শ্রীমদ্বাল্মীকীয় রামাযণে অরণ্যকাংডম্ ।
অথ চতুঃপংচাশস্সর্গঃ ।
হ্রিযমাণা তু বৈদেহী কংচিন্নাথমপশ্যতী ।
দদর্শ গিরিশৃংগস্থান্পংচ বানরপুংগবান্ ॥ 1 ॥
তেষাং মধ্য়ে বিশালাক্ষী কৌশেয়ং কনকপ্রভম্ ।
উত্তরীয়ং বরারোহা শুভান্য়াভরণানি চ ॥ 2 ॥
মুমোচ যদি রামায় শংসেয়ুরিতি মৈথিলী ।
বস্ত্রমুত্সৃজ্য় তন্মধ্য়ে নিক্ষিপ্তং সহভূষণম্ ॥ 3 ॥
সংভ্রমাত্তু দশগ্রীবস্তত্কর্ম ন স বুদ্ধবান্ ।
পিংগাক্ষাস্তাং বিশালাক্ষীং নেত্রৈরনিমিষৈরিব ॥ 4 ॥
বিক্রোশংতীং তথা সীতাং দদৃশুর্বানরর্ষভাঃ ।
স চ পংপামতিক্রম্য় লংকামভিমুখঃ পুরীম্ ॥ 5 ॥
জগাম রুদতীং গৃহ্য় বৈদেহীং রাক্ষসেশ্বরঃ ।
তাং জহার সুসংহৃষ্টো রাবণো মৃত্য়ুমাত্মনঃ ॥ 6 ॥
উত্সংগেনেব ভুজগীং তীক্ষ্ণদংষ্ট্রাং মহাবিষাম্ ।
বনানি সরিতশ্শৈলাংত্সরাংসি চ বিহাযসা ॥ 7 ॥
স ক্ষিপ্রং সমতীয়ায় শরশ্চাপাদিব চ্য়ুতঃ ।
তিমিনক্রনিকেতং তু বরুণালযমক্ষযম্ ॥ 8 ॥
সরিতাং শরণং গত্বা সমতীয়ায় সাগরম্ ।
সংভ্রমাত্পরিবৃত্তোর্মী রুদ্ধমীনমহোরগঃ ॥ 9 ॥
বৈদেহ্য়াং হ্রিযমাণায়াং বভূব বরুণালয়ঃ ।
অংতরিক্ষগতা বাচস্সসৃজুশ্চারণাস্তদা ॥ 10 ॥
এতদংতো দশগ্রীব ইতি সিদ্ধাস্তদাব্রুবন্ ।
স তু সীতাং বিবেষ্টংতীমংকেনাদায় রাবণঃ ॥ 11 ॥
প্রবিবেশ পুরীং লংকাং রূপিণীং মৃত্য়ুমাত্মনঃ ।
সোঽভিগম্য় পুরীং লংকাং সুবিভক্তমহাপথাম্ ॥ 12 ॥
সংরূঢকক্ষ্য়াবহুলং স্বমংতঃপুরমাবিশত্ ।
তত্র তামসিতাপাংগাং শোকমোহপরাযণাম্ ॥ 13 ॥
নিদধে রাবণস্সীতাং ময়ো মায়ামিবস্ত্রিযম্ ।
অব্রবীচ্চ দশগ্রীবঃ পিশাচীর্ঘোরদর্শনাঃ ॥ 14 ॥
যথা নেমাং পুমান্ স্ত্রী বা সীতাং পশ্যত্যসম্মতঃ ।
মুক্তামণিসুবর্ণানি বস্ত্রাণ্য়াভরণানি চ ॥ 15 ॥
যদ্যদিচ্ছেত্তদেবাস্য়া দেয়ং মচ্ছংদতো যথা ।
যা চ বক্ষ্যতি বৈদেহীং বচনং কিংচিদপ্রিযম্ ॥ 16 ॥
অজ্ঞানাদ্যদি বা জ্ঞানান্ন তস্য়া জীবিতং প্রিযম্ ।
তথোক্ত্বা রাক্ষসীস্তাস্তু রাক্ষসেংদ্রঃ প্রতাপবান্ ॥ 17 ॥
নিষ্ক্রম্য়াংতঃ পুরাত্তস্মাত্কিংকৃত্যমিতি চিংতযন্ ।
দদর্শাষ্টৌ মহাবীর্য়ান্রাক্ষসান্পিশিতাশনান্ ॥ 18 ॥
স তাংদৃষ্ট্বা মহাবীর্য়ো বরদানেন মোহিতঃ ।
উবাচৈতানিদং বাক্য়ং প্রশস্য় বলবীর্যতঃ ॥ 19 ॥
নানাপ্রহরণাঃ ক্ষিপ্রমিতো গচ্ছত সত্বরাঃ ।
জনস্থানং হতস্থানং ভূতপূর্বং খরালযম্ ॥ 20 ॥
তত্রোষ্যতাং জনস্থানে শূন্য়ে নিহতরাক্ষসে ।
পৌরুষং বলমাশ্রিত্য় ত্রাসমুত্সৃজ্য় দূরতঃ ॥ 21 ॥
বলং হি সুমহদ্যন্মে জনস্থানে নিবেশিতম্ ।
সদূষণখরং যুদ্ধে হতং রামেণ সাযকৈঃ ॥ 22 ॥
তত ক্রোধো মমামর্ষাদ্ধৈর্যস্য়োপরি বর্ততে ।
বৈরং চ সুমহজ্জাতং রামং প্রতি সুদারুণম্ ॥ 23 ॥
নির্য়াতয়িতুমিচ্ছামি তচ্চ বৈরমহং রিপোঃ ।
ন হি লপ্স্য়াম্যহং নিদ্রামহত্বা সংয়ুগে রিপুম্ ॥ 24 ॥
তং ত্বিদানীমহং হত্বা খরদূষণঘাতিনম্ ।
রামং শর্মোপলপ্স্য়ামি ধনং লব্ধ্বেব নির্ধনঃ ॥ 25 ॥
জনস্থানে বসদ্ভিস্তু ভবদ্ভীরামমাশ্রিতা ।
প্রবৃত্তিরুপনেতব্য়া কিঞ্করোতীতি তত্ত্বতঃ ॥ 26 ॥
অপ্রমাদাচ্চ গংতব্য়ং সর্বৈরপি নিশাচরৈঃ ।
কর্তব্যশ্চ সদা যত্নো রাঘবস্য় বধং প্রতি ॥ 27 ॥
যুষ্মাকং চ বলজ্ঞোঽহং বহুশো রণমূর্ধনি ।
অতশ্চাস্মিন্ জনস্থানে ময়া যূয়ং নিয়োজিতাঃ ॥ 28 ॥
ততঃ প্রিয়ং বাক্যমুপেত্য় রাক্ষসা মহার্থমষ্টাবভিবাদ্য় রাবণম্ ।
বিহায় লংকাং সহিতাঃ প্রতস্থিরে যতো জনস্থানমলক্ষ্যদর্শনাঃ ॥ 29 ॥
ততস্তু সীতামুপলভ্য় রাবণঃ সুসংপ্রহৃষ্টঃ পরিগৃহ্য় মৈথিলীম্ ।
প্রসজ্য় রামেণ চ বৈরমুত্তমং বভূব মোহান্মুদিতস্সরাক্ষসঃ ॥ 30 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে চতুঃপংচাশস্সর্গঃ ॥
