শ্রীমদ্বাল্মীকীয় রামাযণে অরণ্যকাংডম্ ।
অথ ত্রিচত্বারিংশস্সর্গঃ ।
সা তং সংপ্রেক্ষ্য় সুশ্রোণী কুসুমান্যপচিন্বতী ।
হেমরাজতবর্ণাভ্য়াং পার্শ্বাভ্য়ামুপশোভিতম্ ॥ 1 ॥
প্রহৃষ্টা চানবদ্য়াংগী মৃষ্টহাটকবর্ণিনী ।
ভর্তারমপি চক্রংদ লক্ষ্মণং চাপি সায়ুধম্ ॥ 2 ॥
তয়াঽঽহূতৌ নরব্য়াঘ্রৌ বৈদেহ্য়া রামলক্ষ্মণৌ ।
বীক্ষমাণৌ তু তৌ দেশং তদা দদৃশতুর্মৃগম্ ॥ 3 ॥
শংকমানস্তু তং দৃষ্ট্বা লক্ষ্মণো রামমব্রবীত্ ।
তমেবৈনমহং মন্য়ে মারীচং রাক্ষসং মৃগম্ ॥ 4 ॥
চরংতোমৃগয়াং হৃষ্টাঃ পাপেনোপাধিনা বনে ।
অনেন নিহতা রাজন্ রাজানঃ কামরূপিণা ॥ 5 ॥
অস্য় মায়াবিদো মায়ামৃগরূপমিদং কৃতম্ ।
ভানুমত্পুরুষব্য়াঘ্র গংধর্বপুরসন্নিভম্ ॥ 6 ॥
মৃগো হ্য়েবংবিধো রত্নবিচিত্রো নাস্তি রাঘব ।
জগত্য়াং জগতীনাথ মায়ৈষা হি ন সংশয়ঃ ॥ 7 ॥
এবং ব্রুবাণং কাকুত্স্থং প্রতিবার্য় শুচিস্মিতা ।
উবাচ সীতা সংহৃষ্টা চর্মণা হৃতচেতনা ॥ 8 ॥
আর্যপুত্রাভিরামোঽসৌ মৃগো হরতি মে মনঃ ।
আনয়ৈনং মহাবাহো ক্রীডার্থং নো ভবিষ্যতি ॥ 9 ॥
ইহাশ্রমপদেঽস্মাকং বহবঃ পুণ্যদর্শনাঃ ।
মৃগাশ্চরংতি সহিতাশ্চমরাস্সৃমরাস্তথা ॥ 10 ॥
ঋক্ষাঃ পৃষতসংঘাশ্চ বানরাঃ কিন্নরাস্তথা ।
বিচরংতি মহাবাহো রুপশ্রেষ্ঠা মনোহরাঃ ॥ 11 ॥
ন চাস্য় সদৃশো রাজংদৃষ্টপূর্বো মৃগো ময়া ।
তেজসা ক্ষময়া দীপ্ত্য়া যথাঽয়ং মৃগসত্তমঃ ॥ 12 ॥
নানাবর্ণবিচিত্রাংগো রত্নবিংদুসমাচিতঃ ।
দ্য়োতযন্বনমব্যগ্রং শোভতে শশিসন্নিভঃ ॥ 13 ॥
অহো রূপমহো লক্ষ্মীস্স্বরসংপচ্চ শোভনা ।
মৃগোঽদ্ভুতো বিচিত্রাংগো হৃদয়ং হরতীব মে ॥ 14 ॥
যদি গ্রহণমভ্য়েতি জীবন্নেব মৃগস্তব ।
আশ্চর্যভূতং ভবতি বিস্ময়ং জনয়িষ্যতি ॥ 15 ॥
সমাপ্তবনবাসানাং রাজ্যস্থানাং চ নঃ পুনঃ ।
অংতঃপুরবিভূষার্থো মৃগ এষ ভবিষ্যতি ॥ 16 ॥
ভরতস্য়ার্যপুত্রস্য় শ্বশ্রূণাং মম চ প্রভো ।
মৃগরূপমিদং ব্যক্তং বিস্ময়ং জনয়িষ্যতি ॥ 17 ॥
