ശ്രീമദ്വാല്മീകീയ രാമായണേ അരണ്യകാംഡമ് ।
അഥ ദ്വിചത്വാരിംശസ്സര്ഗഃ ।
ഏവമുക്ത്വാ തു വചനം മാരീചോ രാവണം തതഃ ।
ഗച്ഛാവേത്യബ്രവീദ്ദീനോ ഭയാദ്രാത്രിംചരപ്രഭോഃ ॥ 1 ॥
ദൃഷ്ടശ്ചാഹം പുനസ്തേന ശരചാപാസിധാരിണാ ।
മദ്വധോദ്യതശസ്ത്രേഽണ വിനഷ്ടം ജീവിതം ച മേ ॥ 2 ॥
ന ഹി രാമം പരാക്രമ്യ ജീവന്പ്രതിനിവര്തതേ ।
വര്തതേ പ്രതിരൂപോഽസൌ യമദംഡഹതസ്യ തേ ॥ 3 ॥
കിം നു ശക്യം മയാ കര്തുമേവം ത്വയി ദുരാത്മനി ।
ഏഷ ഗച്ഛാമ്യഹം താത സ്വസ്തി തേഽസ്തു നിശാചര ॥ 4 ॥
പ്രഹൃഷ്ടസ്ത്വഭവത്തേന വചനേന സ രാവണഃ ।
പരിഷ്വജ്യ സുസംശ്ലിഷ്ടമിദം വചനമബ്രവീത് ॥ 5 ॥
ഏതച്ഛൌംഡീര്യയുക്തം തേ മച്ഛംദവശവര്തിനഃ ।
ഇദാനീമസി മാരീചഃ പൂർവമന്യോ നിശാചരഃ ॥ 6 ॥
ആരുഹ്യതാമയം ശീഘ്രം രഥോ രത്നവിഭൂഷിതഃ ।
മയാ സഹ തഥാ യുക്തഃ പിശാചവദനൈഃ ഖരൈഃ ॥ 7 ॥
പ്രലോഭയിത്വാ വൈദേഹീം യഥേഷ്ടം ഗംതുമര്ഹസി ।
താം ശൂന്യേ പ്രസഭം സീതാമാനയിഷ്യാമി മൈഥിലീമ് ॥ 8 ॥
തതോ രാവണമാരീചൌ വിമാനമിവ തം രഥമ് ।
ആരുഹ്യ യയതുശ്ശീഘ്രം തസ്മാദാശ്രമമംഡലാത് ॥ 9 ॥
തഥൈവ തത്ര പശ്യംതൌ പത്തനാനി വനാനി ച ।
ഗീരീംശ്ച സരിതസ്സർവാ രാഷ്ട്രാണി നഗരാണി ച ॥ 10 ॥
സമേത്യ ദംഡകാരണ്യം രാഘവസ്യാശ്രമം തതഃ ।
ദദര്ശ സഹ മാരീചോ രാവണോ രാക്ഷസാധിപഃ ॥ 11 ॥
അവതീര്യ രഥാത്തസ്മാത്തതഃ കാംചനഭൂഷണാത് ।
ഹസ്തേ ഗൃഹീത്വാ മാരീചം രാവണോ വാക്യമബ്രവീത് ॥ 12 ॥
ഏതദാശ്രമപദം ദൃശ്യതേ കദലീവൃതമ് ।
ക്രിയതാം തത്സഖേ ശീഘ്രം യദര്ഥം വയമാഗതാഃ ॥ 13 ॥
സ രാവണവചശ്ശ്രുത്വാ മാരീചോ രാക്ഷസസ്തദാ ।
മൃഗോ ഭൂത്വാഽശ്രമദ്വാരി രാമസ്യ വിചചാര ഹ ॥ 14 ॥
സ തു തദ്രൂപമാസ്ഥായ മഹദദ്ഭുതദര്ശനമ് ।
മണിപ്രവരശൃംഗാഗ്രസ്സിതാസിതമുഖാകൃതിഃ ॥ 15 ॥
രക്തപദ്മോത്പലമുഖ ഇംദ്രനീലോത്പലശ്രവാഃ ।
കിംചിദഭ്യുന്നതഗ്രീവ ഇംദ്രനീലദലാധരഃ ॥ 16 ॥
കുംദേംദുവജ്രസംകാശമുദരം ചാസ്യ ഭാസ്വരമ് ।
മധൂകനിഭപാര്ശ്വശ്ച പദ്മകിംജല്കസന്നിഭഃ ॥ 17 ॥
വൈഡൂര്യസംകാശഖുരസ്തനുജംഘസ്സുസംഹതഃ ।
