
ରୂପ୍ୟୈର୍ବିଂଦୁଶତୈଶ୍ଚିତ୍ରୋ ଭୂତ୍ଵା ସ ପ୍ରିୟଦର୍ଶନଃ ।
ଵିଟପୀନାଂ କିସଲୟାନ୍ଭଙ୍ତ୍କ୍ଵାଽଦନ୍ଵିଚଚାର ହ ॥ 22 ॥
କଦଲୀଗୃହକଂ ଗତ୍ଵା କର୍ଣିକାରାନିତସ୍ତତଃ ।
ସମାଶ୍ରୟନ୍ମଂଦଗତିସ୍ସୀତାସଂଦର୍ଶନଂ ତଥା ॥ 23 ॥
ରାଜୀଵଚିତ୍ରପୃଷ୍ଠସ୍ସ ଵିରରାଜ ମହାମୃଗଃ ।
ରାମାଶ୍ରମପଦାଭ୍ୟାଶେ ଵିଚଚାର ୟଥାସୁଖମ୍ ॥ 24 ॥
ପୁନର୍ଗତ୍ଵା ନିଵୃତ୍ତଶ୍ଚ ଵିଚଚାର ମୃଗୋତ୍ତମଃ ।
ଗତ୍ଵା ମୁହୂର୍ତଂ ତ୍ଵରୟା ପୁନଃ ପ୍ରତିନିଵର୍ତତେ ॥ 25 ॥
ଵିକ୍ରୀଡଂଶ୍ଚ କ୍ଵଚିଦ୍ଭୂମୌ ପୁନରେଵ ନିଷୀଦତି ।
ଆଶ୍ରମଦ୍ଵାରମାଗମ୍ୟ ମୃଗୟୂଥାନି ଗଚ୍ଛତି ॥ 26 ॥
ମୃଗୟୂଥୈରନୁଗତଃ ପୁନରେଵ ନିଵର୍ତତେ ।
ସୀତାଦର୍ଶନମାକାଂକ୍ଷନ୍ରାକ୍ଷସୋ ମୃଗତାଂ ଗତଃ ॥ 27 ॥
ପରିଭ୍ରମତି ଚିତ୍ରାଣି ମଂଡଲାନି ଵିନିଷ୍ପତନ୍ ।
ସମୁଦ୍ଵୀକ୍ଷ୍ୟ ଚ ତେ ସର୍ଵେ ମୃଗା ହ୍ୟନ୍ୟେ ଵନେଚରାଃ ॥ 28 ॥
ଉପାଗମ୍ୟ ସମାଘ୍ରାୟ ଵିଦ୍ରଵଂତି ଦିଶୋ ଦଶ ।
ରାକ୍ଷସସ୍ସୋଽପି ତାନ୍ଵନ୍ୟାନ୍ମୃଗାନ୍ମୃଗଵଧେ ରତଃ ॥ 29 ॥
ପ୍ରଚ୍ଛାଦନାର୍ଥଂ ଭାଵସ୍ୟ ନ ଭକ୍ଷୟତି ସଂସ୍ପୃଶନ୍ ।
ତସ୍ମିନ୍ନେଵ ତତଃ କାଲେ ଵୈଦେହୀ ଶୁଭଲୋଚନା ॥ 30 ॥
କୁସୁମାଵଚୟଵ୍ୟଗ୍ରା ପାଦପାନଭ୍ୟଵର୍ତତ ।
କର୍ଣିକାରାନଶୋକାଂଶ୍ଚ ଚୂତାଂଶ୍ଚ ମଦିରେକ୍ଷଣା ॥ 31 ॥
କୁସୁମାନ୍ୟଵଚିନ୍ଵଂତୀ ଚଚାର ରୁଚିରାନନା ।
ଅନର୍ହାଽରଣ୍ୟଵାସସ୍ୟ ସା ତଂ ରତ୍ନମୟଂ ମୃଗମ୍ ॥ 32 ॥
ମୁକ୍ତାମଣି ଵିଚିତ୍ରାଂଗଂ ଦଦର୍ଶ ପରମାଂଗନା ।
ସା ତଂ ରୁଚିରଦଂତୋଷ୍ଠୀ ରୂପ୍ୟଧାତୁତନୂରୁହମ୍ ॥ 33 ॥
ଵିସ୍ମୟୋତ୍ଫୁଲ୍ଲନୟନା ସସ୍ନେହଂ ସମୁଦୈକ୍ଷତ ।
ସ ଚ ତାଂ ରାମଦୟିତାଂ ପଶ୍ୟନ୍ମାୟାମୟୋ ମୃଗଃ ॥ 34 ॥
ଵିଚଚାର ପୁନଶ୍ଚିତ୍ରଂ ଦୀପୟନ୍ନିଵ ତଦ୍ଵନମ୍ ।
ଅଦୃଷ୍ଟପୂର୍ଵଂ ତଂ ଦୃଷ୍ଟ୍ଵା ନାନାରତ୍ନମୟଂ ମୃଗମ୍ ॥ 35 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଦ୍ଵିଚତ୍ଵାରିଂଶସ୍ସର୍ଗଃ ॥
