ශ්රීමද්වාල්මීකීය රාමායණේ අරණ්යකාංඩම් ।
අථ පංචචත්වාරිංශස්සර්ගඃ ।
ආර්තස්වරං තු තං භර්තුර්විජ්ඤාය සදෘශං වනේ ।
උවාච ලක්ෂ්මණං සීතා ගච්ඡ ජීනීහි රාඝවම් ॥ 1 ॥
න හි මේ හෘදයං ස්ථානේ ජීවිතං වාऽවතිෂ්ඨති ।
ක්රෝශතඃ පරමාර්තස්ය ශ්රුතශ්ශබ්දෝ මයා භෘශම් ॥ 2 ॥
ආක්රංදමානං තු වනේ භ්රාතරං ත්රාතුමර්හසි ।
තං ක්ෂිප්රමභිධාව ත්වං භ්රාතරං ශරණෛෂිණම් ॥ 3 ॥
රක්ෂසාං වශමාපන්නං සිංහානාමිව ගෝවෘෂම් ।
න ජගාම තථෝක්තස්තු භ්රාතුරාජ්ඤාය ශාසනම් ॥ 4 ॥
තමුවාච තතස්තත්ර කුපිතා ජනකාත්මජා ।
සෞමිත්රේ මිත්රරූපේණ භ්රාතුස්ත්වමසි ශත්රුවත් ॥ 5 ॥
යස්ත්වමස්යාමවස්ථායාං භ්රාතරං නාභිපත්ස්යසේ ।
ඉච්ඡසි ත්වං විනශ්යංතං රාමං ලක්ෂ්මණ මත්කෘතේ ॥ 6 ॥
ලෝභාත්ත්වං මත්කෘතේ නූනං නානුගච්ඡසි රාඝවම් ।
ව්යසනං තේ ප්රියං මන්යේ ස්නේහෝ භ්රාතරිනාස්තිතේ ॥ 7 ॥
තේන තිෂ්ඨසි විශ්රබ්ධංතමපශ්යන්මහාද්යුතිම් ।
කිං හි සංශයමාපන්නේ තස්මින්නිහ මයා භවේත් ॥ 8 ॥
කර්තව්යමිහ තිෂ්ඨංත්යා යත්ප්රධානස්ත්වමාගතඃ ।
ඉති බ්රුවාණාං වෛදේහීං බාෂ්පශෝකපරිප්ලුතාම් ॥ 9 ॥
අබ්රවීල්ලක්ෂ්මණස්ත්රස්තාං සීතාං මෘගවධූමිව ।
පන්නගාසුරගංධර්වදේවමානුෂරාක්ෂසෛඃ ॥ 10 ॥
අශක්යස්තව වෛදේහි භර්තා ජේතුං න සංශයඃ ।
දේවි දේවමනුෂ්යේෂු ගංධර්වේෂු පතත්රිෂු ॥ 11 ॥
රාක්ෂසේෂු පිශාචේෂු කින්නරේෂු මෘගේෂු ච ।
දානවේෂු ච ඝෝරේෂු ස න විද්යේත ශෝභනේ ॥ 12 ॥
යෝ රාමං ප්රතියුධ්යේත සමරේ වාසවෝපමම් ।
අවධ්යස්සමරේ රාමෝ නෛවං ත්වං වක්තුමර්හසි ॥ 13 ॥
න ත්වාමස්මින්වනේ හාතුමුත්සහේ රාඝවං විනා ।
අනිවාර්යං බලං තස්ය බලෛර්බලවතාමපි ॥ 14 ॥
ත්රිභිර්ලෝකෛස්සමුද්යුක්තෛස්සේශ්වරෛරපි සාමරෛඃ ।
හෘදයං නිර්වෘතං තේऽස්තුසංතාපස්ත්යජ්යතාමයම් ॥ 15 ॥
ආගමිෂ්යති තේ භර්තා ශ්රීඝ්රං හත්වා මෘගෝත්තමම් ।
න ච තස්ය ස්වරෝ ව්යක්තං මායයා කේන චිත්කෘතඃ ।
ගංධර්වනගරප්රඛ්යා මායා සා තස්ය රක්ෂසඃ ॥ 16 ॥
න්යාසභූතාසි වෛදේහි න්යස්තා මයි මහාත්මනා ॥ 17 ॥
රාමේණ ත්වං වරාරෝහේ න ත්වාං ත්යක්තුමිහෝත්සහේ ।
කෘතවෛරාශ්ච වෛදේහි වයමේතෛර්නිශාචරෛඃ ॥ 18 ॥
ඛරස්ය නිධනාදේව ජනස්ථානවධං ප්රති ।
රාක්ෂසා විවිධා වාචෝ විසෘජංති මහාවනේ ॥ 19 ॥
හිංසාවිහාරා වෛදේහි න චිංතයිතුමර්හසි ।
ලක්ෂ්මණේනෛවමුක්තා සා ක්රුද්ධා සංරක්තලෝචනා ॥ 20 ॥
අබ්රවීත්පරුෂං වාක්යං ලක්ෂ්මණං සත්යවාදිනම් ।
අනාර්යාකරණාරංභ නෘශංස කුලපාංසන ॥ 21 ॥
අහං තව ප්රියං මන්යේ රාමස්ය ව්යසනං මහත් ।
