śrīmadvālmīkīya rāmāyaṇē araṇyakāṇḍam ।
atha dvichatvāriṃśassargaḥ ।
ēvamuktvā tu vachanaṃ mārīchō rāvaṇaṃ tataḥ ।
gachChāvētyabravīddīnō bhayādrātriñcharaprabhōḥ ॥ 1 ॥
dṛṣṭaśchāhaṃ punastēna śarachāpāsidhāriṇā ।
madvadhōdyataśastrē'ṇa vinaṣṭaṃ jīvitaṃ cha mē ॥ 2 ॥
na hi rāmaṃ parākramya jīvanpratinivartatē ।
vartatē pratirūpō'sau yamadaṇḍahatasya tē ॥ 3 ॥
kiṃ nu śakyaṃ mayā kartumēvaṃ tvayi durātmani ।
ēṣa gachChāmyahaṃ tāta svasti tē'stu niśāchara ॥ 4 ॥
prahṛṣṭastvabhavattēna vachanēna sa rāvaṇaḥ ।
pariṣvajya susaṃśliṣṭamidaṃ vachanamabravīt ॥ 5 ॥
ētachChauṇḍīryayuktaṃ tē machChandavaśavartinaḥ ।
idānīmasi mārīchaḥ pūrvamanyō niśācharaḥ ॥ 6 ॥
āruhyatāmayaṃ śīghraṃ rathō ratnavibhūṣitaḥ ।
mayā saha tathā yuktaḥ piśāchavadanaiḥ kharaiḥ ॥ 7 ॥
pralōbhayitvā vaidēhīṃ yathēṣṭaṃ gantumarhasi ।
tāṃ śūnyē prasabhaṃ sītāmānayiṣyāmi maithilīm ॥ 8 ॥
tatō rāvaṇamārīchau vimānamiva taṃ ratham ।
āruhya yayatuśśīghraṃ tasmādāśramamaṇḍalāt ॥ 9 ॥
tathaiva tatra paśyantau pattanāni vanāni cha ।
gīrīṃścha saritassarvā rāṣṭrāṇi nagarāṇi cha ॥ 10 ॥
samētya daṇḍakāraṇyaṃ rāghavasyāśramaṃ tataḥ ।
dadarśa saha mārīchō rāvaṇō rākṣasādhipaḥ ॥ 11 ॥
avatīrya rathāttasmāttataḥ kāñchanabhūṣaṇāt ।
hastē gṛhītvā mārīchaṃ rāvaṇō vākyamabravīt ॥ 12 ॥
ētadāśramapadaṃ dṛśyatē kadalīvṛtam ।
kriyatāṃ tatsakhē śīghraṃ yadarthaṃ vayamāgatāḥ ॥ 13 ॥
sa rāvaṇavachaśśrutvā mārīchō rākṣasastadā ।
mṛgō bhūtvā'śramadvāri rāmasya vichachāra ha ॥ 14 ॥
sa tu tadrūpamāsthāya mahadadbhutadarśanam ।
maṇipravaraśṛṅgāgrassitāsitamukhākṛtiḥ ॥ 15 ॥
raktapadmōtpalamukha indranīlōtpalaśravāḥ ।
kiñchidabhyunnatagrīva indranīladalādharaḥ ॥ 16 ॥
kundēnduvajrasaṅkāśamudaraṃ chāsya bhāsvaram ।
madhūkanibhapārśvaścha padmakiñjalkasannibhaḥ ॥ 17 ॥
vaiḍūryasaṅkāśakhurastanujaṅghassusaṃhataḥ ।
indrāyudhasavarṇēna puchChēnōrdhvaṃ virājatā ॥ 18 ॥
manōharassnigdhavarṇō ratnairnānāvidhairvṛtaḥ ।
kṣaṇēna rākṣasō jātō mṛgaḥ paramaśōbhanaḥ ॥ 19 ॥
vanaṃ prajvalayanramyaṃ rāmāśramapadaṃ cha tat ।
manōharaṃ darśanīyaṃ rūpaṃ kṛtvā sa rākṣasaḥ ॥ 20 ॥
pralōbhanārthaṃ vaidēhyā nānādhātuvichitritam ।
vicharangachChatē tasmāchChādvalāni samantataḥ ॥ 21 ॥
rūpyairbinduśataiśchitrō bhūtvā sa priyadarśanaḥ ।
viṭapīnāṃ kisalayānbhaṅtkvā'danvichachāra ha ॥ 22 ॥
kadalīgṛhakaṃ gatvā karṇikārānitastataḥ ।
samāśrayanmandagatissītāsandarśanaṃ tathā ॥ 23 ॥
rājīvachitrapṛṣṭhassa virarāja mahāmṛgaḥ ।
rāmāśramapadābhyāśē vichachāra yathāsukham ॥ 24 ॥
punargatvā nivṛttaścha vichachāra mṛgōttamaḥ ।
gatvā muhūrtaṃ tvarayā punaḥ pratinivartatē ॥ 25 ॥
vikrīḍaṃścha kvachidbhūmau punarēva niṣīdati ।
āśramadvāramāgamya mṛgayūthāni gachChati ॥ 26 ॥
mṛgayūthairanugataḥ punarēva nivartatē ।
sītādarśanamākāṅkṣanrākṣasō mṛgatāṃ gataḥ ॥ 27 ॥
paribhramati chitrāṇi maṇḍalāni viniṣpatan ।
samudvīkṣya cha tē sarvē mṛgā hyanyē vanēcharāḥ ॥ 28 ॥
upāgamya samāghrāya vidravanti diśō daśa ।
rākṣasassō'pi tānvanyānmṛgānmṛgavadhē rataḥ ॥ 29 ॥
prachChādanārthaṃ bhāvasya na bhakṣayati saṃspṛśan ।
tasminnēva tataḥ kālē vaidēhī śubhalōchanā ॥ 30 ॥
kusumāvachayavyagrā pādapānabhyavartata ।
karṇikārānaśōkāṃścha chūtāṃścha madirēkṣaṇā ॥ 31 ॥
kusumānyavachinvantī chachāra ruchirānanā ।
anarhā'raṇyavāsasya sā taṃ ratnamayaṃ mṛgam ॥ 32 ॥
muktāmaṇi vichitrāṅgaṃ dadarśa paramāṅganā ।
sā taṃ ruchiradantōṣṭhī rūpyadhātutanūruham ॥ 33 ॥
vismayōtphullanayanā sasnēhaṃ samudaikṣata ।
sa cha tāṃ rāmadayitāṃ paśyanmāyāmayō mṛgaḥ ॥ 34 ॥
vichachāra punaśchitraṃ dīpayanniva tadvanam ।
adṛṣṭapūrvaṃ taṃ dṛṣṭvā nānāratnamayaṃ mṛgam ॥ 35 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē dvichatvāriṃśassargaḥ ॥