ഇംദ്രായുധസവര്ണേന പുച്ഛേനോര്ധ്വം വിരാജതാ ॥ 18 ॥
മനോഹരസ്സ്നിഗ്ധവര്ണോ രത്നൈര്നാനാവിധൈർവൃതഃ ।
ക്ഷണേന രാക്ഷസോ ജാതോ മൃഗഃ പരമശോഭനഃ ॥ 19 ॥
വനം പ്രജ്വലയന്രമ്യം രാമാശ്രമപദം ച തത് ।
മനോഹരം ദര്ശനീയം രൂപം കൃത്വാ സ രാക്ഷസഃ ॥ 20 ॥
പ്രലോഭനാര്ഥം വൈദേഹ്യാ നാനാധാതുവിചിത്രിതമ് ।
വിചരന്ഗച്ഛതേ തസ്മാച്ഛാദ്വലാനി സമംതതഃ ॥ 21 ॥
രൂപ്യൈര്ബിംദുശതൈശ്ചിത്രോ ഭൂത്വാ സ പ്രിയദര്ശനഃ ।
വിടപീനാം കിസലയാന്ഭങ്ത്ക്വാഽദന്വിചചാര ഹ ॥ 22 ॥
കദലീഗൃഹകം ഗത്വാ കര്ണികാരാനിതസ്തതഃ ।
സമാശ്രയന്മംദഗതിസ്സീതാസംദര്ശനം തഥാ ॥ 23 ॥
രാജീവചിത്രപൃഷ്ഠസ്സ വിരരാജ മഹാമൃഗഃ ।
രാമാശ്രമപദാഭ്യാശേ വിചചാര യഥാസുഖമ് ॥ 24 ॥
പുനര്ഗത്വാ നിവൃത്തശ്ച വിചചാര മൃഗോത്തമഃ ।
ഗത്വാ മുഹൂര്തം ത്വരയാ പുനഃ പ്രതിനിവര്തതേ ॥ 25 ॥
വിക്രീഡംശ്ച ക്വചിദ്ഭൂമൌ പുനരേവ നിഷീദതി ।
ആശ്രമദ്വാരമാഗമ്യ മൃഗയൂഥാനി ഗച്ഛതി ॥ 26 ॥
മൃഗയൂഥൈരനുഗതഃ പുനരേവ നിവര്തതേ ।
സീതാദര്ശനമാകാംക്ഷന്രാക്ഷസോ മൃഗതാം ഗതഃ ॥ 27 ॥
പരിഭ്രമതി ചിത്രാണി മംഡലാനി വിനിഷ്പതന് ।
സമുദ്വീക്ഷ്യ ച തേ സർവേ മൃഗാ ഹ്യന്യേ വനേചരാഃ ॥ 28 ॥
ഉപാഗമ്യ സമാഘ്രായ വിദ്രവംതി ദിശോ ദശ ।
രാക്ഷസസ്സോഽപി താന്വന്യാന്മൃഗാന്മൃഗവധേ രതഃ ॥ 29 ॥
പ്രച്ഛാദനാര്ഥം ഭാവസ്യ ന ഭക്ഷയതി സംസ്പൃശന് ।
തസ്മിന്നേവ തതഃ കാലേ വൈദേഹീ ശുഭലോചനാ ॥ 30 ॥
കുസുമാവചയവ്യഗ്രാ പാദപാനഭ്യവര്തത ।
കര്ണികാരാനശോകാംശ്ച ചൂതാംശ്ച മദിരേക്ഷണാ ॥ 31 ॥
കുസുമാന്യവചിന്വംതീ ചചാര രുചിരാനനാ ।
അനര്ഹാഽരണ്യവാസസ്യ സാ തം രത്നമയം മൃഗമ് ॥ 32 ॥
മുക്താമണി വിചിത്രാംഗം ദദര്ശ പരമാംഗനാ ।
സാ തം രുചിരദംതോഷ്ഠീ രൂപ്യധാതുതനൂരുഹമ് ॥ 33 ॥
വിസ്മയോത്ഫുല്ലനയനാ സസ്നേഹം സമുദൈക്ഷത ।
സ ച താം രാമദയിതാം പശ്യന്മായാമയോ മൃഗഃ ॥ 34 ॥
വിചചാര പുനശ്ചിത്രം ദീപയന്നിവ തദ്വനമ് ।
അദൃഷ്ടപൂർവം തം ദൃഷ്ട്വാ നാനാരത്നമയം മൃഗമ് ॥ 35 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ദ്വിചത്വാരിംശസ്സര്ഗഃ ॥