රාමස්ය ව්යසනං දෘෂ්ට්වා තේනෛතානි ප්රභාෂසේ ॥ 22 ॥
නෛතච්චිත්රං සපත්නේෂු පාපං ලක්ෂ්මණ යද්භවේත් ।
ත්වද්විධේෂු නෘශංසේෂු නිත්යං ප්රච්ඡන්නචාරිෂු ॥ 23 ॥
සුදුෂ්ටස්ත්වං වනේ රාමමේකමේකෝऽනුගච්ඡසි ।
මම හේතෝඃ ප්රතිච්ඡන්නඃ ප්රයුක්තෝභරතේන වා ॥ 24 ॥
තන්නසිධ්යති සෞමිත්රේ තව වා භරතස්ය වා ।
කථමිංදීවරශ්යාමං පද්මපත්රනිභේක්ෂණම් ॥ 25 ॥
උපසංශ්රිත්ය භර්තාරං කාමයේයං පෘථග්ජනම් ।
සමක්ෂං තව සෞමිත්රේ ප්රාණාංස්ත්යක්ෂේ න සංශයඃ ।
රාමං විනා ක්ෂණමපි න හි ජීවාමි භූතලේ ॥ 26 ॥
ඉත්යුක්තඃ පරුෂං වාක්යං සීතයා රෝමහර්ෂණම් ॥ 27 ॥
අබ්රවීල්ලක්ෂ්මණස්සීතාං ප්රාංජලිර්විජිතේංද්රියඃ ।
උත්තරං නෝත්සහේ වක්තුං දෛවතං භවතී මම ॥ 28 ॥
වාක්යමප්රතිරූපං තු න චිත්රං ස්ත්රීෂු මෛථිලි ।
ස්වභාවස්ත්වේෂ නාරීණාමේවං ලෝකේෂු දෘශ්යතේ ॥ 29 ॥
විමුක්තධර්මාශ්චපලාස්තීක්ෂ්ණා භේදකරාඃ ස්ත්රියඃ ।
න සහේ හීදෘශං වාක්යං වෛදේහි ජනකාත්මජේ ॥ 30 ॥
ශ්රෝත්රයෝරුභයෝර්මේද්ය තප්තනාරාචසන්නිභම් ।
උපශෘණ්වංතු මේ සර්වේ සාක්ෂිභූතා වනේචරාඃ ॥ 31 ॥
න්යායවාදී යථාන්යායමුක්තෝऽහං පරුෂං ත්වයා ।
ධික්ත්වාමද්ය ප්රණශ්ය ත්වං යන්මාමේවං විශංකසේ ।
ස්ත්රීත්වලදුෂ්ටං ස්වභාවේන ගුරුවාක්යේ ව්යවස්ථිතම් ॥ 32 ॥
ගමිෂ්යේ යත්ර කාකුත්ස්ථ ස්වස්ති තේऽස්තු වරානනේ ॥ 33 ॥
රක්ෂංතු ත්වාං විශාලාක්ෂි සමග්රා වනදේවතාඃ ।
නිමිත්තානි ච ඝෝරාණි යානි ප්රාදුර්භවංති මේ ॥ 34 ॥
අපි ත්වාං සහ රාමේණ පශ්යේයං පුනරාගතඃ ।
න වේත්යේතන්න ජානාමි වෛදේහි ජනකාත්මජේ ॥ 35 ॥
ලක්ෂ්මණේනෛවමුක්තා සා රුදංතී ජනකාත්මජා ।
ප්රත්යුවාච තතෝ වාක්යං තීව්රං බාෂ්පපරිප්ලුතා ॥ 36 ॥
ගෝදාවරීං ප්රවේක්ෂ්යාමි විනා රාමේණ ලක්ෂ්මණ ।
අබංධිෂ්යේऽථවා ත්යක්ෂ්යේ විෂමේ දේහමාත්මනඃ ॥ 37 ॥
පිබාම්යහං විෂං තීක්ෂ්ණං ප්රවේක්ෂ්යාමි හුතාශනම් ।
න ත්වහං රාඝවාදන්යං පදාපි පුරුෂං ස්පෘශේ ॥ 38 ॥
ඉති ලක්ෂ්මණමාක්රුශ්ය සීතා දුඃඛසමන්විතා ।
පාණිභ්යාං රුදතී දුඃඛාදුදරං ප්රජඝාන හ ॥ 39 ॥
තාමාර්තරූපාං විමනා රුදංතීං සෞමිත්රිරාලෝක්ය විශාලනේත්රාම් ।
ආශ්වාසයාමාස න චෛව භර්තු ස්තං භ්රාතරංකිංචිදුවාච සීතා ॥ 40 ॥
තතස්තු සීතාමභිවාද්ය ලක්ෂ්මණඃ කෘතාංජලිඃ කිංචිදභිප්රණම්ය ච ।
අන්වීක්ෂමාණෝ බහුශශ්ච මෛථිලීං ජගාම රාමස්ය සමීපමාත්මවාන් ॥ 41 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ පංචචත්වාරිංශස්සර්ගඃ ॥