জীবন্ন যদি তেঽভ্য়েতি গ্রহণং মৃগসত্তমঃ ।
অজিনং নরশার্দূল রুচিরং মে ভবিষ্যতি ॥ 18 ॥
নিহতস্য়াস্য় সত্ত্বস্য় জাংবূনদমযত্বচি ।
শষ্পবৃস্য়াং বিনীতায়ামিচ্ছাম্যহমুপাসিতুম্ ॥ 19 ॥
কামবৃত্তমিদং রৌদ্রং স্ত্রীণামসদৃশং মতম্ ।
বপুষা ত্বস্য় সত্ত্বস্য় বিস্ময়ো জনিতো মম ॥ 20 ॥
তেন কাংচনবর্ণেন মণিপ্রবরশৃংগিণা ।
তরুণাদিত্যবর্ণেন নক্ষত্রপথবর্চসা ॥ 21 ॥
বভূব রাঘবস্য়াপি মনো বিস্মযমাগতম্ ।
এবং সীতাবচঃ শ্রুত্বা তং দৃষ্ট্বা মৃগমদ্ভুতম্ ॥ 22 ॥
লোভিতস্তেন রূপেণ সীতয়া চ প্রচোদিতঃ ।
উবাচ রাঘবো হৃষ্টো ভ্রাতরং লক্ষ্মণং বচঃ ॥ 23 ॥
পশ্য় লক্ষ্মণ বৈদেহ্য়াঃ স্পৃহাং মৃগগতামিমাম্ ।
রূপশ্রেষ্ঠতয়া হ্য়েষ মৃগোঽদ্য় ন ভবিষ্যতি ॥ 24 ॥
ন বনে নংদনোদ্ধেশে ন চৈত্ররথসংশ্রয়ে ।
কুতঃপৃথিব্য়াং সৌমিত্রে যোঽস্য় কশ্চিত্সমো মৃগঃ ॥ 25 ॥
প্রতিলোমানুলোমাশ্চ রুচিরা রোমরাজয়ঃ ।
শোভংতে মৃগমাশ্রিত্য় চিত্রাঃ কনকবিংদবঃ ॥ 26 ॥
পশ্য়াস্য় জৃংভমাণস্য় দীপ্তামগ্নিশিখোপমাম্ ।
জিহ্বাং মুখান্নিস্সরংতীং মেঘাদিব শতহ্রদাম্ ॥ 27 ॥
মসারগল্লর্কমুখশ্শংখমুক্তানিভোদরঃ ।
কস্য় নামাভিরূপ্য়োঽসৌ ন মনো লোভয়েন্মৃগঃ ॥ 28 ॥
কস্য় রূপমিদং দৃষ্ট্বা জাংবূনদ মযপ্রভম্ ।
নানারত্নময়ং দিব্য়ং ন মনো বিস্ময়ং ব্রজেত্ ॥ 29 ॥
মাংসহেতোরপি মৃগান্বিনোদার্থং চ ধন্বনঃ ।
ঘ্নংতি লক্ষ্মণ রাজানো মৃগয়ায়াং মহাবনে ॥ 30 ॥
ধনানি ব্যবসায়েন বিচীয়ংতে মহাবনে ।
ধাতবো বিবিধাশ্চাপি মণিরত্নসুবর্ণিনঃ ॥ 31 ॥
তত্সারমখিলং নৃণাং ধনং নিচযবর্ধনম্ ।
মনসা চিংতিতং সর্বং যথা শুক্রস্য় লক্ষ্মণ ॥ 32 ॥
অর্থী যেনার্থকৃত্য়েন সংব্রজত্যবিচারযন্ ।
তমর্থমর্থশাস্ত্রজ্ঞাঃ প্রাহুরর্থ্য়াশ্চ লক্ষ্মণ ॥ 33 ॥
এতস্য় মৃগরত্নস্য় পরার্ধ্য়ে কাংচনত্বচি ।
উপবেক্ষ্যতি বৈদেহী ময়া সহ সুমধ্যমা ॥ 34 ॥
ন কাদলী ন প্রিযকী ন প্রবেণী ন চাবিকী ।
ভবেদেতস্য় সদৃশী স্পর্শনেনেতি মে মতিঃ ॥ 35 ॥
এষ চৈব মৃগশ্শ্রীমান্ যশ্চ দিব্য়ো নভশ্চরঃ ।
উভাবেতৌ মৃগৌ দিব্য়ৌ তারামৃগমহীমৃগৌ ॥ 36 ॥
যদি বাঽয়ং তথা যন্মাং ভবেদ্বদসি লক্ষ্মণ ।
মায়ৈষা রাক্ষসস্য়েতি কর্তব্য়োস্য় বধো ময়া ॥ 37 ॥
এতেন হি নৃশংসেন মারীচেনাকৃতাত্মনা ।
বনে বিচরতা পূর্বং হিংসিতা মুনিপুংগবাঃ ॥ 38 ॥
উত্থায় বহবো যেন মৃগয়ায়াং জনাধিপাঃ ।
নিহতাঃ পরমেষ্বাসাস্তস্মাদ্বধ্যস্ত্বয়ং মৃগঃ ॥ 39 ॥
পুরস্তাদিহ বাতাপিঃ পরিভূয় তপস্বিনঃ ।
উদরস্থো দ্বিজান্হংতিস্বগর্ভোঽশ্বতরীমিব ॥ 40 ॥
স কদাচিচ্চিরাল্লোভাদাসসাদ মহামুনিম্ ।
অগস্ত্য়ং তেজসা যুক্তং ভক্ষস্তস্য় বভূব হ ॥ 41 ॥
সমুত্থানে ব তদ্রূপং কর্তুকামং সমীক্ষ্য় তম্ ।
উত্স্ময়িত্বা তু ভগবান্বাতাপিমিদমব্রবীত্ ॥ 42 ॥
ত্বয়াঽবিগণ্য় বাতাপে পরিভূতাস্স্বতেজসা ।
জীবলোকে দ্বিজশ্রেষ্ঠাস্তস্মাদসি জরাং গতঃ ॥ 43 ॥
তদেবং ন ভবেদ্রক্ষোবাতাপিরিব লক্ষ্মণ ।
মদ্বিধং যোঽতিমন্য়েত ধর্মনিত্য়ং জিতেংদ্রিযম্ ॥ 44 ॥
ভবেদ্ধতোঽয়ং বাতাপিরগস্ত্য়েনেব মাং গতঃ ।
ইহ ত্বং ভব সন্নদ্দো যংত্রিতো রক্ষ মৈথিলীম্ ॥ 45 ॥
অস্য়ামাযত্তমস্মাকং যত্কৃত্য়ং রঘুনংদন ।
অহমেনং বধিষ্য়ামি গ্রহীষ্য়াম্যপি বা মৃগম্ ॥ 46 ॥
যাবদ্গচ্ছামি সৌমিত্রে মৃগমানয়িতুং দ্রুতম্ ।
পশ্য় লক্ষ্মণ বৈদেহীং মৃগত্বচি গতস্পৃহাম্ ॥ 47 ॥
ত্বচা প্রধানয়া হ্য়েষ মৃগোঽদ্য় ন ভবিষ্যতি ।
অপ্রমত্তেন তে ভাব্যমাশ্রমস্থেন সীতয়া ॥ 48 ॥
যাবত্পৃষতমেকেন সাযকেন নিহন্ম্যহম্ ।
হত্বৈতচ্চর্ম চাদায় শীঘ্রমেষ্য়ামি লক্ষ্মণ ॥ 49 ॥
প্রদক্ষিণেনাতিবলেন পক্ষিণা জটায়ুষা বুদ্ধিমতা চ লক্ষ্মণ ।
ভবাপ্রমত্তঃ পরিগৃহ্য় মৈথিলীং প্রতিক্ষণং সর্বত এব শংকিতঃ ॥ 50 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে ত্রিচত্বারিংশস্সর্গঃ ॥
